Luka 19 - KILOMBENO KIHYA KIA NFUMWETU YESU KIDISITU

¹ Henyihaha (Yesu) batwelele mu Yediko, akila.

² Talai, (kubadi) muntu atemunwa bu Sakadiasa, badi mukulu a balambushi-ba-milambu, badi mpeta.

³ E bakimbanga mwa kumwena Yesu biadi; anka bakutshilwe ha mwanda wa kibumbu, mwanda badi na kishisa kihi.

⁴ Biabia bakamine lubilo ku mpala, bakamine ku mutshi kikuku biadia kumumona: mwanda akyebe kukila ha diadi’eshinda.

⁵ Yesu habafikile hanka, batale kwiilu, bamumwene, bamulungwile’shi: Sakadiasa kulumuka bukidi oyikye; mwanda lelo uno wandji n’au ngwa kushala ku nshibo yobe.

⁶ Biabia bahulumukile lubilo bayikile, bamukukile na kusehela.

⁷ Habamwene biabia boso abadi abaununa’shi: bakafikila kwa muntu musodi a myanda.

⁸ Binyibiabia Sakadiasa bemene, belungwile Nfumwetu’shi, Tala Mwanana, naheya balanda kihindji kia hankatshi kia mono yande, su nātshile kintu ku madimi kwi muntu, su nkinyi, su nkinyi, nankamwalwisha misusa yinanka.

⁹ Yesu bamulungwile’shi: Lelo uno kihandjilo kibafiki ku yino nshibo, mwanda e namu ’mwan’a Abalahama.

¹⁰ Mwanda mwan’a muntu bafiki kukimba na kuhasha abadi bashimine.

¹¹ Habāhushishe yino myanda, bēle lungi lukindji, mwanda bādi hehi ku Yelusalema, na (ungi mwanda), abatentekyeshe’shi, bufumu bw’Efile Mukulu abukyebe kuhulumuka bumwekye.

¹² Binyibiabia, bakwile’shi: Kubadi muntu mukata muneme bayile ku yingi nsenga yibadi kula, mu kuata bufumu bwe, na kwaluka.

¹³ Baitanyine bahika be ekumi, bebahele mono ekumi, bebalungwile’shi, Sungulai nayo, mpā na hankāluka.

¹⁴ Anka ba mu mwilo we abamushikilwe, batuma mikiendji kumulonda’shi: Tatukumina uno (muntu) kwitubikela.

¹⁵ Bitabibakitshine habālukile, e bahu kutambula bufumu; biabia batumine kwitanyina baba bahika babahelwe mono kwadi’e, mwadia kwiukila mwabadi basungulwile.

¹⁶ Henyihaha a kwibedi bafikile kwadi ’shi: A Nfumwami, mono yobe yibasungula ekumi.

¹⁷ E bamulungwile’shi: bibuwa, obe mpika ebuwa: mwanda bodi na kishima mu kintu kihela, wekale na matalwa ku bibalo ekumi.

¹⁸ Binyibiabia a kabidi bafikile’shi: A Mwanana! mono yobe yibasungula yingi yitano.

¹⁹ Binyibiabia bamulungwile hamune’shi: Obe namu wekale na matalwa ku bibalo bitano.

²⁰ Biabia mungi bafikile eshi: A Mwanana, talanga! mono yobe yinabombeleshe mu kitambala.

²¹ Mwanda nankutshine moo, hamwanda we muntu e bukoho: ōta kioshī mutule, oumbulā kioshī mukune.

²² Binyibiabia e bamwambile’shi: Obe, we mpika e bubi, ku kanwa k’obe ōbe na mwinyi nankakutshibila kimu. Bweukile’shi: nyi muntu e bukoho, n’atā kianshī mutule, na kuumbula kianshī mukune.

²³ Biabia nkinyi kioshī mutule mono yande kwi basungudi; hakufika kwande nadia kutambula yanka na yingi yitentekelwe hanka?

²⁴ Balungwile baba abadi bemane hehi’shi: Mwatei mono yaya, nwiyihe kwi yawa e na mono yīkume.

²⁵ (Abamwalulwile’shi: A Mwanana, e na mono yikumi.)

²⁶ Mwanda nenulungula’shi: Kwi muntu ese e n’akio akahebwa na kwi yawa shī n’akio, sunga nkiakia kiadi n’akio akikamwatshibwa.

²⁷ Anka’bo beshikwene n’ami, bashyabakyebe’mi kwibabikēla, nwibafishe kuno, nwibehe ku mpala kwande.

²⁸ Habahwile kwakula biabia, bayile ku mpala, bakamine ku Yelusalema.

²⁹ Bitabibakitshine habafikile hehi na ku Betefashi na Betane, ku ngulu ayilumbwa bu Olefeta, batumine babidi ba ku bana-be-ba bukishi’shi:

³⁰ Ndai ku kibalo ki ku mpala kwenu; hakutwela mwanka anukaheta mwan’a mpunda mushitshikwe, shiayiñaminwe na muntu: numushitule, numufishe kuno.

³¹ Su muntu benwihusha’shi: A nkinyi kia numushitwila? Biabia nuakamulungula’shi: Ha mwanda Nfumwetu e na kia mukyebela.

³² N’abo abatuminwe abayile, abasañene anka bu bibebalungwile.

³³ Habadi bakwete kushitula mwan’a mpunda, banfumu e abebalungwile’shi: A nkinyi kianushitwila mwan’a mpunda?

³⁴ Abālulwile’shi: Nfumwetu e na kia mukyebela.

³⁵ Biabia abamufishishe kwi Yesu: abatentekyele bifwalwa biabo ha mongo ha mwan’a mpunda, abanamishe Yesu hanka.

³⁶ Habayile, abadi bakwete kuala bifwalwa biabo mwishinda.

³⁷ Biabia hābadi afiki hehi ku ngalala ya ngulu ya Olefeta, kibumbu kioso kia bana-ba-bukishi, ababangile kusehela na kutumbisha Efile Mukulu n’eyi dikata, ha mwanda wa bikitshino bioso bia bukome biabamwene.

³⁸ Eshi: Mwabi kwi Nfumu afiki mwishina dia Yehowa: kufukama mwiilu na ntumbo mwiilu mukile.

³⁹ Biabia bamo ba ku Bafadiseo, abadi munkatshi mwa kibumbu, abamulungwile’shi: A mulambukishi, sashila bana bobe ba bukishi.

⁴⁰ N’fe bebālulwile’shi: Nenulungula’shi: su bano abakaumina, mabwe akasama.

⁴¹ Habafikile hehi bamwene kibalo, ekidila mpolo,

⁴² Ushi: (Ae! Ae!) Su bodio kwiuka, obe na mwinyi mu dino efuku diobe bintu bia kufukama kobe! anka binobino mbifībwe ku meso kobe.

⁴³ Mwanda mafuku akakufikila ha beshikwene n’obe abakakufunyisha mpembwe, na kukushikisha kosokoso, na kukutatshila ku mpese yoso.

⁴⁴ Abakakukuhila hashi, na bana bobe munkatshi mwobe hamune; tabakakulekyela ebwe dimune ditentame ha dikwabo; mwanda tobodi mwiukye kihindji kia kutembelwa kobe.

⁴⁵ Binyibiabia batwelele mu ntempelo, babangile kwibabingila hasha, aba badi ahana na kuula mwanka.

⁴⁶ Bebambile’shi: Ubafundjilwe’shi: Nshibo yande nyi nshibo ya luteko, anka’nwe nubeyialula bu muta wa bangifi.

⁴⁷ E badi alambukisha kwifuku n’efuku mu ntempelo. Anka batshiite-bakwidi bakata na bafundjiba mikanda na bantu bakata abadi abakimbi mwa kumwihayila.

⁴⁸ Tambamone biabadia kukita, mwanda bantu boso abadi abamute matwi kumuhusha.