Luka 22 - KILOMBENO KIHYA KIA NFUMWETU YESU KIDISITU

¹ Binyibiabia kidibwa kia mampa ashī na kitatusho takibadi hehi, akitemunwa bu Pāque.

² Biabia batshiite-bakwidi bakata na bafundji ba mikanda, abakimbile mwa kumwihayila, mwanda abatshine bantu.

³ Henyihaha Satana batwēle mu Yudasa, eshina die diakabidi dibadi bu Isakadiota biabadi mwikale a ku b’ekumi na babidi.

⁴ E bayile eshinda die, akesamba na batshiitebakwidi bakata na bimankinda mwadia kumwihukila kihuko kwabadi.

⁵ Abo abasehelele, abalombene n’e kumuha nfalanga.

⁶ Bebalayile, bakimbile mwa kumusokwela kwabadi ha shībadi kibumbu kia bantu kwanka.

⁷ Henyihaha efuku dia mampa ashī na kitatusho dibafikile, diabadi na wa kwiha bia Pāque.

⁸ E batumine Petelo na Yoano eshi: Ndai nuketulumbulwila Pāque tudye.

⁹ Biabia abamwihwishe’shi: A kokyebe tulumbule kwi kunyi?

¹⁰ E bebālulwile’shi: Talangai, hanutwele mu kibalo, anukafumankana na muntu mutwal’ebuka dia mema: numulonde mpaa na mu nshibo yiakatwele.

¹¹ Anukalungula sha nshibo’shi: Mulambukishi akwihusha’ shi: A nshibo ya benyi yi kwi kunyi mwandjia kudila bia Pāque na bana bande ba bukishi?

¹² E akenulesha kadimbo kakata ka kwiilu kalumbulwe, nulumbulwile’bio mwanka.

¹³ Abo abayile, abasañene anka biabebalungwile: n’abo abalumbulwile bia Pāque,

¹⁴ Habakumbene nsa, bashalele na batumibwa ekumi na babidi hamune n’e.

¹⁵ Biabia bebalungwile’shi, nyi na musanku kukyeba kudia nenu kino kidibwa kia Pāque kwibedi kwa kufwambuka kwande.

¹⁶ Mwanda nenulungula’shi: Tankeyidi nenu dimo, mpaa na hayikakumbashwa mu bufumu bw’Efile Mukulu.

¹⁷ E bātshile ekuho, batumbwile, bambile’shi: Tambulai dino, nwibekyeshene munkatshi mwenu.

¹⁸ Mwanda nenulungula’shi: Tankatomo bia ku bikuba bia nfinyo mpaa n’ahakafiki bufumu bw’Efile Mukulu.

¹⁹ Biabia bātshile mampa, batumbwile, beabaswile, bebahele’shi: Ano nyi mbidi yande yibenuhebwa; kitai bino mwa kuntentekyesha.

²⁰ Hakuhwa kudia kitomeno namu anka hamune’shi: Kino kitomeno nyi kilombeno kihya kia mu mas’ande abenusumbukile.

²¹ Anka talangai, easa dia winyi anyihuluka di n’ami ha mesa.

²² Binyibinyi Mwan’a muntu ’ēnde, bu mwa kidi kifunwe: anka mpombo kwi yawa muntu amusokola.

²³ Biabia ababangile kwīhushena munkatshi mwabo’ shi: akakitshi kino kintu nanyi?

²⁴ Binyibiabia, kubadi mpaka namu munkatshi mwabo’shi, a nanyi akyebe kutumbwa bu mukile bakwabo.

²⁵ E bebalungwile ’shi: Bafumu ba Bajentaila abebakitshisha butontshi hanundu habo: n’abo abebakitshisha butontshi, abatemunwa bu, Basha bu-muntu.

²⁶ Anka’nwe tanukekala biabia, anka yawa mukile bukata munkatshi mwenu, ekale bu mukinga; n’e bu kimankinda, ekale bu mufubi.

²⁷ A biabia mukile’nyi nanyi? a mushale ku bidibwa’nyi ngatumibwa? Ta ngyawa ashalā ku bidibwa? anka’mi nyi munkatshi mwenu bu atumibwa.

²⁸ Anwe nwi babadi bekale n’ami mu kutompibwa kwande.

²⁹ Ami nenusangwile bufumu, bu bibansangwidile Yaiya;

³⁰ eshi, nudie, nutome ku mesa ande mu bufumu bwande, na kushala ha mpunānsulu, kutshiba myanda ya bisaka bīkumi na bibidi bia Bena Isalela.

³¹ Binyibiabia Nfumwetu bakwile’shi: Shimona! Shimona! tala Satana bakamikile kukukwata mwadia kukuhehwila bu ngano.

³² Anka’mi tankutekyele’shi, lukuluhilo lobe talukakutshikwa: na hokāluluka kwishimba okankamike bakwenu.

³³ Biabia bamwalulwile’shi: A nfumwetu, nyi mwimene kwenda n’obe ku nshibo ya lukano na ku lufu.

³⁴ (Yesu) bamwambile’shi: Petelo, nakulungula’shi: etombole tadikasamina lelo uno kwibedi okantunu misusa yisatu’shi: Tamwiuku’mi.

³⁵ E bebalungwile’shi: Hanenutumine tanubadi n’edimba, sunga ebofu, sunga bilato nubakutshilwe kintu su? Abamwalulwile’shi: Ooo, sunga nkahela.

³⁶ Henyihaha bebalungwile’shi: Anka binobino, sh’edimba ediate n’ebofu die hamune: yawa namu shī na luhete lwa ngoshi ahane mutwelo we elūle.

³⁷ Mwanda nenulungula’shi: uno ubafundjibwe waudi na’o ngwa kukumbashwa mwimi’shi: Badi mubadikwe na basodi ba myanda. Mwanda bintu bioso binemene bi na kunfudilo.

³⁸ Abo abakwile’shi: A Mwanana, mpete yibidi ya ngoshi ngii. N’e bambile’shi: Kubahu.

³⁹ E batukile, ēnda, mwiyile kihikwa kie, ku ngulu ya Olefeta, na bana be-ba-bukishi abamulondele namu.

⁴⁰ Habafikile ku kihindji, bebalungwile’shi: Nutekei’shi, tala nwakafishwa mu kutompibwa.

⁴¹ Bakungulukile kwabadi hehi bu kihimo kia kwelwa ebwe diakafika, henyihaha bakunamine, ateka’shi:

⁴² Obe Yaiya, su okumina, kasha dino ekoho kwandjimi; anka tamwankyebela mwishimba diande, ooo, anka mokyebela mukitshibwe.

⁴³ Biabia mwikeilu a mwiilu bamwekyele kwadi, bamunyishishe.

⁴⁴ Biabia hakufika na mitanyo yikata, banyingamene na luteko, na matahuta e abālulukile bu makohola akata a mase abanokyele hashi.

⁴⁵ Habebwele ku luteko lwe, bafikile kwi banabe-ba-bukishi, bebasañene balale tulo ku bishiotshi.

⁴⁶ Biabia bebahwishe’shi: A nkinyi kianudi balale tulo? bukai nutekye, tala nuakatwela mu kutompibwa.

⁴⁷ Na habadi ākula, talai, kibumbu na yawa aitanyinwa bu Yudasa, umune a ku bekumi na babidi, badi ende ku mpala kwabo, befubwīle hehi na Yesu humufifya ku kanwa.

⁴⁸ Anka Yesu bamwihwishe’shi: A Yudasa oyihuluka Mwana muntu na kufifya ku kanwa su?

⁴⁹ Biabia abadi hehi n’e habamwene ubadia ulondo abamwihwishe’shi: A Nfumwetu, twibatahe na luhete lwa ngoshi su?

⁵⁰ Na umune abo batahile mufubi a tshiite-mwakwidi mukata, amutshib’etwi dibalume.

⁵¹ Biabia Yesu bamwalulwile’shi: Banda kuleka. Henyihaha bamukumine kwitwi, amuhwīsha.

⁵² Henyihaha Yesu bakwile kwi batshiitebakwidi bakata, na kwi bimankinda bia mu ntempelo, na bakulu abafikile kwadi’shi; A nubatuku na mpete ya ngoshi, na tubongye bu abakyebe kulwa na munyefianyi?

⁵³ Hanadi nenu mu ntempelo kwifuku n’efuku, tanwibōle masa kunkwata: anka yino nyi nsa yenu, na matalwa a mufito.

⁵⁴ Henyihaha abamwatshile bamukunkusha, bakamufisha mu nshibo ya tshiite-mwakwidi mukata. Biabia Petelo badi a mulondo kunyima kula.

⁵⁵ Habosheshe kālo munkatshi mwa luhoho, bashala humune, biabia Petelo bashalele munkatshi mwabo.

⁵⁶ Henyihaha nsongwakashi umune bamumwene habadi mushale ku kālo, bamutale swee, bambile’shi: Uno muntu namu badi n’E.

⁵⁷ Anka e bamutune’shi: Obe mwana mukashi ntamwiuku’mi, ooo.

⁵⁸ Hakubayishishe kahindji kahela mungi namu bamumwene, bambile’shi: Obe namu we untune abo. Biabia Petelo’shi: Obe muntu, ami, ooo.

⁵⁹ Biabia habakile kihindji bu nsa yimune, mungi namu bakwil’anka musumine’shi: Binyibinyi au muntu namu badi anka n’e, mwanda e Mwina Ngadileo.

⁶⁰ Henyihaha, Petelo bambile’shi: Obe muntu, taftuku biokula’bi. Biabia kahindji n’āka habadi kiakula, etombole dibasamine.

⁶¹ Binyibiabia Nfumwetu bealulwile, atala kwi Petelo. Henyihaha Petelo batentekyeshe mwanda wa Nfumwetu bu bamulungudile’shi: Kwibedi etombole tadiadile, obe akantunu misusa yisatu.

⁶² Biabia Petelo batukile, tadidi bikata na mpolo.

⁶³ Baba bantu abadi abakwata Yesu, abamusengyele, tabamukuhila.

⁶⁴ Binyibiabia habamwanyine kitambala ’eso, abamukuhila mu mpala, tabamwihusha’shi: Temuna bakukuhila e nanyi?

⁶⁵ Na yingi myanda yibungi yiabamwambile yibadi anka yiakūmuka.

⁶⁶ Binyibiabia habubatokyele na mashika, bakulu ba bantu, na batshiite-bakwidi bakata, na bafundji-ba-mikanda abekongyele hamune, abamukishishe ku meso, benda n’e ku kimu kiabo’shi:

⁶⁷ Obe, we Kidisitu su? etulungule. Ank’E bebalungwile’shi: Nenulungula, tanukakumina.

⁶⁸ Sunga nenwihusha namu tanukañalula mwanda, sunga kumposola.

⁶⁹ Kubanga lelo uno mpaa na ku mafuku e ku meso, Mwan’a muntu akashala ku mboko yibalume ya bukome bw’Efile Mukulu.

⁷⁰ Henyihaha boso abamwihwishe’shi: a biabia, obe Mwan’Efile Mukulu su? E bebālulwile’shi: Anwe bianwakula.

⁷¹ Biabia abakwile’shi: Atukyebe kangi kamonyi na minyi? mwanda tubahu kwihushisha’twe bana bene ku kanwa kwe.