Luka 14 - KILOMBENO KIHYA KIA NFUMWETU YESU KIDISITU

¹ Bitabibakitshine habatwele mu nshibo ya umune mukata a Bafadiseo kudia bidibwa mwifuku dia Sabado, abadi abamutala.

² Talangai, kubadi muntu kampanda ku mpala kwe badi na busungu bwa matēnde.

³ Biabia Yesu hakwibālula behwishe (bahatudi ba bishila) na Bafadiseo, ’shi, mbihwandjikile kuhwisha muntu h’efuku dia Sabado su?

⁴ Anka’bo abauminyine nyaa. Biabia bamuatshile, amuhwisha (busungu) amulekyela.

⁵ E bebalulwile’shi: A nanyi enu su e na mpunda su ñombe muhone ’mulenda, akutwa ku mwabula’ nka hanka mwifuku dia Sabado?

⁶ N’abo abakutshilwe kumwalula dimonyi ku yino myanda.

⁷ Binyibiabia babaitanyinwe, habamwene mwa basangwidile bishalelo bia ku mpala; bebēle lukindji’shi:

⁸ Hoitanyinwa na (muntu) ku bidibwa bia kubamba, toshālanga ha kishalelo kia ku mpa la, tala su kwi mungi mukukile kinemo mwitanyinwe namu kwadi.

⁹ Biabia, yawa bakwitanyine n’e hamune, afiki kodi’shi: Lekyela uno muntu yaya mbalo; n’obe obanga kuika na būfu kwenda ku mbalo ya ku nyima.

¹⁰ Anka hoitanyinwa wende okashāle ha kishalelo kia ku nyima, eshi ahakafikyi yawa bakwitanyine, akakulungula’shi: Obe, kūku kaanka kunundu: henyihaha okakekala na kinemo ku mpala kwā’ba bashala n’obe kudia.

¹¹ Mwanda muntu ese etumbisha na mwinyi, akaheleshwa; na yawa ehelesha na mwinyi akatumbishwa.

¹² Henyihaha, balungwile yawa banwitanyine namu’shi: Hotekyesha bidibwa su mbia nguba mitwe su mbia kiolwa, twetanyinanga bakuku bobe, sunga bakwenu, sunga ba-kifuko kiobe, sunga ba-mwikashi n’obe bampeta; tala su bakakwitanyina namu dimo, bakakwālwisha.

¹³ Anka hotekyesha bidibwa, wetanyina balanda, na balemane, n’abasumpikita, na bampofu.

¹⁴ Biabia obe okekala na mwabi, mwanda’bo tabe na bia kukwalwisha: mwanda okalwishwa ha kusanguka kwa balulameba mashimba.

¹⁵ Biabia a baba abadi bashale kudia n’e, habahushishe yino myanda bamulungwile’shi: Mwabi kwi yawa akadi bidibwa mu bufumu bw’Efile Mukulu.

¹⁶ Henyihaha E bamulungwile’shi, Muntu kampanda batekeshe kidibwa kikata aitanyina bebungi.

¹⁷ Ha kihindji kia kudia batumine mpik’e kulungula baba baitaminwe shi: Fikai mwanda bintu bioso mbilumbulwe.

¹⁸ Boso ababangile kwibalañanya hamune. A kwibedi bamulungwile’shi, Nemūle efuba wandji n’ao ngwa kwenda mu kwidimona: nakutekye ondekye.

¹⁹ Mungi’shi: Nemūle ñombe ekumi, nyende nkeyitompe, nakutekye ondekye.

²⁰ Mungi namu’shi: Mbambile mpiana’nde, binyibiabia ami nakutwa kufika.

²¹ Biabia yawa mpika bafikile, balubwidile nfumu e yino myanda. Henyihaha shā nshibo biadi mwikale na nsungu, balungwile mpik’eshi: Nda lubilo mu milungui na mu mpata ya kibalo, ofishe muno balanda, na balemane, n’abasumpikita, na bampofu.

²² Binyibiabia mpika bakwile’shi: A nfumwami, kibakitshibwa mobokamikila, sunga mbiabia mbalo yimudi.

²³ Biabia nfumu bakwile kwi mpika’shi, Tuka! wende mu misese na mu bihanga webashinamine batwēle nshibo yande yiule.

²⁴ Mwanda nakulungula’shi, sunga ngumune a ku baba abaitanyinwe kwibedi, anakadie ku kidibwa kiande.

²⁵ Binyibiabia, kubadi bibumbu bikata bibendanga n’e, balulwile, ebalungula’shi:

²⁶ Su kwi muntu, su nanyi su nanyi afiki kwandjimi’shi, mufutale nshye na nyin’e, na mpiana’e, na bana b’e na bakwabo balume, na bakwabo bakashi, ee, na muwa we na mwinyi namu, e teuhu kwikala mwan’ande abukishi.

²⁷ Ese muntu namu shyasemuna mutshi we uhingishene na kundonda, teuku kwikala mwan’ande a-bukishi.

²⁸ A nanyi a kwanudi su akyebe kwibaka kikunko, kwashī mushale kwibedi kubadika mulo wa’kio, su e na bia kuhudisha.

²⁹ Mwanda wa kutshina’shi, hahu kutula kibangilo akutwe’nyi kwikihudisha, biabia boso abekitala abakabanga ku muhulula.

³⁰ Eshi: Uno muntu babangile kwibaka, bakutwa kuhudisha.

³¹ Sunga nfumu kinyi, ha kwenda kulwa ngoshi na mungi nfumu, kwashīmushale kwibedi kwīhusha munda’shi: su euku kufumankana na yawa afikye mu kulwa n’e, na binunu makumi abidi, n’e sha binunu ekumi?

³² Su tamuhwandjikile, anka kutuma ben’ebalasa ha ki yawa kula kumuihusha myanda ya kihwano.

³³ Anka bia bia namu muntu ese a kwanudi shī mufutale bioso biadi n’abio, e teuku kwikala mwan’ande a bukishi.

³⁴ Mungwa wibuwa, anka, su mungwa ubatukuluka aukatwishwa na minyi?

³⁵ Tanguhwandjikile kutulwa ha nsenga nku kibundulu, (anka) bantu beusumbule hasha. E na matwi a kuhusha, ahushe.