1 Bakolinto 16 - Nouveau Testament en Ngombe 1961

Bipeeli. Bileho. Njɛbɛ

¹ A mojɔ mobipeeli ai bato baDenga, kɔni o akoja mbi Menga maGalatia.

² Moto na moto adi bohɛngɛ libondo lilikonja lia libwani na nde a busa boNjambe; pɛ bo’mbani bodoa bombi a bolɔkɔ bipeeli.

³ Mbi nakamea, odini bohɔ bato, na mbi nâbapa mokanda, bo nabalome na bipeeli binu a Yelusalema.

⁴ Mokabwana bo nakɛe mbi mɛnɛ, bato bamina badi bopaka mbi a njea.

⁵ Namaka sieja likota liMakedonia nasa ko nadoe ai no, mojɔ bo mokano mombi modi bo nanɔe a njea eMakedonia.

⁶ Isa nadi boyeyoa na nu; kako nadi bosieja edidi epio a tei enu, bo osukejaeni mbi a njea ekɛkɛ mbi.

⁷ Ehole ye, nitapalaka ho nanɛnɛe na nu oko a njea pɛ. Kumu akajima, nadi na njingo bo nayeyoe na nu.

⁸ Nadi bopeta yeyoa ko a Ɛpɛsɔ oko a busa boDomitano,

⁹ mojɔ bo njea enɛnɛ na epele ehoi a boso bombi bo nakɔe elomu; soki ko jidi jinɛnɛ.

¹⁰ Timoteo akamea, kɔni bo adae a tei enu o bina’nde, mojɔ bo akɔkɔ elomu eNjambe o akɔkɔ mbi mɛnɛ.

¹¹ Moto abwaniti bomokpɛkoja. Mosukejani a njea na bowi, bo ahule ai mbi, mojɔ bo namo-njaka yo na baninga batongo pongono.

¹² A mojɔ momwangwa’su Apolo, mbi namolehi bou mɛnɛ bo akɛe na baninga oho adi no. Iyo ko apalakiti bo akɛe edɛye. Adi bokɛ, akanɛ ehole epele.

¹³ Ino, toma sɛnjɛlɛni bopele; dani bambilimake a ejimeli enu; dani bami mɛnɛ; dani bato bapipo.

¹⁴ Kɔni bilomu binu bisusu oko na epaeli.

¹⁵ Ojebakani bato baSɛtɛpana; baya bahekoa ai Kumu boso a likota liAkaya, oko ’bo; na badi na bingi enɛnɛ a bokɔmeja bato ba-Denga.

¹⁶ Mbi nalehaka no baninga bo odaeni na lisuma ai bato baya badi na ekɔmɛli emina, na bato basusu baya babakɔmejaka, na baya bakɔkɔ elomu eNjambe.

¹⁷ Nadi na sepi mojɔ bo Sɛtɛpana, na Polotunato, na Akaiko bamei jɔno; adi no bohali, bo basepejai mbi.

¹⁸ Bagɔmbejai molema mombi na milema minu pongono. Obwamni bosuma bato baya badi na ekɔmɛli emina.

¹⁹ Menga maMasiya oho Asia mabɛjɛkɛ no njɛbɛ. Akwila na Pilisila, na Denga disusu dia dititanaka a ndako ebu, babɛjɛkɛ no bou a kombe eKumu.

²⁰ Baninga basusu mɛnɛ babɛjɛkɛ no njɛbɛ. Sabɛjɛnɛni no bɛnɛ na njɛbɛ esɛnɔke.

²¹ Mbi Paulo nabɛjɛkɛ no njɛbɛ ye na ebɔ embi mɛnɛ.

²² Isa okina moto aditi na epaeli ai Kumu, yɛ alakejame. Yɛ Kumu adoe!

²³ Yɛ monganji moKumu osu Yesu Masiya modae na nu.

²⁴ Epaeli embi ai no basusu a tei eMasiya Yesu. Amen.