Yoano 19 - KILOMBENO KIHYA KIA NFUMWETU YESU KIDISITU

¹ Henyihaha Pilato batshile Yesu, amukuhila.

² Na bashidika abalukile kilonga kia milobo, bekitenteka ha mutwe h’E, bamuhwadika mutwelo wi lunkwindjinkwindji.

³ Tabakwile’shi: Nemuna’mwa, obe Nfumu a baYudea! biabia tabamukuhila mahi.

⁴ Binyibiabia Pilato batukile dimo, bebalungwile’shi: Talai! namufisha kwanudi, mwa nudia kwiukyila’shi: Nki mumone na mwanda.

⁵ Henyihaha Yesu batukile, mutwale kilongo kia milobo, na mutwelo wilunkwindjinkwindji. Pilato bebalungwile’shi: Talanga winyi muntu:

⁶ Binyibiabia habamumwene batshiite bakwidi bakata, na bamwanafita, tabēle musase’shi: Mwihei ha nkulusu! Mwihei ha nkulusu! Pilato bebalungwile’shi: Anwe Muatei, numwine ha nkulusu: mwanda’mi nkimumone winyi mwanda wadi mukite.

⁷ Bena yudea abamwalulwile’shi: Twi na kishila kietu, mwiile kishila kietu, ’muhwandjikile kufwa, mwanda E temuna bu Mwan’Efile Mukulu.

⁸ Biabia hahushishe Pilato wawa mwanda, bakambile kumona mō.

⁹ Batwelele dimo mwibalasa dia kitshibilo, behwishe Yesu’shi: Botukile kwi kunyi? Anka Yesu tamumwalula mwanda.

¹⁰ Binyibiabia Pilato bamwambile’shi: A! toñalula mwanda’be? tweuku’shi nyi na matalwa a nkwiha ha nkulusu, nyi na matalwa namu a kukuhosola.

¹¹ Yesu bamwalulwile’shi: Obe tweuku kwikala na matalwa kwandji ooo, anka su matalwa ngakuhebwe’kwa mwiilu: binyibiabia munfishe kodi e na mwanda ukile bubi.

¹² Henyihaha ha kiakia kihindji, mpā, Pilato badi akimbi mwa kumuhoswela: anka Bena Yudea abēle musase’shi: Su ohosola uno muntu, twe kūku a Kaifasa: ese ehwandjikisha bu nfumu atombokyela Kaifasa.

¹³ Binyibiabia habahushishe Pilato wawa mwanda, batushishe Yesu hashi, bashalelemu nkwasa ya kitshibilo, ha kihindji kibatemunwa bu Yilumbulwe na Mabwe, anka mwidimi dia Bena Hebelu nyi bu Ngabata.

¹⁴ Kilumbulwilo kia Kukila kwa Yeowa kuba fikile, na nguba badi hehi mitwe: e balungwile Bena Yudea’ shi: Talai Nfumwenu!

¹⁵ Anka’bo abanyishishe mayi abo’shi: Mukatushei! Mukatushei! numuihe ha nkulusu. Pilato bebehwishe’shi: Nyihē Nfumwenu su? Batshiite bakwidi bakata abamwalulwile’shi: Tatwi na mungi nfumu, anka Kesala.

¹⁶ Binyibiabia e bamutudile ku masa’bo mu kumuhudika ha mutshi uhingakane. Biabia abātshile Yesu, abayile n’E.

¹⁷ E batukile, mutwale nkulusu ye ku kihindji kibatemunwa bu kabāla, mwidimi dia Bena Hebelu kibatemunwa bu Ngologota:

¹⁸ Kwa bamuhudikile ha mutshi uhingakane, na bangi babidi n’E, au uku, au uku, Yesu hankatshi.

¹⁹ Biabia Pilato bafundjile kitemwino, bekitule ha nkulusu. Kinyi kifundjilo kibafundjile kibadi’shi: YESU A KU NASALETA NFUMU A BENA YUDEA.

²⁰ Be bungi ba Bena Yudea ababale kinyi kitemwino: mwanda wa mbalo yabayihayile Yesu yibadi hehi ku kibalo: kifundwe kibafundjile mwidimi dia ba-Yudea na dia bu’Ngidiki, na ba-Loma.

²¹ Henyihaha batshiite bakwidi ba Bena Yudea abalungwile Pilato’shi: Tofundanga’shi: Nfumu a Bena Yudea, ooo; anka funda’shi: na mwinyi bakwile’shi: Nyi Nfumu a Bena Yudea.

²² Pilato bālulwile’shi: Kinafundjile, tampwile kwiyifunda.

²³ Binyibiabia, bashidika habahwile kuhudika Yesu ha nkulusu, abātshile bifwalwa biE, bweabishena binanka, mushidika kie, mushidika kie, na mutwelo namu wa mushi, ha mbidi; uno mutwelo tauba di na mutelo, ubalukile ulungakane ushima.

²⁴ Henyihaha abelungushena’shi: Tatwiusananga twiutē bubale, su auke kala wanyi: biabia bibakumbeshe bibafundjilwe’shi: Ba beabishena bifwalwa biande, mutwelo wande abeutēle bu bale. Binyibiabia basalai abakitshine bino bintu.

²⁵ Biabia nyin’E na mukwabo na nyin’E, na Madia mpiana a Keleohasa, na Madia Mandalene, abadi bemane hehi ku nkulusu.

²⁶ Henyihaha Yesu habamwene nyin’E na winyi mwan’a-bukishi abadi n’e kifulo, badi bemane hahi, balungwile nyin’E, eshi: A! mwana mukashi tala mwan’obe ngiu!

²⁷ Biabia balungwile winyi mwan’a-bukishi’shi: Tala nyin’obe! ngiu. Binyibiabia, ha dianka diadi’efuku winyi mwan’a-bukishi bamwatshile, ’enda n’e kwe.

²⁸ Kumongo kwa yino, Yesu hakwiuka’shi, bintu bioso bibakitshinwe’shi, kifundwe kikumbanyinyine, bakwile’shi: Nyi na nyota.

²⁹ Ako kubatulwe kintu kiule na nfinyo yisase, abasabikile mushulambwa mu nfinyo yisase, beutule ha mutshi wa hisope, abamutambikileo ku kanwa kwe.

³⁰ Yesu habatambwile nfinyo yisase, bambile’shi: Kubahu. Henyihaha banyekyele mutwe we, batūle eshimba.

³¹ Biabia Bena Yuda ha mwanda wa Kilumbulwilo kia (pashika) tābadi abakyebe bitanda kwikala ha nkulusu h’efuku dia Sabado (mwanda diadia efuku dia Sabado dibadi efuku dikata) abatekyele Pilato’shi, mikolo yabo yikatshimunwe, na kubambula bitanda.

³² Henyihaha basalai abafikile, abatshimwine mikolo ya (muntu) a kwibedi, na ya mungi badi mubambibwe n’e.

³³ Anka habafikile kwi Yesu, abamumwene tafwile kalā, tambamutshimune mikolo ye.

³⁴ Anka musalai umune bamutubwile mulumbu mu lubafu lwe, ka hindji n’āka mubatukile mase na mema.

³⁵ Yawa beuhetekyelwe nyi betemwine bu kamonyi, na kutemuka kwe nkwa binyibinyi. E namu euku’shi: Binākula nyi mbinyibinyi bianudia kukumina.

³⁶ Mwanda bino bintu bibakitshinwe mwanda wa kwamba’shi, kufundjibwe kikumbashwe’shi: Mufufwa we, taukatshimunwa.

³⁷ Na kingi kifundwe namu kibakwile’shi: Winyi abatahile abakamutala.

³⁸ Kunyima kwa bino, Yosefe mwina Adimatea, mwan’a Yesu a bukishi ku bufiebufie, ha mwanda wa kutshina Bena Yuda moo, bakatekyele Pilato’shi; Nankyebe kuata kitanda kia Yesu. Binyibiabia Pilato bakuminyine. Henyihaha e bafikile, bātshile kitanda kia Yesu.

³⁹ Nikodema namu bafikile, e, nyi bafikile kwi Yesu kwibedi n’ebedi bufuku, mutwale bisangakanwe biabitukā ku mitshi, binalashi, bi bushito bwa kilo su mbu makumi ananka.

⁴⁰ Henyihaha babātshile kitanda kia Yesu, abekihombele mu bilamba bia linene na (bintu) bia malashi hamune, nyi mulombeno kihikwa kia Bena Yuda ha kushīka (bantu).

⁴¹ Talangai, mu yaya mbalo yibā di mubambilwe efuba dibadi kwanka, na mu diny’efuba mu badi nyenyi, yishī abandjile kushika muntu, sunga ngumune.

⁴² Amo nyi mwabashīkile Yesu mwanda nyenyi yibadi hehi, na ha mwanda dibadi efuku dia Kilumbulwilo (kia Pa shika).