Luka 8 - KILOMBENO KIHYA KIA NFUMWETU YESU KIDISITU

¹ Bitabibakitshine kumongo, bayile mu bibalo bioso bikata, na mu misumba yoso, badi alungula na kulesha mukānduwibuwa wa bufumu bw’Efile Mukulu: na b’ekumi na babidi (abadi) n’e.

² Na bamo bana bakashi abadi bahashibwe ku bikudi bibi na ku masungu; Madiya badi alumbwa dingi die bu Mandalene, yawa batushishwe bikudi bibi musambobidi.

³ Na Yoanana mpiana a Tshusa, winyi badi kalama ka bintu bia Heloda na Susana, na bangi bebungi abadi abamufubile na buheta bwabo.

⁴ Binyibiabia habadi bantu bebungi bekoñene hamune, na ku bibalo bioso abafikile kwadi, ebakwile mu lukindji’shi:

⁵ Muminyi ’ēfuba bayile mu kumina mbio ye: habaminanga, yingi yibahone ku bukunkula kw’eshinda; yibāshinwe, na tonyi twa mwiilu tubeyisomwene.

⁶ Yingi yibahone ha lubwebwe; hayibamene, yibaumine mwanda yibakutshilwe kitalesha.

⁷ Yingi yibahone munkatshi mwa milobo; biabia milobo yibamene hamune, yeyifina.

⁸ Yingi yibahone ha nsenga yibuwa, yibamene, yibahele bikuba bu ku lukama. Habahwile kwakula yino myanda, banyishish’eyi’shi: E na matwi a kuhusha ahushe.

⁹ Biabia bana-be-ba-bukishi abamwihwishe’shi: A luno luki ndji lwi na minyi?

¹⁰ E bakwile’shi: Kwanudi’nwe nkinu hebwe kwiuka kwa myanda yifībwe ya bufumu bw’Efile Mu kulu: anka kwi bangi yi mu nkindji’shi; hakumona tabakamono, na ha kuhusha tabakashingula, ooo.

¹¹ Anka (luno) lukindji lwi bino. Mbio nyi mwanda w’Efile Mukulu.

¹² Ayo yi ku bukunkula bw’eshinda mbaba abahusha; henyihaha diabolo afika, āta mwanda wi ’mashimba’bo tala bakakumina, na kuhashibwa.

¹³ Ya ha lubwebwe mbaba abahusha, batambula Mwanda na kusehela; ank’abo tabe na mishi, abakumina’nka kihindji kihela, na ha kihindji kia kutompibwa biabalamunuka.

¹⁴ Aya namu yibahone munkatshi mwa milobo, mbaba abahushishe, benda, abafinwa na bia kwinyenga na bia buheta, na bia muloo bia (uno) muwa, tambahe bikuba bikumbane.

¹⁵ Ank’aya ya mu nsenga yibuwa, mbaba abahusha Mwanda, abeulama mwishimba dia binyibinyi dibuwa, abaha bikuba na kwishinka.

¹⁶ Takwi muntu ha kōsha kimunyi ekitule mushi mwa kintu, sunga nkutwesha mushi mwa lusala: anka kwikitula ha kitulo kia kimunyi’shi, abakatwela mwanka bamone etata.

¹⁷ Mwanda takwi kifwame kishyakikasokolwa, sunga kifibwe kishyakikaukibwa na kufumbwila hatoka.

¹⁸ Binyibiabia dimukai ku bianuhusha: mwanda kwi’wa e n’abio akahebwa, na kwi yawa shī n’abio, akamañunwa n’akia anangushena’shi, nyi n’akio.

¹⁹ Henyihaha nyin’e na bakwabo abafikile kwadi, abakutshilwe biakufika hehi n’e ha mwanda wa kibumbu.

²⁰ Abamulungwile’shi: Nyin’obe na bakwenu bēmane hasha, abakyebe kukumona.

²¹ N’e bebāluwile’shi: Nyina’mi na bakwetu nyi mbano abahusha mwanda w’Efile Mukulu na kwiukita.

²² Henyihaha bitabibakitshine, ha ding’efuku batwele mu bwato na bana-be-ba-bukishi hamune; bebalungwile’shi: Twabukei adi’eshia di’eshiba. N’abo abalundwile, bēnda.

²³ Anka habadi abēnde, bahone mu tulo: biabia kihahi kikata kibafikile h’eshiba, (na bwato) bubadi abuulu mema, abadi hehi kutukila.

²⁴ N’abo abafikile kwadi, abamubushishe’shi: A Mwanana! a Mwanana! tubatukila. Binyibiabia babukile, basashile luhahi na mbundambunda ya mema; bibalekyele, kubadi talō nyā.

²⁵ E bebalungwile’shi: A lukumino lwenu lwi kunyi? N’abo abakwetwe na moo, abakanyine, abelungushene’shi: A uno muntu e na minyi? mwanda bakamikile mpahi na mema, n’abio biamukokyela.

²⁶ Abafikile ku nsenga ya Bena Ngadilene, yitadile ku Ngadileo.

²⁷ Habābukile ku mahia, muntu mulume a mu kibalo bafumankene n’e, badi na bikudi bibi kihindji kikata, badi shī mufwale bifwalwa, sunga nkwikala mu nshibo, anka ku mashama.

²⁸ Habamwene Yesu, bēle musase ukata, bahone hashi ku mpala kwe, banyishishe eyi’shi: Nyi n’obe mwanda su, obe Yesu Mwan’Efile Mukulu mukile boso? nakusendela’shi: To’mweshanga malwa.

²⁹ Mwanda bakamikile kikudi kibi kutuka kwadi. Mwanda kibamukwatshile misusa na misusa: badi mwanyibwe namu mu nkano, na kwelwa ’momba: ank’e bakutwile mianyo, badi abingibwa na kikudi kibi mu mahia a kabāka.

³⁰ Biabia Yesu bamwihwishe’shi: Eshina diobe mbu’nyi? Bālulwile’shi: Nyi Kibumbu: mwanda bikudi bibi bibungi bibamutwele ntunda.

³¹ N’abio bibamwiyayile’shi: Twetukamikilanga kutwela mu luhongo (lushī na nfudilo).

³² Kubadi lombe lwa ngulube ayidi ha ngulu; biabia bibamwiyayile’shi: Etukumine tutwele munda mwa’yo. E beyikuminyine.

³³ Binyibiabia bikudi bibi bibatukile munda mwa muntu, bibatwele mu ngulube: na lombe lubālalele lubilo ha mfudi, mpaa na mwishiba, abeyishikile mitshima, yafwa.

³⁴ Be’nyi abadi abeyidisha, habamwene kibakitshibwa abasukile, abalungwile mu kibalo na ku mahia.

³⁵ Henyihaha abatukile mu kumona bibakitshibwa; abafikile kwi Yesu, abasañene winyi muntu batushishwe bikudi bibi, mushale ku ngwā ya Yesu, mufwadikwe, badi na binangu bibuwa; n’abo abatshine moo.

³⁶ Abo namu abamwene, abalungwile mu bahandjile yawa badi mukwatshibwe na bikudi bibi.

³⁷ Binyibiabia kibumbu kioso kia mu nsenga yoso ya Bena Ngadilene abamwiyayile’shi: Etukatukye, mwanda abakwetwe na moo ukata; n’e batwele mu bwato, bālukile.

³⁸ Biabia yawa muntu batushishwe bikudi bibi bamwiyayile’she: Nyikale n’obe: anka Yesu bamutakwile’shi:

³⁹ Aluka ku nshibo yobe, olungule myanda yikata yibakukitshinwa kw’Efile Mukulu. E bayile, bahalakeshe mu kibalo kioso mwanda wa yaya myanda yikata yibakitshine Yesu kwadi.

⁴⁰ Bitabibakitshine, habālukile Yesu, kibumbu kibamukukile na kusehela, mwanda boso abadi abamutengyela.

⁴¹ Biabia kubafikile muntu mulume eshina die bu Yailuse, badi mulami a kitumbwilo; bahone ku ngwā ya Yesu, bamwiyayile’shi: Ofikye ku nshibo yande.

⁴² Mwanda badi na mwana mukashi eleka, badi bihwa hehi ekumi na bibidi, e badi mulale hehi na lufu. Anka habayile bantu abamufine efina.

⁴³ Henyihaha mwana mukashi badi na busungu bwa kishila, bihwa ekumi na bibidi, bahudishe bintu bie bioso kuhana kwi bananga, tamumone sunga ngumune amuhasha.

⁴⁴ Bafikile ku mongo kwe, bakumine ku kimāma kia mutwelo we, biabia kahindji n’āka kishila kibatshibika.

⁴⁵ Yesu’shi: A nanyi bankumu’shi? Habatune boso, Petelo na bangi abadi n’eabamwāluwile’shi: A Mwanana, kibumbu kikushikye na kwifinena, biabia obe wehushe’shi: A nanyi bankumu?

⁴⁶ Yesu bakwile’shi: Muntu bankumu; mwanda nashingula’shi, bukome bubantuku.

⁴⁷ Habamwene mwana mukashi tabadi mufwame, bafikile na kususa, bakunamine ku ngwā ye, bamulungwile ku mpala kwa bantu boso kīnyi kibamukumishe (mboko), na kibahashibwa kahindji n’āka.

⁴⁸ Biabia bamulungwile’shi: Mwan’ande mukashi nyish’eshimba, lukuluhilo lobe lubakuhasha; nda na kufukama.

⁴⁹ Habadi kwete kwakula, kubafikile umune (ku nshibo) ya mulame a kitumbwilo, bakwile kwadi’shi: Mwan’obe mu kashi bafu; tokambakashanga Mulambukishi.

⁵⁰ Anka Yesu hakuhusha bamwālulwile’shi: Totshinanga, anka kukumina, e akahashibwa.

⁵¹ Biabia habafikile ku nshibo, tamukumine mungi muntu kutwela, anka Petelo, na Yakoba, na Yoano, na nshye mwana, na nyin’e.

⁵² Biabia boso abadi abamudidi kitumo, ank’e bakwile’shi: Tanudilanga, tamufwe, ooo, ’mulale tulo.

⁵³ Abo abamusehele na kumubengakana, mwanda abaukile ’shi, mwana ’mufwe.

⁵⁴ Biabia ebebatushishe boso hasha, bamukwete ku mboko, bamwitanyine’ shi: Nsongwakashi buka.

⁵⁵ Henyihaha kikudi ki’e kibālukile kahindji n’āka, bēbwele; e bebalungwile’shi; Muhei biakudia.

⁵⁶ Biabia abamutandjile abakanyine bikata, anka e bebalangile’shi: Tanulungulanga muntu bibakitshinwe.