1 Bakolinto 5 - Nouveau Testament en Ngombe 1961

Mijɔ Mibe a Denga diKolinto

¹ Bato babalaka bo bɔɔli bodi a tei enu. Nongo bapakano bataje-baka bɔɔli bomina, bo moto adae na mwali osangwa’nde.

² Ino odini na egbo, na obwanini boyea bio a mojɔ momina. Enɔi na bopele bo odongejaeni ai no moto yona okɔkɔ mojɔ momina.

³ Mokuku mombi moditi oho adi no; mwembo mombi ko modi na nu. Na mbi, o moto yona odi a tei enu, nasambejai moto yona okɔ mojɔ momina, a kombe eKumu Yesu.

⁴ Okaboleani likita, mwembo mombi modi boda na nu, na ngulu eKumu osu Yesu,

⁵ hɛngɛni moto omina ai Satana a mojɔ mohogwa bomunu, bo mwembo monde mohele a Busa boKumu.

⁶ Ino obwanitini bosakumeja. Otajebakani bo eketa ekɛkɛ elipetu edi bohekoja mitɛkɛ misusu oko lipetu?

⁷ Dumbani lipetu liyou, bo odaeni molɛmbɛ moyene, pɛpɛ nongo lipetu a tei enu. Mojɔ bo, Mwana-Bata osu oKola-eBonɔ agwa, oko Masiya yo mɛnɛ.

⁸ A mojɔ momina, kinani so boyake Kola na molɛmbɛ mua mopeliti lipetu, molɛmbɛ mobosɛnɔ na mosoti, te nongo na lipetu liyou, lipetu lilisoki na libobe.

⁹ Nasɔnea no a mokanda mombi bo otapanganani na bato balisɔngi.

¹⁰ Cina emina editi bo obambaeni bato balisɔngi bangondo ye, na bato bambengea, na bato baliba, na bato babole. Ekada boa, ka odini bodonga a ngondo oko bodonga.

¹¹ Mbi nasɔnea no bo otapanganani na moto oDenga yona odi na lisɔngi, isa mbengea, isa moto obole, isa moto oebaeli ebe, isa moto obolangoa, isa mobi. Obwanitini boyaka dia na moto yona odi na bikɔmɛli bimina.

¹² A mojɔ mobato batongo baya badi sokolu, moditi mojɔ mombi a bosambeja bato bamina. Endele ko, obwanini bosambeja baya badi a tei eDenga.

¹³ Njambe asambejaka baya badi a sokolu. Dongejani moto mobe yona odi a tei enu.