I Bena Tesalonika 3 - KILOMBENO KIHYA KIA NFUMWETU YESU KIDISITU

¹ Binyibiabia hatubakutshilwe mwa kutalesh’mashimba, tubatentekyeshe’shi, bibuwa tulekibwe buhenka mu Atene;

² biabia tubatumine Temote mukwetu mufubi mulungudi-Efile, mufubi n’etu mu mukāndu-wibuwa wa Kidisitu, kwinukankamisha, na kwinusenga (mashimba) ha mwanda wa lukuntino lwenu:

³ tala muntu su nanyi su nanyi akasanyishwa ku bino bishiotshi: mwanda’nwe ba na bene nwibahwe kwiuka’shi, twibasangwilwe bianka.

⁴ Mwanda binyibinyi hatubadi n’enu, tubenulungwile kwibedi’shi, tatudi hehi na kumona bishiotshi, anka mwabibamwekyele, anwiuku.

⁵ Nyi mpa uno mwanda namu hanakutshilwe mwa kutalesh’eshimba, natumine’shi, ñūkye lukumino lwenu, mwanda’shi, tala winyi mutompi tabenutompele, na mifubo yetu tayibahwile kwikala bu bisumanga.

⁶ Anka hatahabafikile Temote kwanudi na kwatudi, etufishisha nkumo yibuwa ya lukumino lwenu na kifulo, na bianwitutentekyesha biya mafuku oso, na kudila bikata’shi: Twibamone, n’atwe namu anka hamuue kwanudi’nwe.

⁷ Binyibiabia anwe bakwetu, tubadi basengībwe ’mashimba ha mwanda wenu, mu malwa na bishiotshi bietu ku lukumino lwenu.

⁸ Mwanda binobino, kwatudi’twe, nyi nkuhasuka mu muwa su nwibakankamahe mu Nfumwetu.

⁹ Atukatumbula dimonyi naminyi kw’Efile Mukulu ha mwanda wenu, ha mwanda wa muloo woso watudi n’ao ha mwanda wenu ku mpala kw’Efile Mukulu;

¹⁰ bufuku na kanya atukishakisha kuteka’shi, tumone nkyebo yenu na biatudia kukumbasha’kia kibalobela mu lukumino lwenu?

¹¹ Binobino Efile Mukulu na mwinyi, Yaiy’etu na Nfumwetu Yesu etulesh’eshinda dietu dia kwanudi.

¹² Anka Nfumwetu enwikashe anwend’anufw’imanga mu kwitomeshena kifulo, na kwi (bantu) boso, anka hamune mwatukitshina’twe kwanudi’nwe.

¹³ Ha mwanda wa kwinukankamisha mashimb’enu (ekala) ashī atohekwe mu kulamunwa-kukishila ku mpala kw’Efile Mukulu, winyi Yaiya, hakufika kwa Nfumwetu Yesu hamune na boso be balamunwe-bakishila.