Yoano 13 - KILOMBENO KIHYA KIA NFUMWETU YESU KIDISITU

¹ Biabia habadi Bidibwa bia Kukila kwa Yeowa takwafikile, Yesu beukile’shi: kihindji kie kibafiki kwandji a kukatuka hano-ha-nsenga, kwenda kwi Yaiya, E badi na kifulo na bantu b’E ba hano-ha-nsenga, E nabo kifulo mpa na kunfudilo.

² Binyibiabia, habaditabadi biakudia, Satana bahwilekutwesha Yudasa Isakadiota a Shimono’shi, amusokole ku bangi.

³ Yesu beukile’shi, Shye bamuhele bintu bioso mu mase E, n’E namu badi bafikile kw’Efile Mukulu, akaluka kw’Efile Mukulu namu.

⁴ Bebwele ku bidibwa, babikile bifwalwa bie, batshile kitambala, Ehombela.

⁵ Biabia bēle mema mwilonga, abanga kusula ku ngwa ya bana be-ba-bukishi, na kwiyihampula, na kitambala kibadi mwihombele ha mbidi h’E.

⁶ Binyibiabia bafikile kwi Shimona Petelo, Petelo bamwambile’shi, A Nfumwami, osule’mi ku ngwa su?

⁷ Yesu bamwalulwile’shi: Obe tweuku kiankitshi binobino, anka okeuku kumongo.

⁸ Petelo bamulungwile’shi; Tonsulanga ku ngwayande, sunga mpahelahela. Yesu bamwalulwile’shi: Su nkimukusule, biabia twe nami buumune.

⁹ Shimona Petelo bamwalulwile’shi: A Nfumwami, tosulanga’nka ku ngwa yande, ooo, sulengye ku maboko na ku mutwe namu.

¹⁰ Yesu bamulungwile’shi: Muntu muhwe kwitumpa tenakiakyebe’nyi, anka kusula ku ngwa, e nyi mutoke oso, n’anwe nwibatoke, anka tanwibatoke’nwe boso.

¹¹ Mwanda beukile na’wa akamusokola, nyi ha uno mwanda ubakudile’shi; Tanwibatoke’nwe boso.

¹² Biabia, habahwile kwibasula ku ngwa, bātshile bifwalwa bi’E, bashalele ku mesa dimo, tebalungula’shi: Anwiuku kinenukitshina bino su?

¹³ Anuntemuna’shi; Mulambukishi na Nfumu: anwamba bibuwa, mwanda’mi nyi anka biabia.

¹⁴ Binyibiabia, su’mi Nfumwenu na Mulambukishi enu nenusula ku ngwa yenu, nkilombane ’nwe kwisudishena ku ngwa yenu.

¹⁵ Mwanda nenuhele kihwandikisho mwanudi a kwikitene bu binenukitshina.

¹⁶ Binyibinyi, binyibinyi, nenwambashi; Mpika tamukile nfumu’we, sunga mutumibwe tamukile bantumine.

¹⁷ Su nubeuku bino bintu, anukekala na mwabi su anwibikitshi.

¹⁸ Tanyinwamba ’nweboso neuku banasangwile: anka nyi hakwambashi kilomba she’kia kibafundjilwe’shi: Adi biakudia n’ami etuhishena n’ami.

¹⁹ Binobino, nenulungula mwanda ushiabandjile kufika, eshi, haukafiki anukakumina’shi, Nyi E.

²⁰ Binyibinyi, binyibinyi, nenulungula’shi, Awa akumina ese antumu, ankumina’mi, n’e ankumina’mi bakumina na bantumine.

²¹ Habahwile Yesu kwakula biabia, eshimba die dibenyengyele takula’shi: Binyibinyi, binyibinyi, nenwa mbashi, umune enu akansokola.

²² Biabia, bana be-ba bukishi tabetalena, babadi abealashena’shi, Au winyiu na nyi?

²³ Kubadi mwan’a bukishi umune badi mufudibwe na Yesu, badi mweme ha kiadi kia Yesu.

²⁴ Binyibiabia, Shimona Petelo bamufikile meso’shi, mwihush’E winyi, ’ākula.

²⁵ Biabia awa badi mweme ha kiadi kia Yesu ba mwihwishe’shi: A! Nfumu, a winyiu nanyi?

²⁶ Yesu bamwalulwile’shi: A nkaha kihese kisabikye, n’e yawa. Biabia habasabikile kihese bekihele Yudasa Isakadiota a Shimona.

²⁷ Habatambwile kihese Satana batwele munda mwe. Biabia Yesu bakwile’shi: Kiokyebe kukita, kitekio bukidi.

²⁸ Abo babadi bashale ku mesa, takwiumun’abo bashingulwile mubamulungwidile uno mwanda.

²⁹ Mwanda Yudasa badi mutwale’dimba, bangi babatentekyeshe Yesu amwambashe kaule biatukyebe bia ha kidilo, su nkuha balanda kintu.

³⁰ Biabia e habatambwile kihese, batukile lubilo, bufuku namu bubayile.

³¹ Binyibiabia, habatukile Yesu’shi: Binobino Mwan’a muntu batumbishibwa, Efile Mukulu batumbishwa namu mwadi E.

³² Su Efile Mukulu batumbishwa mwadi E, Efile Mukulu akamutumbisha mwadi E na mwinyi, aka mutumbisha binobino.

³³ Anwe bakinga kubashala’nka kahindji kahela nyi nenu, Anukankimbe: anka binalungwile ba-Yudea’shi: Kwa nyende, tanwiuku kufika; n’anwe namu nenwamba’nka biabia.

³⁴ Mulangilo uhia nenuha’shi: Nwifulene kifulo anwe bana bene; bu’mi nekalanga nenu kifule nwifulene kifulo anwe bana bene.

³⁵ Biabia nyi habakenwiukila bu bana-bande-ba-bukishi, su nwi na kifulo anwe bana bene.

³⁶ Shimona Petelo bamwihwishe’shi: Wende kwi kunyi Mwanana? Yesu bamwalulwile’shi: Kwa nyende, obe tweuku kundonda binobino, anka okandondo kunyima.

³⁷ Anka Petelo’shi: Nkinyi kiashia nkulondela binobino? nankakusumbwila muwa wande.

³⁸ Yesu bamwalulwile’shi: Muwa wobe osumbile’mi su? Binyibinyi, binyibinyi nakulungula’shi: Etombele tadiabandjile kudila, okantunu kasata.