Yoano 12 - KILOMBENO KIHYA KIA NFUMWETU YESU KIDISITU

¹ Henyihaha, Yesu bafikile ku Betani, bēkyele mafuku asamombo kwibedi kwa Pashika, kubadi Lasalasa, winyi bafwile, ababushishe ku lufu.

² Binyibiabia, abamutekesha bidibwa bia kiolwa; Mata badi ebatambika, anka Lasalasa badi umun’abo abashele ku mesa n’E.

³ Henyihaha Madia bātshile kihindji kia kilo kia mwimu wa mahembwe wi mūlo wi bukoho wimoo, bashingile ku ngwa ya Yesu nao, bahampule ngwa ye na nyene ye; na nshibo yihaule ndā n’eshiko dia mwimu.

⁴ Anka umune a bana-be-ba-bukishi, Yudasa Isakadiote mwan’a Shimona, winyi badi akyebe kumukokosha, bakwile’shi:

⁵ A nkinyi kiabashibahanyine uno mwimu ku nkama isatu ya ndenadi ya mfalanga, beyiabila balanda?

⁶ Biosobi bibakwile bino, ta mwanda e badi na kanya kwi balanda, ooo: anka ha mwanda badi ngifi, enyi badi n’edimba, mutwale bibadi bitule mwanka.

⁷ Biabia Yesu bakwile’shi: Mulekei: badi aulama mpā na kwifuku dia kushika kwanda.

⁸ Mwanda’nwe nwi na balanda n’enu mafuku oso; anka’mi tanwi n’ami mafuku oso.

⁹ Binyibiabia be bungi ba ku Yudea abashingulwile’shi E ngiu eku: tambafikile anka ha mwanda wa Yesu, nyi mwanda babayidile mwabadi akumwena Lasalasa, ababushishe ku lufu.

¹⁰ Anka batshiite bakwidi bakata babadi abadi lukuku mwa kwihaila winyi Lasalasa namu.

¹¹ Nyi ha mwanda we be bungi ba Bena Yudea abakatukile, abakumina Yesu.

¹² H’efuku dia maloba bantu be bungi babadi abafiki ku Bidibwa, habahushishe’shi, Yesu afiki ku Yelusalema,

¹³ Abātshile malala a mabo, abayile mu kumutundaisha, bēnda, abasamanga shi: Hosana: Mwabi kwi Nfumu a Isalele afiki mwishina dia Yeowa.

¹⁴ Biabia Yesu habamwene mwan’a mpunda, bayinamine hanka, nwa kibafundjibwe’shi:

¹⁵ Totshinanga mō obe mwana mukashi a Siona: Tala: Nfumwobe afiki mwiname ha mwan’a mpunda.

¹⁶ Bana be-ba-bukishi tababadi beukye yino myanda kwibedi: anka habadi Yesu batumbishibwa, henyihaha nyi hababatentekeshe, na bia binyi bibamufundjilwe na bia babamukitshine.

¹⁷ Binyibiabia, baba bantu babadi n’E, habetanyine Lasalasa ’mashama, na kumubusha ku lufu, abahatulwile.

¹⁸ Nyi habafikīle bantu namu kafumankana n’E: mwanda babahushishe mubakitshinyine kino kilengeleshe.

¹⁹ Binyibiabia baFadiseo abelungushenene’shi: Talangai biosobi utukulakala bisumanga, talai ba-hano-ha-nsenga babahu kumulonda.

²⁰ Kubadi bangi ba baNgidiki babadi munkatshi mwa babafikile mu kulangwila ku Bidibwa bia ku’Sehela.

²¹ Binyibiabia, abo abafikile kwi Fidiho, mwina Beteseda a Ngadile; abamwihwishe’shi: A! Mwanana, atukyebe kumona Yesu.

²² Fidiho bayile balungula Andeleo; Andeleo namu na Fidiho abalungula Yesu.

²³ Yesu babalulwile’shi: Kihindji kibafiki, kia Mwan’a muntu atumbishibwe.

²⁴ Binyibinyi, binyibinyi, nenwambashi: Su emuma dia nganu dibahono mu nsenga, tandifwe, biabia adikala buhenka; anka su dibafu, adiha ebungi.

²⁵ Awa e na kifulo na muwa we na mwinyi, au ukamushimina; ank’e ashikwa muwa we wa hano-hansenga, akekala nao, mpa na kwikalaika.

²⁶ Su muntu anuma, andonde; kwandji mwikale, mufubi ande namu akekala kwanka: su muntu ānumā, Shami akamunemeka.

²⁷ Binobino eshimba diande dibenyengye; akiakyebe’nyi kwakula nkinyi? nakula’shi: Obe Yaiya ompashe ku kino kihindji: anka ha uno mwanda mpā nafikila ku kino kihindji.

²⁸ Yaiya tumbisha eshina diobe. Henyihaha kubatukile eyi mwiilu’shi: Nahu kwiditumbisha, nankeditumbisha dimo.

²⁹ Binyibiabia bantu babadi hēmane hehi, babedihushishe, abakwile’shi, Nyi mukungulo wa mpeshi; bangi’shi: Mwikeilu bakwile n’E.

³⁰ Yesu balulwile’shi: Dino eyi tandjifiki ha mwanda wande, anka dibafiki ha mwanda wenu.

³¹ Binobino nkitshibilo kia hano-ha-nsenga: binobino mwinyi nfumu a hano-ha-nsenga akabingwa.

³² N’ami, su naimikwa ku nsenga nankefubusha (bantu) boso kwandjimi.

³³ Bakwile uno’shi mu kwiukisha lwinyi lufu lwakyebe kufwa.

³⁴ Bantu abamwalulwile’she: Atwe tubahushishe mu mukanda wa milangilo’shi: Kidisitu akekala-ika: A biabia nkinyi kiokwila’shi: Mwan’a muntu anka kwīmikwa? Winyi Mwan’a muntu nanyi?

³⁵ Biabia Yesu bebalungwile’shi: Kubashala’anka kahindji kahela ka nukekala n’etata. Tembai hanuki n’etata, tala, mufito wakafika hanudiha: mwanda atembe mufito, teuku mwa ende.

³⁶ Hanuki n’etata kuminai mwitata, mwanudia kwikela bana b’etata. Yino myanda yibakwile Yesu, biabia bēnda, abebafwamine.

³⁷ Anka sunga bibakitshinyinebilengeleshi bibungi kumpala kwabo, tambamukumine.

³⁸ Eshi, mwisambo wa Eseasa mutemukye ubakwile, ukumbashwe’shi: Obe Yeowa awa kukumina mukāndu wetu, nānyi? na mboko ya Yeowa yibafumbukila kwi’nyi?

³⁹ Binyibiabia tabeuku kukumina ha mwanda wa Eseasa bakwile dimonyi’shi:

⁴⁰ E babwikile mesoabo, E bakomesha mashimba’bo; tala, abakamono na meso abo, sunga kushingula na mashimba’bo, mwandjia kwalula mashimba’bo, n’ami nkebahasha.

⁴¹ Yino myanda yibakwile Eseasa habamwene ntumbo ye, na bamwakwidile.

⁴² Henyihaha munkatshi mwa batontshi bakata babamukuminyine be bungi namu; anka ha mwanda wa baFadiseo tamba (mu) shikule, tala, baketubinga ku kitumbwilo.

⁴³ Mwanda abadi na kifulo kia kutumbisha kwa bantu, kukila kutumbisha kw’Efile Mukulu.

⁴⁴ Yesu bēle musase’shi: Awa ankumina’ mi, tamunkumine anka mwadi E bantumine.

⁴⁵ E namu amono’ini, amono na bantumine.

⁴⁶ Ami nafiki bu etata hano-ha-nsenga’shi: ese akumina kwimi, takekala mufito, ooo.

⁴⁷ Su muntu ahushā myanda yande, teyikumina, tankamutshibila: mwanda nkimufikye kutshibila ba-hanoha-nsenga, anka kuhasha ba-hano-ha-nsenga.

⁴⁸ Anka’wa ampele’mi, sunga kutambula myanda yande, e na umune kumutshibila mwifuku dia nkonko.

⁴⁹ Mwanda nki na kianyisambila, anka Yaiya bantumine, nyibandayile’shi, nyimodionkalungula muno, nyi modionkesambila muno.

⁵⁰ Anka neuku uno mulayilo we ngwa muwa waikala-ika: binyibiabia bioso biañakula, anka bibandayile Yaiya, ami nakula’nka bianka.