1 Bakolinto 1 - Nouveau Testament en Ngombe 1961

¹ Njɛbɛ esu Paulo yona obeama na bolulea boNjambe bo adae obwɛnji oYesu Masiya, na mwangwa’su Sosotene,

² a Denga diNjambe dia didi oho Kolinto, oko bahɛngɛmɛkɛ baMasiya Yesu, baya babeama bo badae basɛnɔke, na bato basusu baya bangaka a kombe eKumu Yesu Masiya a bisika na bisika. Adi Kumu obu na Kumu osu pongono.

³ Yɛ monganji na bowi boNjambe Sangwa ’su na Kumu Yesu Masiya bodae na nu.

Eleho a Mojɔ moBokatana

⁴ Mbi nasepaka na Njambe bihole bisusu a mojɔ momonganji mosɔ no a tei eMasiya Yesu.

⁵ Osɔni bojongoa bonɛnɛ mɛnɛ a tei ende, na bɛtɛ ebotɔndɔ, na ejebeli esusu pongono;

⁶ mojɔ bo Mwako moMasiya modaka mopipo a tei enu.

⁷ A mojɔ momina, pɛpɛ nongo ekina epeeli eMwembo ebwani botaka na nu. Ombakani oko bodoa boKumu osu Yesu Masiya.

⁸ Iyo adi bombihmeja no oko a suka mɛnɛ, bo otadani na mojɔ nongo momɔci, a busa boKumu osu Yesu Masiya.

⁹ Njambe atakputoja nongo sako ende. Edi oko yo, yona obea no a bokatana na Mwana’nde Yesu Masiya Kumu osu.

¹⁰ Baninga, mbi nangɔɔnɔkɔ no basusu a kombe eKumu osu Yesu Masiya bo odaeni na monɔkɔ momɔci. T’odaeni oko na miano a tei enu. Katanani ko na molema momɔci na mokano momɔci.

¹¹ Baninga, bato baKuloe bajebejai mbi bo odini na miano.

¹² Cina emina edi bo, ebaeli emoto na moto a tei enu edi bo, Mbi moto oPaulo, isa, Mbi moto oApolo, isa, Mbi moto oPɛtɛlo, isa, Mbi moto oMasiya.

¹³ Masiya adi na bobɔtɔ? Paulo agwea no a mole-mobokea? Obati-samani a kombe ePaulo?

¹⁴ Mbi nadi na sepi mojɔ bo nabatisa oko Kulusipo na Gayo pɛ, te nongo bato batongo a tei enu.

¹⁵ Oko boa moto abwaniti bobala bo abatisama a kombe embi

¹⁶ Nabatisa bato bandako eSɛtɛpana pongono; nitajeba isa nabatisa okina otongo.

¹⁷ Mojɔ bo Masiya ailoma mbi a bobatisa; aloma mbi a botɔndɔ Mwako Mopele, te na bɛtɛ ebobala, bo mole-mobokea moMasiya mosaka da eka engasa, pɛpɛ ngulu.

Bowɛi boNjambe na Bowɛi boBato

¹⁸ Mojɔ bo mwako momole-mobokea modi oko ebalabala ai bato baya badi a njea ebogwa; modi ngulu eNjambe ko ai so baya bahelaka.

¹⁹ Mosɔnɔmɔ bo, Mbi nâgegeaneja bowɛi bobato babowɛi; Nâgbogboaneja gatea ebato bagatea.

²⁰ Moto obowɛi adi jɔ? Mosɔni omikanda adi jɔ? Moto okitɛ ongondo ye adi jɔ? Njambe aigegeaneja bowɛi bongondo?

²¹ Mojɔ bo Njambe akolea na bowɛi bonde, bo ngondo etamojeba na bowɛi bongondo; na ajima bo ahelejae bato baya bajimaka, a mojɔ moyebe eetɔndɔli eMwako Mopele.

²² BaYuda bapalaka bo banɛe bimbete, na BaEla badukaka bowɛi.

²³ Iso ko botɔndɔkɔ Mwako moMasiya yona ogwa a mole-mobokea. Mojɔ momina modi oko libaku ai BaYuda, na yebe ai BaEla.

²⁴ Endele ko, Masiya adi ngulu eNjambe, na bowɛi boNjambe, ai bato baya babeama, isa BaYuda isa BaEla.

²⁵ Mojɔ bo, na bogegele boNjambe na bowɛi bobato, bogegele boNjambe bonɔi na bowɛi; na boyɛmbu boNjambe, na ngulu ebato, boyɛmbu boNjambe bonɔi na ngulu.

²⁶ Baninga, lɛni mbea enu bɛnɛ; bato babowɛi bongondo ye baditi banɛnɛ a tei enu, isa bato bakpaci, isa bakumu.

²⁷ Njambe ahɔkɔ bato bayebe bangondo, a bosamboja bato babowɛi. Njambe ahɔkɔ bato bayɛmbu bangondo, a bosamboja bato bapipo.

²⁸ Njambe ahɔkɔ bato bangasangasa baya bapeliti nongo ekumu a miso mabato, ee oko bato bangasa mɛnɛ, a bodumba ngando jia jidi edɛye.

²⁹ Oko boa, pɛpɛ nongo moto obwani bosakumeja a boso boNjambe.

³⁰ Bomɔ bonu a tei eMasiya Yesu bohulaka oko ai yo. Njambe akɔ bo Masiya Yesu adae bowɛi, na bodongo, na bosɛnɔ, na lisiko, a mojɔ mosu.

³¹ Mosɔnɔmɔ boa bo, Moto yona osakumejaka, yɛ asakumejae oko a mojɔ moKumu.