1 Bakolinto 2 - Nouveau Testament en Ngombe 1961

Bowɛi boMwako Mopele

¹ Baninga, yana akɛ mbi ai no a botɔndɔ Mwako Mopele moNjambe, naikɛ nongo na bɛtɛ ekɔpi, isa na bowɛi.

² Mbi najima na molema mombi mosusu bo mtajeba mokina mojɔ motongo a tei enu, oko Yesu Masiya pɛ yona ogwa a mole-mobokea.

³ Adaka mbi na nu, nadaka na bwɛmbu, na bɔ, na mongongoma.

⁴ Mwako mombi na etɔndɛli embi, biidaka na bikenge bibowɛi; bidaka oko na bimbete na ngulu eNjambe,

⁵ bo ejimeli enu etada a bowɛi bobwato, oko a ngulu eNjambe.

⁶ Iso botɔndɔkɔ ngando jibowɛi oko ai bato bapingamake. Bowɛi bomina ko boditi bowɛi bongondo ye, isa bowɛi bobakumu bangondo ye, baya badi bodimoa.

⁷ Botɔndɔkɔ oko bowɛi boNjambe bobo-mbamake, bowɛi bosɛlingoa yo a mojɔ moekumu esu oko a bobanga mɛnɛ.

⁸ Bakumu bangondo ye batacingeaka bowɛi bomina. Akɔkɔ bo cingea, ka baiwa Kumu oEkumu a mole-mobokea.

⁹ Mojɔ bo mosɔnɔmɔ bo, Miso mainɛ, matoi maika, Na molema momoto moipaka lɛ Ngando jisɛlingoa Njambe a mojɔ mobato baya bamopalaka.

¹⁰ Njambe ko ajibolojai ai so oko na Mwembo. Mojɔ bo Mwembo modukaka ngando jisusu, ee ngando jiNjambe jindinda pongono.

¹¹ Ocigeaka bilɛli bimoto nda? te mwembo momoto mua modi a tei ende? Oko boa koko, pɛpɛ nongo moto ocingeaka bilɛli biNjambe; Mwembo moNjambe pɛ mobicingeaka.

¹² Iso bositi mwembo mongondo ye. Bosi oko Mwembo moNjambe, bo bocingee bipeeli bipa Njambe so na monganji monde.

¹³ Iso botɔndɔkɔ ngando ji, oko na bibaeli bikojaka Mwembo so, te nongo na bibaeli bibowɛi bobato. Bokojaka ngando jiMwembo oko na kɔpi eMwembo.

¹⁴ Moto ko, o abotama yo, t’asɔke ngando jiMwembo moNjambe; jidi oko yebe pɛ a miso mande. Abwaniti bojicingea, mojɔ bo adi bojicingea oko na Mwembo.

¹⁵ Moto oMwembo ko akokelejaka ngando jisusu; pɛpɛ nongo moto ko odi bomokokeleja yo.

¹⁶ Ojebaka bolɛ boKumu nda bo amokojae? Iso ko bodi na bolɛ boMasiya.