Luka 18 - KILOMBENO KIHYA KIA NFUMWETU YESU KIDISITU

¹ Henyihaha belele lukindji kwabadi kwibalesha’shi: mbilombane bantu anka kuteka mafuku oso, kushī kuhungila.

² Eshi: Kubadi nsushi mu kibalo ki kampanda, shī badi atshinyi Efile Mukulu sunga nkunemeka muntu.

³ Kubadi namu mukashi-a-mufwe mu kiakia kibalo; e bafikile kwadi’shi: Ngobwele kwi yawa muntu mwimane n’ami.

⁴ N’e batune kihindji, anka kunyima bakwile munda mwe’shi: Sunga tantshinyi Efile Mukulu sunga kunemeka muntu;

⁵ anka ha mwanda uno mukashi-a-mufwe ankalakasha, nankamuobwela, tala akampungisha’nyi, na kuyeya kwe.

⁶ Biabia nfumwetu bakwile’shi: Hushai bibakwile yawa nsushi shīmululame’shi:

⁷ Efile Mukulu takōbwela namu basangudibwe b’e na mwinyi abadidi kanya na bufuku kwadi, sunga ahuñanya kihindji kila n’abo.

⁸ Nenulungula’shi: akebōbwela bukidi. Sunga mbiabia, ahakafiki Mwan’a muntu, akasañana lukuluhilo hano-ha nsenga su?

⁹ Balungwile luno lukindji namu kwi bangi bakwikuluhila’bo bana bene’shi: Twi balulame, na kubenda bakwabo:

¹⁰ Bana balume babidi abakamine ku ntempelo mu kuteka; umune Mufadiseo, na mungi mulambushi-a-mulambu.

¹¹ Mufadiseo bemene etekyela na mwinyi’shi, Obe Efile Mukulu, nakutumbula mwanda nki bu bangi bantu, bash’efīnyi, bashī-balulame, ba mabasa, sunga bu uno mulambushi-amulambu, ooo.

¹² Ami nashila biakudia misusa yibidi ku lubingu, nalambula ki’ekumi kia bioso biandji nabio.

¹³ Winyi mulambushi namu bebwele, aimana kula, tamubushe sunga meso’e kwiilu, anka bekuhile ha kiadi kie ’shi: Efile Mukulu onsambe lusa, ami mulwishi.

¹⁴ Nenulungula’shi, uno muntu bende ku nshibo ye mukilekile kubingishwa he mungi, mwanda muntu ese e nemeka na mwinyi akaheleshwa; awa akehelesha na mwinyi, akanemekwa.

¹⁵ Abafishishe namu bana batoka kwadi’shi, akebakume: anka habamwene bana be-ba-bukishi biabia, abebasashila.

¹⁶ Anka Yesu bebaitanyine, bakula’shi, nukumine bana batoka bafikye kwandji, tanwibalekeshanga, mwanda bufumu bw’-Efile Mukulu mbwa baba be biabia.

¹⁷ Binyi binyi nenulungula’shi: Muntu ese shī mutambule bufumu bw’Efile Mukulu bu mwana mukinga takatwele mwanka sunga mpahelahela.

¹⁸ Biabia mutontshi kampanda bamwihwishe’shi, Obe mulambukishi ebuwa, nkite naminyi kuhyana muwa wa ikala-ika?

¹⁹ Yesu bamwalulwile’shi: Ankinyi kiontemwina bu’ebuwa? Takwi ebuwa’nka umune (nyi) Efile Mukulu.

²⁰ Weuku bishila’shi: Tosolanga mabasa; Twehanga (muntu), Toibanga, Todimbanga madimi, Nemeka shobe na nyin’obe.

²¹ E bakwile’shi: Bino bioso nebilame mpaa na ku bakinga bwande.

²² Binyibiabia hahushishe Yesu yino myanda, bamulungwile’shi: Bolobesha kintu kimune: hana biodi nabio bioso, webiabile balanda, n’obe okekala na bineme mwiilu, biabia ofikye, ondonde.

²³ Anka habahushishe biabia, eshimba die dibenyengele bikata, mwanda badi na buheta bwimoo.

²⁴ Yesu hakumona eshimba die dibenyengye: bakwile’shi: A na minyi bampeta kutwela ’mbufumu bu ’Efile Mukulu?

²⁵ Mwanda nkukile kubofula ngamedia kutwela mwiiso dia lushingye, he mpeta kutwela mbufumu bw’Efile Mukulu.

²⁶ N’abo abahushishe (biabia) abakwile’shi: A henyihaha nanyi akahanda.

²⁷ Anka E bakwile’shi: Bintu abikambila bantu (kukita) abiukibwa n’Efile Mukulu.

²⁸ Henyihaha Petelo bakwile’shi: Talanga! Atwe tubalekyele bioso, twakulonda.

²⁹ N’e bebalungwile’shi: Binyibinyi, nenulungula’shi: Takwi muntu akuleka nshibo ye, sunga nshye na nyin’e, su bakwabo balume, sunga mpian’e, su bana be, ha mwanda wa bufumu bw’Efile Mukulu.

³⁰ Akakutwa kutambula bikile misusa yi-bungi mu kino kihindji, na mu kihindji kia kufika muwa-wa-ikala ika.

³¹ Henyihaha E bātshile b’ekumi na babidi, bebalungwile’shi: Talangai, bia tukamina ku Yelusalema, myanda yoso yibafundjilwe na batemuki ha mwanda wa Mwan’a muntu ayikakumbashwa.

³² Mwanda akahebwa kwi badjentaila, akadidikwa, akamweshibwa malwa a lufu, akafidibwa mata.

³³ Abakamukuhila na kumwiha! h’efuku dia kasatu akasanguka.

³⁴ Anka’bo tambashingule yino myanda sunga ngumune; uno mwanda namu badi ufībwe kwabadi, sunga nkwiuka yaya myanda yibakwilwe.

³⁵ Bitabibakitshine habefubwile hehi na Yediko, kubadi muntu mpofu badi mushale kubukunkula kw’eshinda, badi atekye.

³⁶ Biabia ha kuhusha kibumbu kia bantu abakidi, behwishe’shi, A nkinyi’ki?

³⁷ Abamulungwile’shi, Yesu a ku Nasaleta akidi.

³⁸ Belele musase’shi: Yesu (obe) Mwan’a Dafidi onsambe lusa.

³⁹ Abo abadi ababadila ku meso abamutosheshe’shi, a umine: ank’e banyishishe musase bikata’shi: (Obe) Mwan’a Dafidi mfwile namu lusa.

⁴⁰ Biabia Yesu bemene, bebakayikile’shi, mufishe kwandji. Habafishishwe hehi, bamwihwishe’shi:

⁴¹ Okyebe nkukitshine kinyi? E bakwile’shi: A Nfumuwami nankyebe biandjia kubūla meso.

⁴² Biabia Yesu bamulungwile’shi: Tambula kutala kwa meso’be: lukuluhilo lobe lubakuhasha.

⁴³ Na kahindji n’āka batambwile kutala kwa meso e, amulonda, na kutumbisha Efile Mukulu, biabia bantu boso habamwene, abalangwile Efile Mukulu.