Yakoba 2 - KILOMBENO KIHYA KIA NFUMWETU YESU KIDISITU

¹ Bakwetu, mu lukumino lwenu lwa Nfumwetu Yesu Kidisitu a ntumbo, tanunemekanga bantu au bie au bie, ooo,

² mwanda su mu kikoñeno kienu mwatwela muntu mufwale kakano ka nsahabu, na bifwalwa bishalame, amo namu mwatwela mulanda e na bifwalwa bibubi;

³ biabia anunemeka yawa mufwale bishalame, anumwamba’shi: Obe shala hano halumbulukye, na kwi mulanda’shi: Obe kemanē’ha, sungashi: Shala mushi mwa leitulo kia ngwa yande;

⁴ biabia tanwi na bikilene munda mwenu, na kwaluluka bu bansushi ba mitentekyesho yibubi su?

⁵ Hushai bakwetu batomibwe kii’ulo, Efile Mukulu tamusangule balanda ba hanohansenga, tambampeta mu lukuluhilo, na bu bampyanyi ba bufumu bubalayile kwi baba abamufule kifulo su?

⁶ Ank’anwe tanubanemekanga balanda. A bampeta tabenumwesha malwa na kwinukakila ku mpala kwa bimu?

⁷ Abo tabakā (dinyi) eshina dineme dinyi’dio nyi dianutemwinwa su?

⁸ Su amukumbasha kishila kia bufumu mulombene bifundwe bi’Efile’shi: Okafule mukwenu kifulo hamune bū’be na mwinyi, (biabia) okakitshi bibuwa;

⁹ anka su nwibelekene na banta’shi: au bie, au bie, anusolo mwanda, na kutonyeshibwa ku mukanda-wa-bishila bu bashudi-ba-bishila.

¹⁰ Mwanda muntu ese akalama mukanda-wa-bishila ushima, su alemana mu kimune e ’muhishwe ku bioso.

¹¹ Mwanda yawa bakwile’shi: Tokitanga lusandii, bambile namu’shi: Toihanga (muntu). Biabia sunga tokitanga bulalelale, anka boihayile (muntu), biabia todi mushudi-a-mukanda-wabishila.

¹² Akulai, na kukita bu’ba benyi abakatshibilwa kimu ku kishila kia buluñantu.

¹³ Mwanda kitshibilo kia kimu kishī na lusa kwi yawa shī balesheshe lusa; lusa namu alwitumbisha, alushindā kitshibilo kia kimu.

¹⁴ Bakwetu, sunga muntu akula’shi: Nyi na lukuluhilo, alukamumwesha kinyi, su te na bikitshino? A lukuluhilo alwiuku kumuhasha su?

¹⁵ Anka su kwi mukwenu mulume, su mukwenu mukashi a mu lukumino e musekenyi, na mukutwe biakudia bia kwifuku n’efuku,

¹⁶ biabia umune ’ēnu ebambe’shi: Katukai, nwende bibuwa, nukōte kālo, nwikute; sunga mbiabia tanwibaheya (abia) bintu biabadi n’abio lukalo ku mdibi, (biabia) akumwena kinyi?

¹⁷ Anka biabia na lukuluhilo namu, su talwi na bikitshino, ndufwe, mwanda w’alo lu na mwinyi.

¹⁸ Anka mungi akule’shi: Obe we na lukuluhilo, ami n’mu nyi na bikitshino. Ondeshe lukuluhilo lobe lushī na bikitshino, ami nami nkuleshe lukuluhilo lwande ha bikitshino biande.

¹⁹ Okumina’shi: Kwi Efile Mukulu umunenka; okitshi biya; bikudi bibi namu abikuminā na kususā.

²⁰ Anka okyebe kwiuka su, obe mulotakane’shi, lukuluhilo lushī na bikitshino ndufwe?

²¹ A nshetu-kulu Abalahama tamubingishibwe ha bikitshino, habalambwile mwan’e Isaka ha kitala kia bitahilo su?

²² Tomono’shi, lukuluhilo lubalombene na bikitshino bie, na ha bikitshino, lukuluhilo lubakumbeshwe?

²³ Na kifundwe-ki Efile kibakumbene akiakula’shi: Abalahama bakuminyine Efile Mukulu, biabia lubamutemwinyinwe bu mululame: e namu batemwinwe bu: Kuku ’Efile Mukulu.

²⁴ Henyihaha anumono’shi, muntu ’mubingishibwe ha bikitshino tañanka ha lukuluhilo, ooo.

²⁵ Mpamunenka namu Lahaba, winyi ndumba, e tamubingishibwe ha bikitshino, habatambwile mikiendji, na kwibatakula ding’eshinda’nyi?

²⁶ Mwanda anka mwikele mbidi yishī na kikudi ngifwe mpamunenka na lukuluhilo lushī na bikitshino ndufwe namu.