1 Bakolinto 14 - Nouveau Testament en Ngombe 1961

Epeeli eKɔpi na Epeeli eBotɔndɔ

¹ Bakeani milema minu a epaeli. Dani na posa a bipeeli bimwembo, bou oko epeeli ebotɔndɔ.

² Moto yona otɔndɔkɔ na kɔpi etongo atabalaka na bato, abalaka oko na Njambe. Bato bata-mocingeaka mojɔ bo abalaka ngando jibombamake.

³ Moto ko yona otɔndɔkɔ mwako, abalaka na bato bo abalehe, abakɔmejae, na agɔmbejae milema mibu.

⁴ Moto akabala na kɔpi etongo asapingejaka oko yo mɛnɛ pɛ; yona ko otɔndɔkɔ mwako, apingejaka Denga.

⁵ Mbi napalaka bo obaleni no basusu na kɔpi jitongo, bou oko bo otɔndɔeni mwako. Moto akabala na kɔpi jitongo, pɛ ko bojebeja Denga cina emina, atakɔmeja Denga. Oko boa yona otɔndɔkɔ mwako adi boso bonde.

⁶ Baninga, mbi nakadoa ai no a bobala na kɔpi jitongo, pɛ ko botɔndɔ na eleho, na bokoja, na boboloja, nadi bokɔmeja no soti?

⁷ Leka logo lodi na doi, o adi polongo na ebumba. Bomiti bɔteja ko doi dimina, odi bocingea ebomeli eleka lomina nda?

⁸ Doi limondule limiti da na bohu, odi bosɛlingoa a mojɔ mobila nda?

⁹ Mojɔ monu modi koko boa; okabalani mojɔ na kɔpi etongo yena edi bato pɛ bo’ka, pɛpɛ nongo moto odi bocingea mojɔ mobalaka no, mojɔ bo obalakani oko bibalabala pɛ.

¹⁰ Kɔpi jidi a ngondo jinɛnɛ mɛnɛ, na jisusu jidi na cina.

¹¹ Moto ko akabala na ekina kɔpi, na mbi pɛ bo’ka kɔpi emina, mbi nadi boda MoDɔkɔ a miso mamoto yona obalaka, na yo adi boda MoDɔkɔ a miso mambi.

¹² Oko boa, ino okamboani bipeeli bimwembo, dani oko na posa ebipeeli bia bidi bokɔmeja Denga na soti.

¹³ A mojɔ momina, moto yona obalaka na kɔpi etongo abwani bo’nga bo asɛ epeeli ebocingea bato cina.

¹⁴ Mojɔ bo naka’nga na kɔpi etongo, modi mwembo mombi mua mongaka, molema mombi motacingea eka.

¹⁵ Oko boa nâkɔ bo? Nadi bonga na mwembo, na nadi bonga na bocingea pongono. Nadi bo’mba njembo na mwembo, na nadi bo’mba njembo na bocingea pongono.

¹⁶ Okajongoa na mwembo, moto otongo yona oditi na epeeli ewɛ, atajeba nongo bojima Amen yana ajongoaka wɛ, mojɔ bo atacingeaka mojɔ mobalaka wɛ.

¹⁷ Wɛ mɛnɛ ojongoaka soti, yona otongo ko atapinga nongo a ejimeli ende.

¹⁸ Mbi nasakoaka Njambe mojɔ bo nanɔi no basusu na bɛtɛ ekɔpi.

¹⁹ Endele ko, na bobala bikenge koto domi na kɔpi etongo, na bikenge bitano na bocingea bombi mɛnɛ, napalaka gbo oko bo nabale na Denga oko na bikenge bitano na bocingea.

²⁰ Baninga, t’odaeni oko na bocingea bobɛngɛ. Dani na ekɔmɛli ebana bakɛkɛ a mojɔ mobobe; dani basuku ko a mojɔ mobocingea.

²¹ Mosɔnɔmɔ a Mibeko bo, Kumu abali bo, Nongo nakaloma bwɛnji bombi ai bato ba, Na bato bakɔpi jitongo, Isa na minɔkɔ miDɔkɔ, Batahokea mbi nongo mweka.

²² Oko boa, kɔpi jidi oko embete ai bato baya bajimakini, te nongo ai bato baejimeli. Etɔndɛli ko emwako moNjambe edi embete ai baya bajimaka, te nongo ai baya bajimakini.

²³ A mojɔ momina, okadani na botitana boDenga disusu, na bato basusu bakabala na kɔpi jitongo-tongo, bato batongo bakakwea, bato baya badi pɛ boji-ma, batalɛ bo odini na malale?

²⁴ Bato basusu ko bakatɔndɔ mwako, na moto otongo akakwea yona odi pɛ bojima isa pɛ bocingea, adi bosɔ eleho ehu basusu, na adi bosamba na bu basusu.

²⁵ Ngando jibombamake jimolema monde jidi boboloa a bohu, adi bokwa a boso bonde a bosakoa Njambe, na adi bojima bo Njambe adi a tei enu soti.

²⁶ Cina emina edi bo, baninga? Edi oko bo, omakatitanani, isa okina onu adi na eyembo, na otongo adi na eleho, isa na bokoja, isa na kɔpi, isa na bocingea, kɔni ngando jisusu a bopingeja ejimeli enu.

²⁷ A mojɔ mobobala na kɔpi etongo, bopele bo bato babale omɔciomɔci, bato babae isa basato, suka oko bato basato.

²⁸ Endele ko, isa moto yona okaka kɔpi jimina aditi, bopele bo badae oko bogo a botitana, na babale na milema mibu bɛnɛ, na Njambe.

²⁹ Batɔndɔi babae isa basato badi bobala, na bato batongo badi bohokea.

³⁰ Njambe ko akaboloja mokina mojɔ ai okina moto otongo yona odi ena, motɔndɔi yona obalaka adi boyɛyɔ bogo.

³¹ Obwanini botɔndɔ mwako no basusu, moto omɔci-omɔci; oko boa bato basusu badi bokoa, na badi bopinga a ejimeli ebu.

³² Miembo mibatɔndɔi misumaka batɔndɔi.

³³ Mojɔ bo Njambe adi Njambe obowi, te nongo Njambe oyikiyiki. Ekɔmɛli eMenga masusu mabato baejimeli

³⁴ edi bo bali badae bogo a makita maDenga. Baditi na kpaci ebobala, na Mibeko mibalaka bo badi boda na lisuma.

³⁵ Isa bapalaka bojeba mokina mojɔ, badi bohɔjɔ bami babu a ndako jibu bɛnɛ; mojɔ bo ebɔngiti na mwali bo abale a likita liDenga.

³⁶ Boni! Ebaeli eNjambe eboloi boso ai no? emei oko ai no pɛ?

³⁷ Isa okina onu alɛkɛ bo adi motɔndɔi, isa bo adi na bipeeli bimwembo, adi bocingea bo mijɔ misɔnei mbi no midi mobeko moKumu.

³⁸ Moto yona odi pɛ bojeba, yɛ adae oko a libumi.

³⁹ Oko boa baninga, bakeani milema minu a botɔndɔ mwako moNjambe. Pɛ bosiani bato a bobala na kɔpi jitongo.

⁴⁰ Kɔni ngando jisusu oko na bowi na bongɛbɛnɛ.