Yoano 16 - KILOMBENO KIHYA KIA NFUMWETU YESU KIDISITU

¹ Yino myanda nenulungwile’shi, tala nwakakokoshwa.

² Abakenutusha mu bitumbwilo: binyibinyi kihindji akikafiki, kia yawa akwinwiha akatentekesha’shi; Nafubu mufubo w’Efile Mukulu.

³ Abakenukitshi yino myanda, ha mwanda tambeukye Yaiya, sunga nami.

⁴ Anka yino myanda nenulungwile’shi, hakafiki diadi’efuku anukatentekesha binenulungwile kala. Nkimwinulungule yino myanda ku mbangilo, mwanda nadi nenu.

⁵ Anka binobino nēnde kwi yawa bantumine, na takwiumune’nu angihusha’shi: Wende kunyi?

⁶ Anka ha mwanda nenulungwile yino myanda, kwinyongola kubaulu mashimba enu.

⁷ Sunga biabia, nenulungula bia binyibinyi: Mbinuhwandjikile’mi kwenda, mwanda su tanyende, Musambi takafiki kwanudi; anka su nēnde, nankamutumu kwanudi.

⁸ Biabia hakafiki akahonesha ba-hanoha-nsenga, ha mwanda wa bubi bwabo, na ha mwanda wa kululama na ha wa kutshiba kimu.

⁹ Ha mwanda wa bubi, mwanda tabankumine.

¹⁰ Ha mwanda wa kululama, mwanda nende kwi Yaiya, tanu’mono dimo.

¹¹ Ha mwanda wa kutshiba kimu, mwanda nfumu a ha yino nsenga batshibilwe kimu.

¹² Nyi na yingi myanda yi bungi kwinulungula, anka’nwe tanwiuku kwiyihushe binobino.

¹³ Anka’hafiki Kikudi-E-Selelee kia binyibinyi, akenulombola mu bioso bia binyibinyi: mwanda E takakula bie na mwinyi, ooo; anka bioso biakahusha, nyi biakakula: akenulesha myanda ayikafiki.

¹⁴ Akantumbisha: mwanda akatambula biande, akenulungula’bio.

¹⁵ Bintu bioso bi na Yaiya, mbiande: nyihenyiha mwanda unenulungwile’shi, akata bi kwandji akenulungula’bio.

¹⁶ Habashala kihindji kihela, tanuka’mono: na kingi kihindji kihela anuka’mono, mwanda nende kwi Yaiya.

¹⁷ Henyihaha (bamo) ba-bana-be-ba-bukishi, babeihushene’shi: Au mwanda kinyi, betwambashi: Kihindji kihela tanuka’mono; na kingi kihindji kihela anuka’ mono: na dimonyi’shi: Mwanda nende kwi Yaiya.

¹⁸ Biabia, abadi abakula, babambile’shi: Au mwanda kinyi E bakwile’shi: Kihindji kihela? Atwe tatwiuku biākula.

¹⁹ Binyibiabia, Yesu beukile’shi; abakyebe kuñihusha, bebehwishe’shi: Anwiihushena ha mwanda wa uno unalungwile’shi: Kihindji kihela n’anwe tanuka’mono; na kingi kihindji kihela anuka’mono?

²⁰ Binyibinyi, binyibinyi, nenulungula’shi: Anukadidi mpolo na lukalo, anka be-ha-nsenga abakasehela, n’anwe anukekala na bishiotshi, anka bishiotshi bienu abikāluluka muloo.

²¹ Anka amwikela mwana mukashi na mitanyo ya kutanda, e na kwinyongola, mwanda kihindji kie kibahu kufika; anka bahu kutanda mwana tatentakyesha dimo mitanyo, ha mwanda wa kusehela’shi, muntu batandjibwa hano-ha-nsenga.

²² N’anwe namu binobino nwi na kwinyongola, anka nankenumono dimo, n’eshimba dienu adikasehela, na muntu takenunyengye muloo wenu.

²³ Biabia, mu diadi’efuku tanukangihusha su nkinyi, su nkinyi. Binyibinyi, binyibinyi, bia nyinwambashi: Kioso kia nukatekye Yaiya mwishina diande akenuha kianka.

²⁴ Kwibedi tanubadi anutekye kintu mwishina diande; tekai, anukatambula’shi, muloo wenu aukakumbashwa.

²⁵ Nenulungwile yino myanda mu nkindji: anka efuku adikafiki dia shiakenulungula dimonyi mu nkindji, anka’nukanyiukila mwanda wa Yaiya.

²⁶ Mu diadi ’efuku anukatekye mwishina diande: n’ami tanyinwambashi nankenutekyela kwi Yaiya.

²⁷ Mwanda Yaiya na mwinyi mwinufule kifulo, ha mwanda’nwe nubadi banfule’mi kifulo, nubakuminyine’ shi, nantukile kw’Efile Mukulu.

²⁸ Nantukile kwi Yaiya nafika hano-ha-senga; dimonyi nankatuka ha nsenga, nende kwi Yaiya.

²⁹ Bana-be-ba-bukishi abamulungwile’ shi: Talangai! binobino bohatula biya twemwakule mu nkindji.

³⁰ Binobino, atwiuku binyibinyi’shi Obe weukubintu bioso, twe na kiokyebe kwihusha muntu ooo: nyi ha uno atukumina’shi, botukile kw’Efile Mukulu.

³¹ Yesu bebehwishe’shi: Binobino anukumina su?

³² Talangai! efuku adikafiki, na binobino dibahu kufika’shi, anukekala bahalakashwe, au ukwa, au ukwa, anukandekye buhenka, anka nki buhenka, mwanda Yaiya E n’ami.

³³ Nenulungwile bino bintu ami’shi, nwikale na kufukama mwandji mi. Hano-ha-nsenga anukamono bishiotshi bia malwa: anka nyishei mashimba enu; Ami nahu kuobesha ba-hanoha-nsenga.