Luka 1 - KILOMBENO KIHYA KIA NFUMWETU YESU KIDISITU

¹ Ha mwanda be bungi abakuminyine kufunda, mu lulamine bulungudi bwa yaya myanda ayikuminwa binyibinyi munkatshi mwetu.

² Anka mwa betufwishishe’yo kwi’bo abadi bu tumonyi na balungudi ba mwanda w’Efile ku mbangilo.

³ Kwandjimi namu kibampwandjikila buwa, kukufundjila myanda yilondene, obe Mwanana Teofilusa, mwanda lushingulo lukalabale lwa myanda yoso nadi nalo, mpā na ku mbangilo.

⁴ Biodio kwiuka biabinyibinyi bia yaya myanda yobolambukishwe.

⁵ Mu mafuku a Heloda, nfumu a Yudea, kubadi tshiitemwakwidi, eshina die mbu Sakadiasa a ku mulongo wa Abiya. Mukashi e badi a ku bana bakashi b’Alone, eshina die dibadi bu Edisabeta.

⁶ Boso bubidi bwabo babādi balulame ku mpala kw’Efile Mukulu, babadi abatambuka mu bishila bioso na milangilo ya Yehowa, bashī batohekwe mwanda.

⁷ Abo tababadi na mwana, mwanda Edisabefa badi nkunga, na bubidi bwabo babadi banunu.

⁸ Bitabibakitshine habakitanga mufubo wa butshiite-mwakwidi, ku mpala kw’Efile Mukulu, mwiyīle mulongo we,

⁹ bu mubadi mulombene kihikwa kia mufubo wa bu tshiitemwakwidi, badi musangulwe kushika bukula bwa mahembwe ha kutwela mu ntempelo ya Yehowa.

¹⁰ Habakumbene nguba a kushika bukula bwa mahembwe, kibumbu kioso kia bantu kibadi akitekye hāsha.

¹¹ Kubamumwekyele mwikeilu a Yehowa, mwimane ku mboko yibalume ya kitala kia kishikilo kia bukula bwa mahembwe.

¹² Sakadiasa habamumwene, badi na katshima munda, na mō bamukwete.

¹³ Anka mwikeilu bamulungwile ’shi: Totshinanga Sakadiasa, mwanda luteko lwobe lubahushibwa, mpian’obe Edisabeta, akakutandjila mwana mulume, okamuudika eshina die bu Yoano.

¹⁴ N’obe okekala na kusehela na kusangala, bebungi abakasehela ha kutandwa kwe.

¹⁵ Mwanda akekala mukata ku meso kwa Yehowa, takatomo sunga nfinyo, sunga mbia kukolwana; e akaushwa na Kikudi-E-Selelee kwibedi kwa nyin’e tabandjile kumutanda.

¹⁶ Akālula bana ba Isalele be bungi kwi Yehowa Efile Mukulu abo.

¹⁷ N’e akēnde ku mpala kwe n’eshimba bu dia Elaidja na bukome bwe; mwanda wa kwalulusha mashimba a bashabo kwi bana babo; na bashi na kukokyela ku binangu bia balulame; na mu kulumbulwilwa Efile Mukulu bantu be na mashimb’abo ahwe kulumbulwa.

¹⁸ Biabia Sakadiasa baihwishe mwikeilu’shi: Nankeuku wawa mwanda na minyi mwanda’mi tandji mununu, na mpiana’nde tadi na bihwa bibungi?

¹⁹ Mwikeilu hakwalula bamulungwile’shi: Ami nyi Ngabudiele, naimana ku mpala kw’Efile Mukulu; natumibwa kwisamba n’obe, na kukulesha uno mukānduwibuwa.

²⁰ Talanga! okekala kamama, tokākula mpaa na h’efuku adikakitwa uno mwanda, ha mwanda twemukumine myanda yande, ayikakumbashwa ha kihindji kiayo.

²¹ Na bantu abadi abēsha Sakadiasa, abakanyine bibashalele kihindji kikata mu ntempelo.

²² Habatukile bakutshilwe mwa kwakwila na’bo; abashingulwile’ shi: bamono kimonwa mu ntempelo; mwanda e bebahaleshe na mboko, tadi kamama.

²³ Bitabibakitshine habakumbene mafuku a mufubo we bakatukile, ēnda kw’e.

²⁴ Kumongo kwa aa mafuku, mpian’e Edisabeta baimite eimi, befīle mieshi yitano’shi,

²⁵ Nyi mbiabia Efile Mukulu bankitshinyine mu mafuku abantāle, kunkasha būfu bwande munkatshi mwa bantu.

²⁶ Mu mweshi wa kasamombo, winyi mwikeilu Ngabudiele batuminwe n’Efile Mukulu ku kibalo kia Ngadilea, akilumbwa bu Nasalete.

²⁷ Kwi nsongwakashi kamame muladikwe na mulume, eshina die bu Yosefe, a mu kifuko kia Dafidi; eshina dia nsongwakashi kamame dibadi bu Madiya.

²⁸ Na mwikeilu batwele mwādi bakwile’shi: Nakwimuna, obe n’Efile bikata. Efile Mukulu E n’obe; we sha mwabi munkatshi mwa bana bakashi.

²⁹ Habamumwene badi na katshima munda ku mīsambo ye, beihwishe mwishimba die’shi, A luno lwimuno namu lwi na minyi?

³⁰ Biabia mwikeilu bamulungwile’shi, Madiya, totshinanga, mwanda obe n’efile kw’Efile Mukulu.

³¹ Tala! okemit’ēfu, otande mwanamulume, okamuudika eshina bu Yesu.

³² Akekala mukata, akalumbwa bu Mwan’a Mukile-mwiilu; na Yehowa, Efile Mukulu akamuha luhun’a nsulu lwa nshye Dafidi.

³³ N’e akabikala hanundu ha kifuko kia Yakoba, mpā na kwikala-ika; na ku bufumu bwe tabukekakala kibikwilo.

³⁴ Henyihaha, Madiya behwishe mwikeilu’shi: A kino akikakitshibwa na minyi, mwanda ntshimwiukye mulume?

³⁵ Mwikeilu bamwalulwile’shi, Kikudi-E-Selelee akafiki hodi, na bukome bwa Mukile-mwiilu abukakubwikila bu mutala; biabia namu akia kiokatanda kihatulwe-kikishila akikalumbwa bu Mwan’Efile Mukulu.

³⁶ Talanga namu: mukwenu a kifuko Edisabeta, baimita namu mwana mulume ku bununu bwe, na uno nyi mweshi wa kasamombo, e abādi abalumbwa bu nkunga.

³⁷ Mwanda kw’Efile Mukulu takwi kiakumukambila, ooo.

³⁸ Biabia, Madiya bakwile’shi: Talanga’mi nyi mpika mukashi a Yehowa, wikale n’ami mwiyile eyi diobe. Na mwikeilu bakatukile kwadi.

³⁹ Na mu aa mafuku Madiya bebwele, bayile lubilo mu nsenga ya ngulu, mu kibalo kia Yuda.

⁴⁰ Batwēle mu nshibo ya Sakadiasa, bemwine Edisabeta.

⁴¹ Bitabibakitshine, Edisabeta ha kuhusha kwimuna kwa Madiya, mwana batumbukile mwifu die; n’Edisabeta baulwe na Kikudi-E-Selelee;

⁴² Bakwile n’eyi dikata’shi: We sha mwabi munkatshi mwa bana bakashi, na ki mwifu diobe nkia mwabi namu.

⁴³ A uno mwanda wi na minyi ubafiki nyin’a Nfumwami kwandjimi?

⁴⁴ Talanga! habafik’eyi dia kwimuna kobe mu matwi ande, mwana batumbuka munda mwande ha mwanda wa kusehela.

⁴⁵ Mwabi kwi yawa bakuminyine; mwanda akukekala kukitshibwa kwa yaya myanda yibamulungwilwe kwi Yehowa.

⁴⁶ Biabia Madiya bakwile’shi: Eshimba diande aditumbisha Yehowa,

⁴⁷ Na kikudi kiande akisehela mw’Efile Mukulu muhashi ande.

⁴⁸ Mwanda batadile ha mwikelo wa kuheleshwa kwa mpik’e mukashi: Talanga! mpaa na bino, bihungilo bioso abikañitanyina bu sha mwabi.

⁴⁹ Mwanda yawa e na katshintshi bankitshina bintu bikata N’eshina dia ndjihatulwe-di-kishila.

⁵⁰ Lusa lwe lwi ku bihungilo na bihungilo kwi’bo abamutshinyi.

⁵¹ Balesheshe bukome na mboko ye; Bahalakeshe basha kwisadika mu mpwandjikisho ya mashimba’bo.

⁵² Baheleshe basha matalwa ku mpuna yabo; bakamishe bantu ba bisumanga.

⁵³ Bausha basha nsala na bintu bibuwa, na bampeta ebālusha bisumanga.

⁵⁴ Basambile Isalele mufubi E, lia kutentekyesha lusa lwe.

⁵⁵ Mu bakwidile kwi bashyetu, kwi Abalahama na ku twikulu twe kwikala-ika.

⁵⁶ Madiya bashalele n’e hehi mieshi yisatu, biabia balukile kwabo.

⁵⁷ Henyihaha kihindji kia Edisabeta kibakumbene kia kutanda, batandjile mwana mulume.

⁵⁸ Bekashi n’e na bakwabo ba kifuko abahushishe mu bamulesheshe Efile Mukulu lusa lukata, abasehelele n’e.

⁵⁹ Bitabibakitshine, h’efuku dia mwanda abafikile kusala mwana; bamūdikye bu Sakadiasa, mwiyile eshina dia nshye.

⁶⁰ Nyin’e bālulwile’shi: Ooo, tandiadia, akaudikwa bu Yoano.

⁶¹ Abamulungwile’shi: Takwi muntu mu kifuko kiobe mūdikwe diadi’eshina, ooo.

⁶² Abahwandjikishe nshye mifunda’shi: Omūdika bu’nyi?

⁶³ Biabia, batekyela kia kufunda, afunda hanka’shi: Eshina die mbu Yoano. Boso abakanyine.

⁶⁴ Ku leanwa kwe kubabulwilwe anka kahindji n’āka, n’edimi di’e hamune; bakwile, tatumbishe Efile Mukulu.

⁶⁵ Na moo ubakwete boso abadi bashale hehi n’abo; na yino myanda yoso yibalungwilwe ku nsenga yoso ya ngulu a Yudea.

⁶⁶ Biabia boso abahushishe, abeyibikile’mashimba’bo’shi: A uno mwana akekala kihaso kinyi? n’easa dia Yehowa dibadi n’e.

⁶⁷ Nshye Sakadiasa baushishwe na Kikudi-E-Selelee batemukile’shi:

⁶⁸ Mwabi wikale kwi Yehowa Efile Mukulu a Isalele mwanda basambile bantu be, na kwibafishisha kikudilo.

⁶⁹ Betwibweshesha lusengwa lwa kihandjilo mu nshibo ya mufubi e Dafidi.

⁷⁰ Mu bakudile ku kanwa kwa batemuki be bahatulwe-be-kishila, abadi bekale ku mbangilo kwa hanohansenga mpaa na binobino.

⁷¹ Eshi, tukahashibwa kwi beshikwene n’etu, na kwiasa diabetushikwa boso.

⁷² Kusamba bashyetu lusa, na kunangushena kilombeno ki’e kihatulwe-ki-kishila.

⁷³ Nyi mutshiho ubatshihile kwi nshyetu Abalahama.

⁷⁴ Eshi, etukumine’twe bamañunwe mu maas’abeshikwene n’etu, tumulangwile kushī na moo;

⁷⁵ mu kuhatulwa-kwi-kishila na kululama ku mpala kw’e, mpaa na mafuku oso a muwa w’etu.

⁷⁶ N’obe mwana, okalumbwa bu mutemuki a Mukile-mwiilu, mwanda okabadila ku mpala kwa Yehowa kumulumbulwila mashinda E.

⁷⁷ Kuha bantu b’e kiukilo kia kihandjilo mu kulekyelwa kwa myanda yabo.

⁷⁸ Ha mwanda wa kutshitshimuka kwa kanya k’Efile Mukulu etu. Nyi habetufikila kutunduka kwa nguba mwiilu manyanya.

⁷⁹ Kumunyika’ba bashale ’mufito na mu mwesheshi wa lufu. Kukunkusha ngwa yetu mwishinda dia kufukama.

⁸⁰ Na mwana bakūle, banyingile mwishimba, badi mu tubāka mpaa na kwifuku dia kumwekwa kwe kwi Isalele.