1 Bakolinto 6 - Nouveau Testament en Ngombe 1961

Bisambi a tei eBato baDenga

¹ Okina onu akada na mwangwa ’nde mojɔ, abwani boleneja mojɔ oko na bato baDenga, te nongo na bapakano.

² Otajebakani bo bato baDenga badi bosambeja ngondo? Oko boa, isa ngondo edi bosamba na nu, ino obwanitini bolena mijɔ mikɛkɛlɛkɛ?

³ Otaje-bakani bo so bodi bosambeja babwɛnji-baDiko? esingaiti mijɔ mingondo ye!

⁴ Oko boa, isa odini na mijɔ mimina, omisambejakani na bato baya badi ngasa mɛnɛ a miso maDenga mojɔ moye?

⁵ Mbi nabalaka boa a bokeja no sɔni. Moto omɔci obowɛi ataboloa a tei enu yona obwani bolena mijɔ mibato baDenga?

⁶ Moto na moto ko akɛkɛ na mwangwa’nde a esambi, ee, esambi ebato baya badi pɛ bojima Njambe.

⁷ Moto akakɛ a esambi na mwangwa ’nde, mojɔ momina modi mobe. Enɔi na bopele bo moto adingoe, na bo abungejae likonja linde.

⁸ Ino bɛnɛ ko okɔkɔni bobe, na okoseakani baninga banu bɛnɛ.

⁹ Otajebakani bo bato babe batasangoa Bokumu boNjambe? T’opanganeni; bato balisɔngi bato babole, bato babɔɔli, bimwalimwali, bibamibami,

¹⁰ babi, bato bambengea, bato babolangoa, babosambolu, na mibɛngɔ, batasangoa nongo Bokumu boNjambe.

¹¹ Bakina banu badaka boa; osɛnoani ko, ohɛngɛmɛni ai Njambe, na odini na lilonga, a kombe eKumu Yesu Masiya na a Mwembo moNjambe osu.

¹² Mbi nabwani bokɔ ngando jisusu. Ngando jisusu ko jibɔngiti na mbi. Nabwani bokɔ ngando jisusu; endele ko, nitajimaka bo nagboke na ekina ngando.

¹³ Dia didi a mojɔ mosɔpɔ, na sɔpɔ edi a mojɔ modia. Njambe ko adi bosieja sɔpɔ na dia pongono. Mokuku moditi a mojɔ molisɔngi. Modi oko a mojɔ moKumu, na Kumu adi Kumu omokuku.

¹⁴ Njambe angɔjɔ Kumu a bogwa, na adi bongɔjɔ so pongono na ngulu ende.

¹⁵ Otajebakani bo mikuku minu midi binama biMasiya? Natombe binama biMasiya bo nabicingee na mwali obɔɔli? Pɛpɛ nongo mweka!

¹⁶ Otajebakani bo yona okatani na mwali obɔɔli adi na nde mokuku momɔci? Mojɔ bo, mosɔnɔmɔ bo, Ibo babae bâda munu momɔci.

¹⁷ Moto ko akakatana na Kumu, ibo babae badi mwembo momɔci.

¹⁸ Toma gbeseani bɔɔli. Bobe botongo bokɔkɔ moto bocingiti na mokuku; moto ko yona ongɛkɛ bɔɔli akɔkɔ bobe a mokuku monde mɛnɛ.

¹⁹ Otajebakani bo mikuku minu midi tempelo eMwembo Mosɛnɔke; mojɔ bo Mwembo Mosɛnɔke modi a tei enu? Omosɔni ai Njambe.

²⁰ Oditni baswa banu bɛnɛ, mojɔ bo osikoamani na bobuno bonɛnɛ. A mojɔ momina, toma bakeani Njambe kumu omikuku minu.