Yoano 3 - KILOMBENO KIHYA KIA NFUMWETU YESU KIDISITU

¹ Kubadi muntu a Bafadiseo, eshina die mbu Nekodema, mutontshi wa ba Yuda.

² Nyi winyi bafikile kwi Yesu bufuku, tamwamba’shi: Labi, tubeuku’shi, obe we mulambukishi mufiki kw’Efile Mukulu, mwanda takwi muntu euku kukita bino bitundwilo biokitshi’bi, anka su Efile Mukulu e n’e.

³ Yesu bamwalulwile’shi: Binyibinyi, binyibinyi biankulungula’shi: Su muntu takatandjibwa diakabidi, tanakamone bufumu bw’Efile Mukulu, ooo.

⁴ Nekodema namu’shi: Su muntu tadi mununu euku naminyi kutandjibwa diakabidi? Euku mwa kutwela mususa wa kabidi munda mwa nyin’e, atandjikwa’nyi su?

⁵ Yesu bālulwile’shi: Binyibinyi binyibinyi biankulungula’shi: Su muntu tamutandjibwe ku mema na ku Kikudi-E-Selelee, biabia tanakatwele mu bufumu bw’Efile Mukulu, ooo.

⁶ Akia akitandjibwa ku mbidi nyi mbidi, n’akia akitandjibwa ku Kikudi nyi Kikudi.

⁷ Tokanyanga bianakulungula’shi: Wodi n’ao ngwa kutandjibwa dia kabidi.

⁸ Luhahi aluhukā koso kwa lukyebela, ohushanga’nka kitumo ki’alo, anka tweuku kw’aluu na kw’alwende; ñanka biabia na boso abatandjibwa ku Kikudi-E-Selelee.

⁹ Nekodema bamwalulwile’shi: A yino myanda ayiuku kwikala na minyi?

¹⁰ Yesu bālulwile kwadi’shi: A ku’nyi we mulambukishi a Bena Isalele, twemwiukye yino myanda?

¹¹ Binyibinyi binyibinyi nakulungula’mi’shi: Kiatwibeukye ftank’akio kiatwakula, na kutemuna’kia tudi bamone; anwe tanwibakumine mitemo yetu, ooo.

¹² Su nenulungwile ya hanohansenga, tanwibekumine, su nenulungula ya mwiilu anukeikumina na minyi?

¹³ Takwi muntu bayile’mwa mwiilu, ank’E bakatukile’mwa mwiilu, nyi Mwan’a muntu na mwinyi E mwa mwiilu.

¹⁴ Mubaimikīle Mosesa nyoka mu kabāka, anka hamune Mwan’a Muntu wadi n’ao ngwa kukemikibwa’shi:

¹⁵ Ese akumina mwadi E, takalwika, ooo, anka akekale na muwa wa ikala-ika.

¹⁶ Mwanda Efile Mukulu bakishekishe kifulo na be ha nsenga’shi, E bahe Mwan’E umunenka eleka’shi, ese akumina mwadi E, takalwika, ooo, anka akatambule muwa wa ikalaika.

¹⁷ Mwanda Efile Mukulu tamutume Mwan’E hanohansenga mwadia kutshibila bahanohansenga, ooo, anka’shi, be ha nsenga bahashibwe mwadi E.

¹⁸ Yawa akumina hadi E tatshibilwa, ooo, anka yawa shī mukumine, tahwanga kutshibilwa, mwanda e tamukumine mwishina dia Mwan’eleka ’Efile Mukulu.

¹⁹ Uno nyi kitshibilo’shi, etata diba fikile hanohansenga, anka bantu mbasehele mufito he etata, mwanda bikitshino biabo bibadi bibubi.

²⁰ Mwanda boso abakitā bibubi abashik’weteta, sunga nkwishesha ku dinyi etata, tala bikitshino biabo biakasokolwa.

²¹ Anka yawa akitshi biabinyibinyi eshesha’nka kwitata’shi, bikinotshi bie bimwekyelele’shi, mbikitshibwe mw’Efile Mukulu.

²² Habahwile yino Yesu, na bana-be-ba-bukishi abafikila mu nsenga ya Yudea; bashalele n’abo kwanka abatshishange (bantu).

²³ Yoano namu badi abatshisha mu Enone, hehi na ku Saleme, mwanda’ko kubadi mema e bungi; abafikanga babatshishwa.

²⁴ Mwanda Yoano badi tabandjile kwelwa mu nshibo ya lukano.

²⁵ Biabia kubabukile mpaka kwi balondji ba Yoano na ba Yudea ha mwanda wa kwitosha.

²⁶ Biabia abafikile kwi Yoano, abamulungwile’shi: Labi, yawa badi n’obe adi’eshia dia Yodano, obwetulungwile, nyi winyi tabatshisha, na (bantu) boso abahwila kwadi.

²⁷ Yoano bālulwile’shi: Muntu teuku kwiatshila su nkinyi su nkinyi, anka su nkimuhebwe kwiilu.

²⁸ Anwe bana bene, nwi bu tumonyi kwandji bianakwile’shi: Nki Kidisitu, ooo, anka’ shi, nyi mubadishwe ku mpala kwe.

²⁹ Yawa e na muba mbwe nyi mubambi; ankakūku a mubambiaimana (hadi) na kumuhusha asehelā bikata, mwanda w’eyi dia mubambi: anka biabia namu kusangala kwande kubakumbashwa.

³⁰ E wadi n’ao ngwa kutumbwa ami namu anka kwihelesha.

³¹ Yawa āfiki kwiilu ’mukile boso; yawa a hano ha nsenga nga ha nsenga, ēsamba’nka bia ha nsenga; anka yawa mutukye mwiilu ’mukile boso.

³² Bia bamwene na bia bahushishe nyi’bi esamba bu kamonyi; Takwi muntu akumina bulungudi bwe.

³³ Yawa bakuminyine bulungudi bwe, batulu kikayikilo ki’e kia kwamba’shi: Efile Mukulu nga binyibinyi.

³⁴ Mwanda yawa batuminwe n’Efile Mukulu akula misambo y’Efile Mukulu, mwanda Efile Mukulu tamumuhimine Kikudi ha kumuha.

³⁵ Yawa afula Mwana kifulo, bamuhele namu bintu bioso mwiasa di’e.

³⁶ E akumina mwi Mwana e na muwa wa ikala-ika; yawa shīmukumine Mwana takamono muwa; anka nsungu y’Efile Mukulu yi n’e hadi.