1 Batɛsalɔnike 4 - Nouveau Testament en Ngombe 1961

Moda Mobato baMasiya

¹ Mojɔ motongo baninga; okoanani na su ekɔmɛli yena ebwani na nu a bosepeja Njambe. Oko boa bongɔɔnɔkɔ no, na bolehaka no e dɛye a kombe eKumu Yesu, bo odaeni na ekɔmɛli emina. Okɔkɔni boa; endele ko, toma nɔjɔni mwɛngi momina.

² Ojebakani bokoja bosɔ so ai Kumu Yesu a bopa no.

³ Bolulea boNjambe bodi oko bo odaeni bahɛngɛmɛke ai yo, bo obɔtɔneni na edukeli,

⁴ bo moto na moto onu ajebe bosɔ mwali onde mɛnɛ na bosɛnɔ na lisuma,

⁵ te nongo na posa na lisɔngi o akɔkɔ bapakano baya batajebaka Njambe.

⁶ Moto abwaniti bokosea, isa bokɔ bobe ai mwangwa’nde na mojɔ momina. Mojɔ bo Njambe akundaka likundu a mojɔ mojibe jia jisusu, o aleha so no na bopipo ehele.

⁷ Njambe aibea so bo bodae na bosɔtɔ; abea so bo bodae na bosɛnɔ.

⁸ Oko boa, moto akasɛtoja ebaeli ye, atasɛtojaka moto; asɛtojaka oko Njambe yona opaka no Mwembo Mosɛnɔke monde.

⁹ Ebɔngiti bo nasɔnee no a mojɔ moepaeli ai baninga, mojɔ bo Njambe yo mɛnɛ akoja no bo opalaneni.

¹⁰ Na ekɔmɛli enu edi boa soti ai baninga basusu baya badi a Makedonia. Pɛ mojɔ; bole-haka no koko bo ohɛeni koko na epaeli bou mɛnɛ.

¹¹ Kinani mida minu midae na bombɔki. Lɛni mijɔ minu bɛnɛ. Kɔni bilomu na mɔmɔ manu, o aleha so no boso.

¹² Oko boa, bato bangondo badi bonɛ ekɔmɛli enu epele, na otadani nongo na taka.

Bodoa boMasiya

¹³ Baninga, botapalaka bo odaeni a libumi a mojɔ mobato baya bagwa. Obwanitini bobayea o akɔkɔ bato batongo baya bapeliti nongo njingo.

¹⁴ Mojɔ bo, bokajima bo Yesu agwa, na bo angɔ koko a bogwa, oko boa, Yesu akadoa, Njambe adi bohuleja baya bagwa, oko na Yesu.

¹⁵ Bobalaka na nu oko ekenge esɔ so ai Kumu; iso baya badi mɔ, baya bâdika ya oko a bodoa boKumu, botanɔ boso bobato baya bagwa.

¹⁶ Mojɔ bo, mosuku obabwɛnji baDiko âdumbea na kɔpi epipo, na mondule moNjambe môhweama. A ehole emina, Kumu yo mɛnɛ âdonga a Diko, âtita na bobekoa bonɛnɛ, na baya bagwa a tei eMasiya bângɔ boso.

¹⁷ Ngɔngɔ jibu, so baya bâdika mɔ, bôtombama na bu a ehole emɔci a tei ebiyembi, bo bolenoane Kumu oho ta busa, na bôda na Kumu boa oko na bosusu mɛnɛ.

¹⁸ A mojɔ momina, toma gɔmbejanani milema na bikenge bimina.