Yoano 2 - KILOMBENO KIHYA KIA NFUMWETU YESU KIDISITU

¹ Hefuku dia kasatu kubadi ebambo mu Kana ka Ngadilea; na nyin’a Yesu badi kwanka.

² Biabia Yesu na bana-be-ba-bukishi babaitanyinwe kwibambo.

³ Na habalobele nfinyo, nyin’a Yesu tamwamba’shi: Tabe na nfinyo.

⁴ Yesu bamwalulwile’shi: Mwana mukashi, ami nyi n’obe mwanda kinyi? Nguba’nde tabandjile kufika.

⁵ Nyin’e balungwile bafubi’shi: Kioso kiakenulungula nukite’kio.

⁶ Kubadi kutulwe mabuka a mabwe asamombo, (abadi atulwe) bu mwiyile kihikwa kia kutoshwa kwa baYudue. Ebuka dimune dibaulanga bidingilo bibidi su mbisatu; n’angi namu anka hamune.

⁷ Yesu bebalungwile’shi; Ushai mabuka na mema. Biabia abo abeaushishe ndaa na ha kanwa.

⁸ Biabia bebalungwile’shi: Tahulai binobino, nwiyitwale kwi mulami wa bidibwa. Abo abeyitwele.

⁹ Mulami a bidibwa habatompile mema abālulukile ta nfinyo, tamushingule kwayibasokokyele, (anka benyi bafubi abakatahile mema nyi abadi beukye;) mulami a bidibwa baitamine mubambi;

¹⁰ bamulungwile’shi: Bantu boso ababandā kutula nfinyo yi buwa bukalabale, ahatomo bantu yibungi, biabia aya yi buwa bwi binyibiabia biayilondo, (ank’) obewemubikye yilumbulukye mpaa na binobino.

¹¹ Kino, nyi kibangilo kia bitundwilo bibakitshine Yesu mu Kana ka Ngadilea; nyi habafumbwile ntumbo ye: bana-be-ba-bukishi bamukumina.

¹² Habahwile uno mwanda balalele ku Kahanaume, e, na nyin’e, na bakwabo, na bana-be-ba-bukishi; tambashale maafuku e bungi mwanka.

¹³ Henyihaha (kidibwa) kia Paque kia ba Yuda kibadi hehi, biabia Yesu bakamine ku Yelusalema.

¹⁴ Basañene mu ntempelo abeulena ñombe na mikoko na tunku dimba; n’abashintushena nfalanga (namu) abadi bashale mwanka.

¹⁵ Habakitshine kihāba kia mushinga yihela, bebabingile boso mu ntempelo, na mikoko, na ñombe, bahalakeshe nfalanga ya bashintudi, bālamwine mesā’bo.

¹⁶ Bakwile kwi abadi abeulena tunkudimba’shi: Yishai bino bintu kungi; tanwikashanga (yino) nshibo ya Nshami bu nshibo ya busunga, ooo.

¹⁷ Biabia bana-be-ba-bukishi abatentekyeshe mwaudi ufundwe’shi: Kinsukunsuku kia nshibo yobe nyi kibanshidisha.

¹⁸ Henyihaha ba Yuda abamwalulwile’shi: A nkitundwilo kinyi kioketulesha, mwanda okitshi yino myanda?

¹⁹ Yesu bebālulwile’shi: Lwishai yino ntempelo, ami nankeyimika mu mafuku asatu.

²⁰ Henyihaha ba Yuda abamwambile’shi: Eee! Yino ntempelo yiabayibakile mu bihwa makumi ananka na bisamombo biayikihwa, obe okeyimikye mu mafuku asatu su?

²¹ Biosobi e bākwile ha mwanda wa ntempelo ya mbidi y’e.

²² Biabia habahwile kusanguka ku lufu, bana be ba bukishi abanangushene wawa wabākwile kwabadi; biabia abakuminyine kinyi kifundwe ki’Efile na mwanda wabākwile Yesu.

²³ Binyibiabia hatabadi mu Yelusalema henyi ha kia Paque ha (kidibwa kikata,) bebungi abakuminyine eshina die ha bamwene bitundwilo bia bakitshine.

²⁴ Anka Yesu tamwikuluhile e na mwinyi kwubadi, ooo, mwanda e badi mushingule boso.

²⁵ Tabadi na lukalo’shi, Muntu ahatule muntu, mwanda beukanga kibadi munda mwa bantu.