Luka 11 - KILOMBENO KIHYA KIA NFUMWETU YESU KIDISITU

¹ Bitabibakitshine, habadi atekye mu kihindji kikampanda, habahwile, umune a bana-be-ba-bukishi bamwambile’shi: A Nfumu, etulambukishe kuteka bu bibalambukishe Yoano bana be ba bukishi.

² E bebalungwile’shi: Hanutekye nwakule’shi: Yaiy’etu e mwiilu, eshina diobe dishidikwe kishila. Bufumu bwobe bufikye. Abikyeb’eshimba diobe bikitshibwe hano ha nsenga bu biabidi bikitshibwe mwiilu.

³ Etuhe biakudia bietu kwifuku n’efuku:

⁴ Etulekyele milwisho yetu; mwanda’twe namu atulekyela muntu ese e n’etu kishio. Twetufishanga mu kutompibwa; anka wetumañune kwi (yawa) mubi.

⁵ Biabia bebambile’shi: A nanyi ēnu su e na kūku e, ēnda kwadi munkatshi mwa bufuku, amwamba’shi: A kūku, nahushe mitanda ya mampa yisatu;

⁶ Mwanda kūku ande afiki mu luendo e kwande, ami nki na kintu kia kutula ku mpala kwe.

⁷ E e mu nshibo akālula’shi: Tonkambakashanga: binobino kibi nkishite, na bana bande be n’ami ha lusala; tañuku kubuka kukuha.

⁸ Nenulungula’shi: Sunga takabuku kumuha ha mwanda wa bukūku, anka ha mwanda wa mushino we akabuku kumuha moso mwakyebele.

⁹ N’ami nenulungula’shi: Tekai, akikenuhebwa; Kimbai anukamono; kukulai, akikenushitwilwa.

¹⁰ Mwanda muntu ese atekye atambula; na yawa akimbi amono; na kwi yawa akukula akashitwilwa.

¹¹ A nanyi enu e sha mwana, su mwana amutekye dimpa akamuha ebwe? Sunga amutekye mushiha, amuha nyoka bu mushi ha su?

¹² Sunga atekye eyi akamuha kaminu su?

¹³ Biabia su anwe bebubi, anwiuku kuha bana benu bintu bibuwa: Nshyenu e mwiilu takakishakisha kuha kwi abamutekye Kikudi-E-Selelee su?

¹⁴ (Yesu) badi abingi kikudi kibi, kibadi kamama. Bitabibakitshine habatukile kikudi kibi, kinyi kia kamama kibākwile, na bantu abakanyine.

¹⁵ Anka bangi b’abo abakwile’shi: Abingi bikudi bibi kwi Bēlesebuba nfumu a bikudi bibi.

¹⁶ Bangi abamutompele, abakimbile kwadi kitundwilo kia mwiilu.

¹⁷ Ank’e beukile binangu biabo, bebalungwile’shi: Bufumu bwoso abwila muna bu na bene, abufwisha ku kusalakana; na nshibo ayilamuna ku nshibo n’ayo ayihono.

¹⁸ Su Satana namu ’mwilamune na mwinyi, bufumu bwe abukemana na minyi? mwanda anwakula’shi: Ami, nabingi bikudi bibi kwi Bēlesebuba.

¹⁹ Su’minabingi bikudi bibi kwi Bēlesebuba, a bana benu abebibingi na (bukome) bwā’nyi? biabia abakekala bansushi benu.

²⁰ Anka su’mi nabingi bikudi bibi na munwe w’Efile Mukulu, biabia bufumu bw’Efile Mukulu bubafiki kwanudi binyibinyi.

²¹ Ahekala sha bukome mufwadikwe bilwilwa, alama kihanga kie, (biabia) bintu bie mbikumbane.

²² Anka ahakafiki kwadi, mungi mumukile bukome, na kumukambila, biabia amwata bilwilwa bie bioso bibadi mukuluhile, na kwāba bintu bie.

²³ Yawa shī n’ami mwituhishene n’ami: na yawa shyakongola n’ami ahalakashā.

²⁴ Habatukile kikudi kibi kwi muntu, akiende mu bihindji biume kukimba kikisho: na hakukutwa kwikisangana, akiakula’shi: Nankāluka ku nshibo yande yinatukile.

²⁵ Hakibafikile, kibasahene ngikombe, yilumbulwe biya.

²⁶ Henyihaha kibālukileme u kuata bingi bikudi musambobidi bikikile’kio ki na mwinyi bubi, biatwēla, biabombela mwanka: na nyikashi ya kunfudilo ya yawa muntu yiakila ya kwibedi bubi.

²⁷ Bitabibakitshine habādi akula yino myanda, biabia mwana mukashi a mu kibumbu banyishish’eyi die, bakwile’shi: Mwabi ku diadi’efu dibakutandjile, na ku mabele abakōmeshe.

²⁸ Ank’e bakwile’shi: Ee! anka mwabi ngukile kwi’bo abahusha mwanda w’Efile Mukulu, na kwiulama.

²⁹ Habekohene bantu bebungi hamune, befinene, e babangile kwakula’shi: Kino nyi kihungilo kibubi: akikyebe kitundwilo, anka takikebahebwa, anka kiakia kitundwilo kia Yonasa mutemuki.

³⁰ Mwanda bibadi Yonasa bu kitundwilo kwi Bena Ninefa, anka biabia namu Mwan’a Muntu akekala ku kino kihungilo.

³¹ Nfumu mwana-mukashi a ku Sude akebō mu kimu na bantu ba kino kihungilo kwibahisha: mwanda e bafikile ku nfudilo kwa nsenga mu kuhusha binangu bia Solomone; biabia talangai, mukile Solomone bukata e hano.

³² Bena Ninefa abakebō ku kimu na kino kihungilo, abakekihisha mwanda abelangile ku bulungudi bwa Yonasa; biabia talangai, mukile Yonasa bukata e hano.

³³ Takwi muntu hahu kōsha kimunyi e kitulu mu kihindji kifamwe, sunga mushi mw’ekumbo, anka kwikitula ha kitūlo-kia-kimunyi’shi, abatwele mwanka bamon’etata.

³⁴ Etata dia mbidi nyi ’iso: binyibiabia ahekala eiso diobe di soo, mbidi yobe yishima namu ngitoshwe n’etata; anka su eiso diobe di bubi, mbidi yobe namu ngiūle mufito.

³⁵ Binyibiabia dimukai, talai su etata di munda mwenu su ’mufito.

³⁶ Biabia su mbidi yobe yoso ngitoshwe n’etata, tayi na hangi hafita, biabia ngishima ayikekala ’nka soo, anka hamune n’etata di selelee dia kimunyi adikumunyikā.

³⁷ Habadi ākula, mungi Mufadiseo bamwiyayile kudia n’e; biabia batwelele, bashalele kudia.

³⁸ Habamwene winyi Mufadiseo, bakanyine, mwanda kwibedi kwa kudia tamwioshe.

³⁹ Biabia Nfumwetu bamulungwile’shi: Binyibiabia anwe Bafadiseo anutosha ha mbidi ya kitomeno na kibaa, anka munda mwenu muule bia manyenanyi na bubi.

⁴⁰ Anwe bahatakane, yawa bakitshine ki ha mbidi, ta ne bakitshine ki munda namu su?

⁴¹ Anka mbikile buwa nuhane bia buntu ku bintu bianudi na’bio; biabia bi mu bioso mbitokye kwanudi.

⁴² Anka mpombo kwanudi Bafadiseo! mwanda anulambula ki ki’ekumi kia luenyi na kikotshi, na bihaso bioso bia midioko, anka anulekā mwa kutshibila kimu, na kifulo ki’Efile Mukulu: yino nyi yibadi yilumbulukye’nwe kukita, na kukutwa kuleka yikwabo yishī yikitwe.

⁴³ Mpombo kwanudi anwe Bafadi seo! mwanda’nwe nwi na kifulo na bishalelo bia ku mpala mu bitumbwilo, na kwimunyībwa mu mabulu a bisalwe.

⁴⁴ Mpombo kwanudi, anwe bafundji-ba-mikanda na Bafadiseo, bansesa! mwand’anwe nwi bu mashama ashī a mweka, na bantu abāshina hanka tabeashingula.

⁴⁵ Henyihaha umune a ku bahatudi-ba-bishila bamwālulwile’shi: A Mnlambukishi, hobōkula biabia bwetufukula n’atwe namu.

⁴⁶ E bakwile’shi: Mpombo kwanudi namu anwe bahatudiba-bishila; mwanda anunemeshā bantu bita bi bushito ha kutwala, n’anwe bana bene tanukumā binyi bita sunga na munwe wenu umune.

⁴⁷ Mpombo kwanudi! mwanda’nwe anwibakā mashama a batemuki, biosobi mba shyenu abebehayile.

⁴⁸ Biabia anwiakwila na kukumina bikitshino bia ba shyenu; mwanda n’abo abebehayile binyibinyi, anwe namu anwibaka mashama’bo.

⁴⁹ Nyi biabia namu bibakwile binangu bi’Efile Mukulu’shi: Nankebatumina batemuki na batumibwa, na bamo b’abo abakebeha na kwibabinga.

⁵⁰ Eshi, mase a batemuki boso, abasumbukile mpaa na ku mbangilo kwa hanohansenga, akakebibwa ku kino kihungilo.

⁵¹ Kubangila ku mase a Abele, mpaa na ku mas’a Sakadiasa, winyi bafwile hankatshi ha kitala kia bitahilo na ntempelo; binyibinyi nenulungula’shi: Anakakyebibwe ku kino kihungilo.

⁵² Mpombo kwanudi bahatudi-ba-bishila! mwanda nubakashishe lufungulo lwa kiukilo: anwe bana bene tanwi batwele, n’abo bakwete kutwela anwibakutshishwa.

⁵³ Habebalungwile biabia bafundji-ba-mikanda na Hafadiseo babangile kumwikongwela na kumukolomona kwakula myanda yibungi.

⁵⁴ Abadi abamutengyela kuhusha abituku mu kanwa mwe biabadia kumwimukila.