Luka 24 - KILOMBENO KIHYA KIA NFUMWETU YESU KIDISITU

¹ H’efuku dia kwibedi dia lubingo namashik’ese, abafikile bangi bakwabo ku nyenyi, mbatwale abinunku mahembwe biabadi balumbule.

² Abasañene ebwe dialāshwe ku nyenyi.

³ Habatwelele mwanka tambasanane kitanda kia Nfumwetu.

⁴ Bitabibakitshine, habadi mashimb’abo ebakalakala ha uno’u’shi, batale’bi, bana balume babidi bemene habadi bafwale bilamba abihenyahenya;

⁵ Habaikēle na moo, na kubandamisha mahala abo hashi, abo abakwile kwabadi’shi: A nkinyi kianukimbila e winyi atala munkatshi mwa bafwe?

⁶ E, te mu nwē, basangulwa. Tentekeshai mwabakwidile kwanudi, habadi ki mu Ngadilea,

⁷ eshi, Mwan’a muntu wadi n’ao ngwa kufishibwa mu māsa a bantu bebubi, na kubambibwa ha mutshi uhingishene, na h’efuku diakasatu akasanguka dimonyi.

⁸ N’abo abatentekyeshe mīsambo ye.

⁹ Biabia hakwaluka ku nyenyi, tabalungula b’ekumi na umune, na bangi bakwabo boso yino myanda yoso.

¹⁰ Benyi’bo abadi Madiya Mangadalene, na Ndjoana, Madiya (nyin’a) Yakoba, na bangi babadi n’abo, abo benyi abalungwile yino myanda kwi batumibwa.

¹¹ Biabia mīsambo y’abo yibadi bu miele ya bisumanga kwabadi, tambeyikumine.

¹² Henyihaha Petelo bēbwele, akamina lubilo ku mashama, hakubandamina mwanka, bamwene bilamba bia lenene (mbilale) ha buhenka bwa’bio, biabia bakatukile anka e na mwinyi, kwete kukanya ku kiakia kibakitshinwe.

¹³ Talai, babidi b’abo abadi abende diadi’efuku ku kibalo akitemunwa bu Emeuse, kibadi kula na Yelusalema bu kilometre ekumi na kimune.

¹⁴ Abo abadi abesamba ha yino myanda yibakitshinwe.

¹⁵ Bitabibakitshine habadi abesamba na kwihatulushena (abo bana bene) Yesu na mwinyi befubwile hehi, tēnde n’abo.

¹⁶ Anka meso abo abakwetwe na mindjua biabashyakumushingula.

¹⁷ E bebehwishe’shi: A yino myanda yi na minyi yanwilungushena, na kutambuka na kwinyongola.

¹⁸ Biabia umune, eshina die bu Keleohase, bamwalulwile’shi: Obe we anka mwenyi mu Yelusalema, twemwiukye yinyi yibakitshinwe mwanka mu ano mafuku?

¹⁹ E bālulwile’shi: A nginyi, yinyi? Abo’shi: nyi myanda yinemene kwi Yesu a Nasaleta, badi mutemuki a bukome mu bikitshino na myanda ku mpala kw’Efile Mukulu na bantu boso;

²⁰ na mubamufishishe batshiite-bakwidi bakata na batontshi betu, kumuhisha ku lufu, na kumubamba ha mutshi uhingishene.

²¹ Ank’atwe tubadi bakuluhile’shi: Nyi anka e badi akukula Isalele; ungi mwanda, lelo nyi efuku dia kasatu kasha yino myanda yibakitshinwe.

²² Na bamo bana-bakashi ba mu kibumbu kietu abetukanyisha, abo abadi ku mashama namashika ese.

²³ Biabia habashī basanane kitanda kie, abafikile’shi: Tubamono kimonwa kia bamwikeilu, abetulungula’shi: E atala.

²⁴ Bamo ba’bo betu abayile ku mashama, abasañene bu bibakwile bana bakashi, anka e winyi tambamumone.

²⁵ Henyihaha e bebalungwile’shi: Anwe balotakane, na ba mashimba a kuhuñanya kukumina yoso yibākwilwe batemuki;

²⁶ Tayibadi yihwandjikile Kidisitu kufwambuka mu yino myanda, na kutwela mu ntumbo ye su?

²⁷ Biabia kubangila kwi Mosesa, na kwi batemuki boso, bebahatulwidile mu Bifundwe-b’Efile bioso, yinyi myanda ya ha mwanda we.

²⁸ Binyibiabia, abefubwile hehi na kibalo kiabadi abende: biabia e bahwandjikishe bu akyebe kukila.

²⁹ Ank’abo abamwiyayile’shi: Wekale n’etu, mwanda tampehi na ku kiolwa, n’efuku tadidi hehi kushimina. Binyibiabia batwēle kushala n’abo.

³⁰ Bitabibakitshine, habashalele n’abo (ha bidibwa) bātshile dimpa, batumbwile, bedibaswile, ebaha.

³¹ Biabia meso abo ababulukile, biabakimūka bibuwa; henyihaha belengyele ku meso kwabo.

³² Binyibiabia tabeakushena’shi: Nyi kiatumwene ’mashimb’etu amutembe bu kālo, hesambanga n’etu mwishinda, na hekalanga etufumbwila Bifundwe bi’Efile?

³³ Binyibiabia abebwele ha yawa nguba, bālukila kwi Yelusalema, abasañene b’ekumi na umune mbekoñene hamune n’abo bābadi n’abo,

³⁴ abo’shi: Nfumwetu musangukye binyibinyi, bamwekyela kwi Shimona.

³⁵ Biabia’bo tabebalungula yibakitshinwe mwishinda, na mubeukīshe kwabadi ha kubasula kwa dimpa.

³⁶ Habadi abākula biabia, Yesu na mwinyi bemene munkatshi mwabo; bebalungwile’shi: Kufukama kwikale kwanudi.

³⁷ Ank’abo ababasukile, bakwatwa na moo, tabahwandjikisha’shi: Nyi nkikudi kiatubamono.

³⁸ Binyibiabia e bebahwishe’shi: A nkinyi kianutuntu mu mashimba, na kwela mpaka mu mashimb’enu?

³⁹ Talai māsa ande na ku ngwa yande, ñanka’mi uno; nkumei maasa numone, mwanda kikudi taki na mbidi na mifulwa, bu bianubamono biandji n’abio.

⁴⁰ Habahwile kwakula biabia, bebaleshe maasa na ngwa.

⁴¹ Habadi tambakumine ha mwanda wa kusehela, na kukanya, bebalungwile’shi: Nwi na bidibwa kuno su?

⁴² Biabia abamuhele kihindji kia mushiha wēkyele, na kisa kia būki.

⁴³ Bebiatshile, tādi ku mpala kwabo.

⁴⁴ Binyibiabia bebalungwile’ shi: Yino nyi yinyi myanda yanenulungwile hanadi nki nenu’shi, myanda yoso wayidi n’ao ngwa kukumbashwa yibadi yifundwe mu mukanda-wa-Mosesa na mu batemuki, na (mu) ñono ya Milangwilo, ha mwanda wande.

⁴⁵ Henyihaha bebabulwile binangu biabo biabadia kushingula Bifundwe bi’Efile.

⁴⁶ E bebambile numu’shi: Nyi mwakibafundjilwe, na mwakibamuhwandjikile Kidisitu kufwambuka, na kusanguka ku lufu h’efuku dia kasatu.

⁴⁷ Eshi, kwilanga kwishimba na kushimangishwa kwa milwisho kwikale akulungulwa mwishina die munkatshi mwa mīlo yoso, kubangila ku Yelusalema.

⁴⁸ N’anwe nwi tumonyi twa yino myanda.

⁴⁹ Talai, nenutumina hanudi mulayilo wa Yaiya’nde; anka nushale mu kibalo kia Yelusalema mpaa n’ahanukekala bafwadikwe na bukome bwa mwiilu.

⁵⁰ Binyibiabia e bebakunkwishe mpaa na ku Betane, bebosheshe maboko e, bebēlele mwabi.

⁵¹ Bitabibakitshine habadi ebēlela mwabi, balamunwinwe kwabadi, atwadibwa Mwiilu

⁵² N’abo abamulangwidile, balukila ku Yelusalema na kusehela kukata;

⁵³ abadi mu ntempelo mafuku oso bakwete kutumbisha Efile Mukulu. Amena.