Yoano 14 - KILOMBENO KIHYA KIA NFUMWETU YESU KIDISITU

¹ Tanwikalanga na mashimba enyengye, ooo, anukumina Ei’ile Mukulu, kuminai mwimi namu.

² Mu nshibo ya Yaiya mwi bia kubombela bi bungi: su amwikalanga biabia nadia kwinulungula. Nēnde kwinulumbulwila mbalo yenu.

³ Biabia su nēnde kwinulumbulwila mbalo yenu, nankaluka dimonyi kwinutambula kwandji, eshi, kwandji mwikale n’anwe anukekala kwanka namu.

⁴ Anwiuku kwa nyende, n’eshinda namu anwidiuku.

⁵ Tomase bamulungwile’shi: A! Nfumwami, tatwiuku koende, atwiuku eshinda na minyi?

⁶ Yesu bamwalulwile’shi: Ami uno nyi dinyi eshinda, na biabinyibinyi na muwa: takwi sungangumune akwifikila kwi Yaiya anka kwimi.

⁷ Su anunuku’mi, biabia nubeuku Yaiya namu: binobino mpā anumwiuku, nubahu kumumona.

⁸ Biabia Fidiha bamulungwile’shi, A Nfumwami etuleshe winyi Shobe, biabia kitulombene.

⁹ Yesu bamwihwishe’ shi: Kihindji kikata kinashala nenu bino’ki, biosobi tanwibanukye obe Fidiha? akunmona’mi bahu kumona Yaiya; biabia obe tombashi: Etuleshe Shobe?

¹⁰ Twemukumine ’mi biandji munda mwa Yaiya, Yaiya namu munda mwande? myanda yoso yia nyisamba nenu, tanyisambila ami na mwinyi, anka Yaiya E munda mwande, nyiafuba yino mifubo.

¹¹ Nkuminei biandji munda wa Yaiya, n’E munda mwande namu, su tanwibakite biabia, nunkuminyine ha mwanda wa bikitshino bino.

¹² Binyibinyi, binyibinyi, biañakula nenu’ shi: Akankumina, biabia yino mifubo yiankitshi, akeyikitshi namu; na yingi yikile yino bukata, akeikitshi mwanda nēnde kwi Yaiya.

¹³ Anka kioso kianukatekye mwishina diande, su nkinyi, su nkinyi, nankenukitshina kianka’shi, Yaiya atumbishwe mu Mwana.

¹⁴ Kintu kioso kianukatekye mwishina diande nankenukitshina.

¹⁵ Su nwi nami kifule nukite milangilo yande.

¹⁶ N’ami nankatekye Yaiya n’E akenuha mungi Musambi’shi akekala nenu ikala-ika.

¹⁷ E nyi Kikudi-E-Selele kia binyibinyi: abashiabeuku kwi ba-hano-ha-nsenga kumutambula, mwanda wa kukutwa kumumona, sunga kumwiuka; anka’nwe anumwiuku; mwanda ashala nenu, akekala munda mwenu.

¹⁸ Tanyinulekye bu bana a nshiuye, nankaluka kwanudi.

¹⁹ Anka kahindji kahela, ba-ha-nsenga, taba’mono kabidi, anka’nwe anu’mono; mwanda’mi nyi na muwa, anwe namu anukekala nao.

²⁰ Mu dia di’efuku anukeuku’ shi: Ami nyi munda mwa Yaiya, n’anwe nwi munda mwande, nami namu nyi munda mwenu.

²¹ Awa e na milangilo yande kwete kwiyilama, ngyawa e nami kifulo, awa e nami kifulo, Yaiya akamufulu, nami nankamufulu namu, nankasokokela kwadi.

²² Yudasa (ta Isakadioto, ooo) bamwihwishe’shi: A! Mwanana, a nkinyi obe okasokokela kwatudi, tokasokokela kwi ba-hano-ha-nsenga.

²³ Yesu bamwalulwile’shi: Su muntu e nami kifulo, alame mīsambo yande, na yaiya ande akekala n’e kifulo, atufikye kwadi, twikale n’e.

²⁴ Yawa te nami kifulo tākitshi myanda yande; na mwanda wanuhusha tangwande, ooo, anka ngwa Yaiya bantumine.

²⁵ Nahu kwinulungula yino myanda ha nki nenu.

²⁶ Anka Musambi nyi Kikudi-E-Selelee, akatumu Yaiya mwishina diande, E akenulambukisha bintu bioso, na kwinutentekesha bioso binenulungula’bi.

²⁷ Nenulekela kufukama, kufukama kwande nenuha kwanka: tanyinuha bu ba-hano-ha-nsenga abenuha. Tanwikalanga na mashimba enyengye, sunga kukwatwa na mō.

²⁸ Nubahu kuhusha mwanda nenulungula’shi, bia nyende bino nankaluka kwanudi. Su anwikalanga nami kifulo, nubadi akwikala na muloo, ha mwanda nakula’shi: Nende kwi Yaiya mwanda Yaiya munkile’mi bukata.

²⁹ Binobino nahu kwinulungula uno haushiabandjile kufika’shi; haukafiki nukakumina.

³⁰ Bino takianyinulungula myanda yi bungi, ooo; mwanda sha matalwa a hano-ha-nsenga afiki, anka mwandji tamwikie, sunga kimune.

³¹ Anka nakitshi mwanda ubandaile Yaiya, mwanda ba-hano-ha-nsenga beukye’shi, Ami nyi na Yaiya kifulo. Ebwei, twendei.