1 Bakolinto 12 - Nouveau Testament en Ngombe 1961

Bipeeli biMwembo

¹ Baninga, mbi napalaka bo ocingeeni mojɔ mobipeeli bimwembo.

² Yana adaka no bapakano, ojebakani bo ojimani bo bato balabojae no a bosakoa banjambe-babokosea baya badi oko bimimi.

³ A mojɔ momina, napalaka bo ocingeeni bo Mwembo moNjambe mokabaleja moto, moto omina atahɔnɔ bosinga Yesu. Na moto amiti da na Mwembo Mosɛnɔke, atahɔnɔ bobala bo Yesu adi Kumu.

⁴ Bipeeli bidi tungu-tungu, Mwembo ko modi oko momɔci pɛ.

⁵ Bilomu pongono bidi tungu-tungu, Kumu ko adi oko omɔci.

⁶ Na njea jibokɔ na elomu jidi tungu-tungu, Njambe ko yona okɔkɔ ngando jisusu ai bato basusu adi oko omɔci.

⁷ Moto na moto asɔkɔ epeeli ende eMwembo a bokɔmeja bato basusu.

⁸ Okina asɔkɔ ebaeli ebowɛi a Mwembo, na otongo asɔkɔ ebaeli eejebeli a Mwembo momina.

⁹ Okina asɔkɔ ejimeli a Mwembo, na otongo asɔkɔ epeeli ebosengoa a Mwembo momina.

¹⁰ Okina asɔkɔ epeeli a bokɔ mindumba, na otongo asɔkɔ epeeli a botɔndɔ mwako moNjambe. Okina asɔkɔ epeeli a bombetea miembo, na otongo asɔkɔ epeeli ekɔpi jitongo-tongo, na otongo koko a’kaka kɔpi jitongo-tongo.

¹¹ Mwembo ko mua mokɔkɔ ngando jisusu na okabaka ai moto na moto libondo lipalaka yo, modi oko Mwembo momɔci pɛ.

¹² Mokuku modi eka emɔci, binama ko bidi binɛnɛ. Na binama bisusu, nongo bikada binɛnɛ, bikɔkɔ oko mokuku momɔci. Modi oko boa na Masiya.

¹³ Mojɔ bo bobatisama so basusu a Mwembo momɔci bo bodae mokuku momɔci, isa BaYuda, isa BaEla, isa babuli, isa basɔmi; na bomwaka so basusu na Mwembo momɔci.

¹⁴ Mojɔ bo, mokuku moditi elembo emɔci pɛ; modi na bilembo binɛnɛ.

¹⁵ Nongo ebota ekabala bo, Mbi nacingiti na mokuku mojɔ bo naditi ebɔ, ebaeli emina etadongeja ebota a mokuku.

¹⁶ Na litoi likabala bo, Mbi nacingiti na mokuku mojɔ bo mbi naditi diso, ebaeli emina etadongeja litoi a mokuku.

¹⁷ Mokuku mosusu mokada oko diso pɛ, njoki edi boda jɔ? Mokuku mosusu mokada oko litoi pɛ, soo edi boda jɔ?

¹⁸ Njambe akolea binama bisusu a mokuku, emɔci-emɔci, o apalaka yo.

¹⁹ Binama bisusu bikada oko emɔci pɛ, mokuku modi boda jɔ?

²⁰ Oko boa binama bidi bmɛnɛ, mokuku ko oko omɔci.

²¹ Diso libwaniti bobala na ebɔ bo, Mbi nitajebaka wɛ. Na molo mobwaniti bobala na mako bo, Mbi nitaje-baka no.

²² Pɛpɛ nongo mweka; binama bimokuku bia bidi oko ngasa a miso mabato bibɔngejaka mokuku.

²³ Na bokumejaka binama bia bilɛkɛ so oko ngasa; na bia bidi bibombamake bidi na ekumu enɛnɛ, na bia bidi a bohu bibwani boa.

²⁴ Njambe abɔngeja mokuku mosusu, bo yena edi ngasa edae na ekumu.

²⁵ A mojɔ momina, mokuku mopeliti bobɔtɔ, na binama bisusu bikɔmejanaka.

²⁶ Enama emɔci ekapeka, bisusu bitongo bipekaka pongono.

²⁷ Ino odini mokuku moMasiya, odini binama binde, moto na moto oko enama.

²⁸ Njambe akolea bato a tei eDenga, boso oko babwɛnji, na ngɔngɔ jibu oko batɔndɔi. Bacingi na bu ngɔngɔ oko bakoja, na bato baya bakɔkɔ mindumba, bato basengo, bakɔmeja, bato babilomu, bato bakɔpi jinɛnɛ.

²⁹ Basusu badi babwɛnji? Basusu badi batɔndɔi? Basusu badi bakoja? Basusu bakɔkɔ mindumba?

³⁰ Basusu badi basengoi? Basusu babalaka na kɔpi jinɛnɛ? Basusu bakaka kɔpi jinɛnɛ?

³¹ Dukani oko bipeeli bia binɔi na bopele. Mbi ko nadi boneja no njea yena enɔi na bopele.