1 Bakolinto 10 - Nouveau Testament en Ngombe 1961

¹ Baninga, mbi napalaka bo ojebeni bo batata basu basusu badaka a cina eeyembi, na bo basusu banɔ a njea emadiba-mamukwa.

² Ibo basusu babatisama a tei eeyembi, na a tei emadiba-mamukwa, ai Mose.

³ Ibo basusu bayaka dia dimɔci dimwembo,

⁴ na bamwaka ’bo basusu emwakeli emɔci emwembo. Mojɔ bo bamwaka a litai limwembo lia libasusaka, na litai limina lidaka oko Masiya.

⁵ Njambe ko aisepa na banɛnɛ babu, na bagwa a lisobe.

⁶ Ngando jimina jidi bileho ai so, bo botada na posa jibe o adaka bo.

⁷ T’odaeni oko basakoi babilimo o adaka bakina babu; mosɔnɔmɔ boa bo, Bato bada na mbondo a boyaka na bomwaka, Na bangɔ a bobua ngɔmɔ.

⁸ Bobwaniti boda na lisɔngi o adaka bakina babu, na bagwa Busa bomɔci bato koto licinda-na-jisato.

⁹ Bobwaniti bodingea Kumu o akɔ bakina babu, na njɔ babawa.

¹⁰ Bobwaniti boda na manungunungu o adaka bakma babu, na obwɛnji-obogwa abawa.

¹¹ Ngando jimina jidoa ai bato bamina o bileho; jisɔnɔmɔ ko a bokoja so baya badi a ehole ye esuka.

¹² A mojɔ momina, moto na moto yona odingaka bo adi mombilimake, abwani bonganjama bo asaka kwa.

¹³ Ino onɛkinini bomeka bua bonɔi ngulu enu. Njambe t’akputojake sako jinde, na yo atajima bo odaeni na bomeka bua bonɔi ngulu enu; mojɔ bo bomeka bokadoa ai no, yo adi bopa no njea ebohela, bo ohɔneni bomeka bomina.

Ekɔmɛli Ebato baMasiya

¹⁴ A mojɔ momina baninga, toma gbeseani bosakoa bobilimo.

¹⁵ Nabalaka na bato babowɛi. Lɛni no bɛnɛ mojɔ mobalaka mbi.

¹⁶ Kɔpɔ ejongoaka so, te bokatana bosu na makia maMasiya? Molɛmbɛ mobukaka so, te bokatana bosu na mokuku moMasiya?

¹⁷ Molɛmbɛ modi momɔci; oko boa, nongo adi so banɛnɛ, bodi oko mokuku momɔci, mojɔ bo so basusu bosɔkɔ libondo limolɛmbɛ momɔci.

¹⁸ Lɛni ekɔmɛli eYisalaele; baya bayakaka masiko malitumbu bakatani na litumbu.

¹⁹ Nitabalaka bo masiko mabilimo madi na cina, isa bo elimo edi eka.

²⁰ Pɛpɛ; cina ebalaka mbi edi bo bapakano bakapa masiko, bamapaka a miembo mibe, te nongo ai Njambe. Mbi nitapalaka bo okataneni na miembo mibe.

²¹ Obwanitini bomwaka kɔpɔ eKumu, na kɔpɔ emiembo mibe pongono. Obwanitini bosɔ libondo a mesa maKumu, na a mesa mamiembo mibe pongono.

²² Iso bodi bokeja Njambe likaka? Iso bomonɔi na ngulu?

²³ Nakapala, nabwani bokɔ ngando jisusu; ngando jisusu ko jibɔngiti. Nakapala, nabwani bokɔ ngando jisusu; ngando jisusu ko jitabɔngejaka.

²⁴ Moto abwaniti bokɔ ngando jipalaka yo mɛnɛ, oko ngando jia jikɔmejaka moto otongo.

²⁵ Yakani leka losusu longɛjɛkɛ bato a esanjo; pɛ bodani na mokakwano a mojɔ momina.

²⁶ Mojɔ bo ngondo esusu mɛnɛ edi ai Kumu, na leka losusu lua lodi a ngondo pongono.

²⁷ Moto yona oditi na ejimeli akabea no a boyaka, na okakɛni, yakani leka losusu loneaka yo no; pɛ bodani na mokakwano a mojɔ momina.

²⁸ Okina moto ko akabala na nu bo, Iye edi tito emasiko; t’oyakeni oko, mojɔ bo moto omina ajebejai wɛ. Mojɔ momina modi mojɔ momolema monde, te monu.

²⁹ Molema momoto otongo modi boneja mbi mua mobwani na mbi?

³⁰ Nakajongoa dia, na nakayaka, okina adi bolemoa na mbi mojɔ bo nalijongoaka?

³¹ Cina edi bo, okayakani isa okamwakani, isa okakɔni mokina mojɔ motongo, kɔni mijɔ misusu a bokumeja Njambe.

³² T’osakejaeni oko bato batongo libaku, isa BaYuda, isa BaEla, isa bato baDenga diNjambe.

³³ Mbi mɛnɛ nakengaka bosepeja bato basusu na ngando jisusu jikɔkɔ mbi, bo bahele; te nakɔke a mojɔ mombi mɛnɛ, oko a mojɔ mobato batongo banɛnɛ.