1 Bakolinto 11 - Nouveau Testament en Ngombe 1961

Likita liDenga

¹ Ikoanani na mbi o akoanaka mbi na Masiya.

² Nasakoaka no mojɔ bo olɛkɛni mbi bihole bisusu, na otabosakani ngando jikoja mbi no.

³ Endele ko, napalaka bo ocingeeni bo Masiya adi molo momoto; molo momwali modi oko muma’nde; na Njambe adi molo moMasiya.

⁴ Moto aka’nga, isa akatɔndɔ mwako na egbala a molo, asambojaka molo monde.

⁵ Mwali ko aka’nga, isa akatɔndɔ mwako, na apeliti eka a molo, asambojaka molo monde; ekɔmɛli ende ebwani na yena emwali, bamaka nwɛ swe jinde.

⁶ Mwali amiti lwa eka a molo, abwani bolena swe jinde. Na isa edi sɔni ai mwali a bolena isa a bonwɛ swe jinde, yɛ akunde molo monde.

⁷ Momi ko abwaniti bokunda molo monde cina bo yo adi elimo na ekumu eNjambe; mwali ko adi ekumu emomi.

⁸ Mojɔ bo momi aimana ai mwali; mwali ko amana ai momi.

⁹ Na momi aikɔmɔ a mojɔ momwali; mwali ko akɔmɔ a mojɔ motni.

¹⁰ A mojɔ momina, mwali abwani bolwa a molo embete ekpaci emomi, a mojɔ moba-bwɛnji.

¹¹ A tei eKumu ko, mwali t’adake yo buki; acingi oko na momi. Na momi pongono t’adake yo buki; acingi oko na mwali.

¹² Mwali amana ai momi; edɛye mwali abotaka momi; na leka losusu lohulaka ai Njambe.

¹³ Lɛni no bɛnɛ; Mwali aka’nga Njambe, pɛ bopeta lwa eka a molo, mojɔ momina mobɔngi?

¹⁴ Ekɔmɛli ebato basusu etakojaka no bo momi akada na swe jiyai, edi sɔni.

¹⁵ Mwali ko akada na swe jiyai, jidi oko ekumu ende. Mojɔ bo yo asɔ swe jimina a bosakunda.

¹⁶ Isa okina moto ko adi na kitɛ, so boditi na ekina ekɔmɛli etongo, isa Menga maNjambe.

Kola eKumu

¹⁷ Nadi na eleho a bopa no, na mtasakoa no; mojɔ bo matitana manu matakɔmejaka no; mabejaka no oko bobeja.

¹⁸ Mojɔ moboso oko mu; mbi na’kaka bo odini na misoo a matitana manu maDenga, na mbi najimaka mweka bo mojɔ momina modi soti.

¹⁹ Odini mabondo-mabondo soti; oko boa bato basoti badi boboloa a tei enu.

²⁰ Okatitanani, otayakani nongo Kola eKumu.

²¹ Mojɔ bo, yana ayakaka no, moto na moto ayakaka mia mande mɛnɛ; na okina adi ngasa na otongo alangoi.

²² Boni! opelitini ndako jinu bɛnɛ a mojɔ moboyaka na bomwaka? Osambojakani Denga diNjambe, na okejakani bato babokwali sɔni. Nâbala na nu bo? Nâsakoa no? Pɛpɛ nongo mweka.

²³ Mojɔ bo mbi nasɔ oko ai Kumu mua mopeja mbi no, bo Kumu Yesu atomba molɛmbɛ na bulu bokabama yo;

²⁴ ajongoa, abuka molɛmbɛ, na abala bo, Imu modi mokuku mombi mua mobukei a mojɔ monu. Kɔni boa bo osalɛjeni ai mbi.

²⁵ Ama bo sieja boyaka, yo ami tomba oko kɔpɔ pongono, na abala bo, Kɔpɔ ye edi Mokongo Moyene momakia mambi. Kɔni boa, bihole hisusu himwakaka no, bo osalɛjeni ai mbi.

²⁶ Mojɔ bo, bihole bisusu biyakaka no molɛmbɛ mu, na bimwakaka no kɔpɔ ye, otɔndɔkɔni mwako mobogwa boKumu oko a bodoa bonde koko.

²⁷ A mojɔ momina, moto akayaka molɛmbɛ mu, isa akamwaka kɔpɔ ye eKumu, na yo pɛ bobɔngɔ, adi na lindo jimokuku na jimakia maKumu.

²⁸ Yɛ moto asakokelejae yo mɛnɛ, asa ko ayake molɛmbɛ na amwake kɔpɔ.

²⁹ Mojɔ bo, moto akayaka na akamwaka, pɛ ko bombetea mokuku moKumu, ayakaka na amwakaka bodumba bonde mɛnɛ.

³⁰ A mojɔ momina, bakina banu banɛnɛ badi na bwɛmbu, na bapekaka, na bakma bahwɛkɛ hiɔ.

³¹ Bokasasambeja na soti, botasamba.

³² Endele ko, bokasamba, bodi bosɔ mokindo ai Kumu, bo botasamboa na ngondo.

³³ Oko boa baninga, okatitanani a mojɔ moboyaka, ambanani.

³⁴ Okina onu akada na nja, yɛ ayake a ndako ende mɛnɛ, bo botitana bonu botasamboa. Nadi bokolea ngando jitongo oko namaka doa mbi mɛnɛ.