Tetusa 1 - KILOMBENO KIHYA KIA NFUMWETU YESU KIDISITU

¹ Paulu, mpik’Efile Mukulu, mutumibwa a Yesu Kidisitu, mwiyile lukumino lwa basangulwe b’Efile Mukulu, na kwiukidila kwa biabinyibinyi mwiyile bwin’Efile Mukulu;

² mu lutengyelo lwa muwa wa ikala-ika, ubayile Efile Mukulu, e teuku kudimba, habadi tahabandjile kubanga bahanohansenga;

³ anka habalombene bihindji bie bafumbwile Mwanda we, ubampitshikilwe ku bulungudi bw’Efile mulombene mulangilo w’Efile Mukulu Muhashi etu.

⁴ Kwi Tetuse mwan’ande ā’mi na mwinyi mulombene lukumino lwa kwi bosoboso: Bu-muntu na lusa, na kufukama kw’Efile Mukulu Yaiya, na Nfumwetu Kidisitu Yesu Muhashi etu.

⁵ Nyi kianakulekye mu Kelete’shi, olumbule bintu abididi mwabidi bihwandjikile, na kusangula bakulu (ba bikoñeno bi’Efile) mu bibalo bioso, anka mwanakulungwidile.

⁶ Ami’shi, su muntu shyatohekwa matohe, mulumi a mukashi umune, sha bana bakumine, shyatemunwa bu mutombokye, sunga nshyalangikwā.

⁷ Mwanda mukulu (a bikoñeno bi’Efile) wadi n’ao tangwa kutohekwa, (ekale) bu mendaku w’Efile; shi na nkomanga y’eshimba, shī na kansuminyi, shī mwihane ku nfinyo, sunga nga kukuhishena, shī mwihane ku lwiso lwa mono yibubi;

⁸ anka ekale musehedi a kulela benyi; sha kifulo kia balumbulukye, mpila, mululame, muhatulwe-akishila, mutontshi a ku mbidi,

⁹ na kulamata hoo ku Mwanda wi kishima anka mwadi mulambukishwe, mwadia kwiukila kulanga, na kushisha basha kuhūla ku lulambukisho lulombane.

¹⁰ Mwanda kwi batombokye bebungi na basha bwakulakule na banongoshi, tokiokwamba aba ba kisale;

¹¹ mukanwa mwabo anka kumumibwa, abafutakasha mashibo ashima, abalambukisha myanda yishī yilombane ha mwanda wa lwiso lwa mono yibubi.

¹² Umune a kwabadi, mutemuki a abo bana bene bambile’shi: Bena Keletshiane mbasha madimi mafuku oso, banyama be bukyelo bebubi, badyafu b’ehampa.

¹³ Uno mwanda mbinyibinyi. Biabia webasashile bikata, bekale balombene mu lukumino;

¹⁴ kushī kutee matwi ku miele ya Bena Yuda, ya milangilo ya bantu ayinongola ku biabinyibinyi.

¹⁵ Kwi’ba basha mashimba-E-Selelee bintu bioso bi selelee; anka kwi’ba abashula bishila, bashī bakumine, takwi kintu selelee ooo; anka binangu biabo n’eshimba dia munda ndishule.

¹⁶ Abo abakumina’shi; Atwiuku Efile Mukulu; anka mu bikitshino abamutunu, basha butete na bashyabakokyela, na ku mifubo yoso yibuwa mbatombokye.