I Temote 4 - KILOMBENO KIHYA KIA NFUMWETU YESU KIDISITU

¹ Anka Kikudi-E-Selelee ākula na kushinkamisha’shi: Mu a mafuku a kunfudilo bamo abakalamunuka ku lukumino, abakanemena ku bikudi abibōngola, na ku ndambukisho ya mikishi;

² abākula madimi mu bunsesa, be n’eshimba diabo dia munda ditunde bu dihye kālo.

³ Abalekyesha kubamba (bakashi,) na kushidisha bidibwa bibahangile Efile Mukulu kutambulwa na lutumbu kwi’bo bakumine, beukidile biabinyibinyi.

⁴ Mwanda bihangibwe bioso bi’Efile Mukulu su mbinyi su mbinyi bi’anka buwa, na takwi sunga nkimune kiakushilwa, su kibadibwa na lutumbu.

⁵ Mwanda kibahatulwa-ki-selelee ku Mwanda w’Efile Mukulu na luteko.

⁶ S’otentekyeshā bakwetu yino myanda, (biabia) okekala mufubi ebuwa a Kidisitu Yesu, mudishibwe na myanda ya lukumino na ya lulambukisho lwibuwa, yiotobolamatshile hehi.

⁷ Anka wehengye miele ya butete ya bakashi banunu, wehash’obe na mwinyi ku bumwin’Efile.

⁸ Mwanda lwinyisho lwa ku mbidi kumwena kwa’to nkuhela, anka bwin’Efile abumwenwa mu bintu bioso, bwi na mulayilo wa muwa wa binobino na wa ukafiki.

⁹ Uno mwanda ngwa kishima, nguhwandjikile kukuminwa koso.

¹⁰ Nyi ha tudi batuhwite na kusābulwa mwanda twibakuluhile mw’Efile Mukulu a muwa, e, nyi muhashi a bantu boso, tokiokwamba kwi bakumine.

¹¹ Yino myanda okayikye na kulambukisha.

¹² Tokuminanga muntu kusābula bunsongwalume bobe, ooo; anka wekale kihwandjikisho kia bakumine mu mīsambo na mu nyikashi, mu kifulo, mu lukuluhilo, (na) mu buselelee.

¹³ T’ēshimba ku lubalo (lwa mukanda) kwilanga, na ku lulambukisho.

¹⁴ Tolekanga buntu bwi munda mobe, bubakuhelwe ha lutemuko lwa myanda, ha kutenteka kwa maasa a bakulu.

¹⁵ Nangushena ha yino myanda; otwelelele mwanka’shi, kusungula kobe kumwekye kwi boso.

¹⁶ Wedimuky’obe na mwinyi na ku lwinyi lulambukisho; olamate mwanka; mwanda hakukita biabia okehasha obe na mwinyi, n’aba abakuhusha.