I Bena Tesalonika 5 - KILOMBENO KIHYA KIA NFUMWETU YESU KIDISITU

¹ Anka ha mwanda wa bihwa na bihindji biabio bakwetu, tanwi na lukalo’nyi lwa’mi kwinufundjila.

² Mwanda’nwe bana bene nwibahwe kwiuka kalolo’shi, dinyi efuku dia Nfumwetu adikafiki hamune bu ngifi mu bufuku.

³ Mwanda liabakākula’shi: Kubafukama, ’nka nya, na kukumbana, biabia kulwishibwa akukahulumuka’nka habadi, anka hamune bu mwana mukashi asumibwa na munda mwa kutanda; biabia tabakahanda, ooo.

⁴ Anka’nwe bakwetu tanwi mu mufito’shi, diadi’efuku adikenuhulumukīla bu ngifi, ooo.

⁵ Anwe boso nwi bana b’etata, na bana b’efuku; tatwi ba ku bufuku, sunga mba ku mufito.

⁶ Binyibiabia tatulalanga tulo bu bangi, ooo, anka twikale abatala na bāmpila.

⁷ Mwanda’bo abalalatulo abalala bufuku; n’abo abakolwa abakolwa bufuku.

⁸ Anka’twe ba kwifuku twikale bāmpila, na kufwala ngabo-ya-kiadi ya lukuluhilo na ya kifulo, na kilama kia mutwe, (lwinyi) lutengyelo lwa kihandjilo.

⁹ Mwanda Efile Mukulu tamwitusangule ku nsungu, ooo, anka kutambula kihandjilo kwi Nfumwetu Yesu Kidisitu,

¹⁰ betufwidile’shi, sung’atutala, sung’atulala tulo, atukabombela n’e hamune.

¹¹ Biabia nwinyishenei hamune, na kwēleshena mwiilu, mwi mwanukitshina na bino.

¹² Anka atwinusendel’anwe bakwetu, nushingule benyi abatuhuta munkatshi mwenu, be hanundu henu mu Nfumwetu na kwinulanga,

¹³ na kwibanemesha bikata bi moo mu kifulo ha mwanda wa mifubo yabo. Nwikale (namu) balombane munkatshi mwenu.

¹⁴ Atwinulanga’nwe bakwetu’shi: Dimunai be na mpuha, nyishai be na mashimba abo fule, kankamishai basha butūba, nwikale na kwishinka ku mpala kwa (bantu) boso.

¹⁵ Talānga muntu su nanyi su nanyi akālula bubi ku bubi; anka nulonde’kia kibuwa bukyelebukyele kwi’nwe banabene na kwi bantuboso.

¹⁶ Sehelai mafuku oso.

¹⁷ Nutekei kushī mpwilo.

¹⁸ Tumbulai (Efile Mukulu) mu bintu bioso, mwanda nyi amukyebel’eshimba di’Efile Mukulu mu Kidisitu Yesu kwanudi.

¹⁹ Tanukashimanga Kikudi-E-Selelee.

²⁰ Tanukasabulanga mitemuko.

²¹ Shishai bintu bioso, nulamatei’kia kibuwa.

²² Shalai ku bihaso bioso abihwandjikisha bu bubi.

²³ N’Efile Mukulu a kufukama e na mwinyi enulamuna selelee bushima; na kikudi kienu, n’eshimba dienu na mbidi yenu bikale bibambībwe bishima bishyabitohekwa mpaa na ku kufika kwa Nfumwetu Yesu Kidisitu.

²⁴ E nwitanyina e na kishima, e nyi akekikitshi.

²⁵ (Anwe) bakwetu nwitutekyele.

²⁶ Nunyimwinei bakwetu boso na kufifya kulamunwe-kwi-selelee.

²⁷ Nakukayikila kwi Nfumwetu’shi: Uno mukanda ubadibwe kwi bakwetu boso balamunwe-bakishila.

²⁸ Bumuntu bwa Nfumwetu Yesu Kidisitu bwikale n’enu. Amena.