I Yoano 2 - KILOMBENO KIHYA KIA NFUMWETU YESU KIDISITU

¹ Anwe bana bande bakinga batomibwe kifulo, yino myanda nenufundjila’shi, tanukasolanga mwanda.

² Anka’nyi su (muntu) alishwa, twi na Musangi a kwi Yaiya, nyi Yesu Kidisitu mululame; e nyi kilombeno kia milwisho yetu; ta ñanka kia yetu buhenka ooo, anka nkia bahanohansenga boso.

³ Mu yino yinyi twibeukye’shi, atumwiuku, su atulama milangilo ye.

⁴ Yawa akulashi: Namwiuku, a kunyi talama bishila bie (biabia) e nsha madimi, na biabinyibinyi tabi munda mwe;

⁵ ank’ese akulama Mwanda we, binyibinyi kifulo ki’Efile Mukulu kibakumbashwa munda mwe: mu yino yinyi atwiuku’shi, twi mwadie.

⁶ Yawa akula’shi: Nyi mubombele mwadi, e na mwinyi namu wadi n’ao ngwa kukit’amukitshin’e.

⁷ Bakwetu, nkimufunde mulangilo uhya kwanudi, anka mulangilo wa kala wanubadi n’ao ku mbangilo. Mulangilo wa kala nyi Mwanda wanubahushishe ku mbangilo.

⁸ Dimonyi, mulangilo uhya wanenufundjila, au winyi mbinyibinyi mwadie na mwanudi namu. Mwanda mufito aukilā, n’etata dia binyibinyi adimunyikā binobino.

⁹ Yawa akula’shi: yimwitata, a kunyi ashikwa mukwabo, (biabia) e mu mufito mpaa na binobino.

¹⁰ Yawa akwikala na mukwabo kifulo abombelā mwitata, na tamwi kiakukokosha.

¹¹ Anka yawa ashikwa mukwabo e mufito, atambuka namu mu mufito, teuku kw’ēnde, mwanda mufito ubamutule meso.

¹² Nenufundjila bana bande batomibwe kifulo, mwanda milwisho (yenu) yibenulekyelwa ha mwanda w’eshina die.

¹³ Nenufundjila (anwe) bayaiya, mwanda nwi bahwe kwiuka Yawa a ku mbangilo, Nenufundjila anwe basongwalume, mwanda nubashindji winyi mubi. Nenufundjila anwe bana bakinga, mwanda nwi bahwe kwiuka Yaiya.

¹⁴ Nahu kwinufundjila, anwe bayaiya, mwanda nwi bahwe kwiuka yawa a ku mbangilo. Nahu kwinufundjila anwe basongwalume, mwanda nwi na bukome, na Mwanda w’Efile Mukulu ngubombele munda mwenu, n’anwe tanuhwile kushinda yawa mubi.

¹⁵ Tanwikalanga na myanda ya bahanohansenga kifulo, sunga mbintu bi hanohansenga. Su nanyi su nanyi e na bia hanohansenga kifulo, (biabia) kifulo kia Yaiya taki munda mwe.

¹⁶ Mwanda, bintu bioso bi hanohansenga, lwabi lwa ku mbidi, na lwabi lwa ku meso, na kwinemeka kwa muwa ta mbia Yaiyo, ooo, anka nyi mbia hanohansenga.

¹⁷ Na bia hanohansenga na lwabi lwabio abishimina; anka yawa akitshi amukyebela eshimba di’Efile Mukulu ekadidila ikala-ika.

¹⁸ A bana bakinga nyi nkihindji kia kunfudilo, na mwanubahushishe’shi: Mwituhishene na Kidisitu anakafikye, na hano namu kwi betuhishene na Kidisitu be bungi, nyi henyi hatwiuku’shi, kino nyi nkihindji kia kunfudilo.

¹⁹ Abo abakatukile kwatudi, anka tababadi b’atwe, ooo; mwanda su’bo bubadi b’ātwe, babadia kwikadidilu n’etu, anka’nyi (abakatukile) mwabadia kwifumbwila’shi, boso tababadi b’ātwe, eoo.

²⁰ N’anwe nwibahongolwelwe-mwimu kwi’wa Muhatulwe-a-kishila, anwiuku namu myanda yoso.

²¹ Nki mwinufundjile, mwanda w’anwe tanwi beukye (Mwanda wa) biabinyibinyi, anka mwanda’nwe anwiuku, na ha mwanda’shi, madimi ta nga biabinyibinyi.

²² A nanyi sha madimi, anka yawa atunu’shi: Yesu ta nKidisitu? E nyi Mwituhishene na Kidisitu atunu Yaiya na Mwana.

²³ Awa akutuna Mwana, su nanyi su nanyi, te na Yaiya. Yawa asokola Mwana e na Yaiya namu.

²⁴ Wawa wanubahushishe ku mbangilo wikadidile mwanudi. Su wawa wanubahushishe ku mbangilo awikadidila munda mwenu, (biabia) anwe namu anukekadidila mu Mwana na mu Yaiya.

²⁵ Na uno nyi mulayilo wabetulayile, nyi muwa wa ikala-ika.

²⁶ Yino myanda tampwile kwinufundjila ha mwanda w’aba abenōngola.

²⁷ Anka kwinyi kushingwa kwa mwimu kwenu kwanubashingilwe kwadi kwikale munda mwenu, na tanwi na lukalo’shi, betulambukishe, ooo: anka bu kwinyi kushingwa kwa mwimu akwinulambukisha ha myanda yoso, ngia binyibinyi, ta ngia madimi, na mwakubenulambukisha, anukekadidila mwandie.

²⁸ Biabia binobino bana bakinga batomibwe kifulo, nwikadidile mwadie’shi, hakantweka twikale na kukankamana, na kushi kwikala na būfu ku mpala kwe ha kufika kwe.

²⁹ Su anwiuku’shi, E mululame (biabia) anwiuku’shi, muntu ese akitshi kululama e mutandjibwe kwadie.