I Bena Kodinda 9 - KILOMBENO KIHYA KIA NFUMWETU YESU KIDISITU

¹ Ami nki muluñantu su? Ami nki mutumibwa su? Nkimumone Nfumwetu Yesu Kidisitu su? Anwe, tanwi bu mufubo wande mwi Nfumwetu su?

² Su nki mutumibwa kwi bangi, kwanudi’nwe takwi mialasheno, anka biabia: mwanda’nwe nwi bu kitundwilo kia butumibwa bwande mu Nfumwetu.

³ Kwibingisha kwande kwi’ba abantompo nyi mbino.

⁴ Tatwi na matalwa a kudia n’a kutoma su?

⁵ Tatwi na matalwa kukunkusha mukashi mukumine hamune na bangi batumibwa na bakwetu ba mu Nfumwetu, na Kefasa?

⁶ Ank’ami na Banabasa tatwi na matalwa a kushila mifubo su?

⁷ A nku kihindji kinyi a kwifutā muntu na mwinyi ha kwenda mu ngoshi? A nanyi adimā efuba dia mitshi ya nfinyo, tadi bikuba bia’yo? A nanyi akunkushā lombe, tatomo mabele a’lo?

⁸ Yino yañakula, nākula bwamwakwila bantu su? A mukanda wa bishila tangwakule namu hamune su?

⁹ Mwanda ubafundjilwe mu mukanda wa-bishila wa Mosesa’shi: Toanyanga (ku kanwa) kwa ñombe ayihūlu ngano. Efile Mukulu talamā ñombe su?

¹⁰ Su ebākwile (biabia) anka ha mwanda w’atwe? Mbinyibinyi nyi ha mwanda w’etu ubafundjibwa’shi, yawa adimā adime na kutengyela, na yawa ahulā (ngano) na kutengyela, bibuwa ebimone mu lutengyelo lwe.

¹¹ Su tubakunyine kwanudi bintu bia kikudi, kwi mwanda ukata su atutambula bintu bienu bia hanohansenga su?

¹² Su bangi be na matalwa ano hanundu h’enu, atwe, tatwi bakambe kukila su? Ank’atwe tatwi beatshile matalwa ano, ank’atwilekyeshā mu bintu bioso, tala tuabamba mukāndu-wibuwa wa Kidisitu.

¹³ Tanwiuku’shi, baba abafubila bintu bihatulwe-bi-kishila abadiya ku bintu bia mu ntempelo (y’Efile,) n’abo abemanā ku kitala kia bitahilo be na biabo bia bitahwa su?

¹⁴ Nyi mubasangwidile Nfumwetu’shi, abo abalungulā mukāndu wibuwa, bekale bakumwena mwanka bia mukāndawi-buwa.

¹⁵ Ank’ami nkimwiatshile bino bintu, sunga nkufunda yino myanda’shi, bikitshinwe biabia kwandjimi, ooo; mwanda ngukile buwa ami kufwa he muntu, su nanyi, su nanyi, alula kwitumbisha kwande bu kwa bisumanga.

¹⁶ Mwanda sunga nalungula mukāndu-wibuwa nki na bia kwitumbisha, ooo, mwanda wandji n’au ngwa ku’nemena wanka; ee, mpombo kwandji’mi su ntandungula mukānduwibuwa.

¹⁷ Mwanda su nankitshi uno’u na musanku, nyi na bwedi, anka su tawi mwishimba diande, nyi na bulami (bwa mukandu-wibuwa) bwandji muhēbwe.

¹⁸ A binyibiabia bwedi bwande nkinyi? Eshi, mbinyibinyi ñamba’shi, handungula mukāndu-wibuwa, nalungula mukāndu-wibuwa wa Kidisitu kwanshyafutshibwa kuhela’shi, tala nankalwisha matalwa ande mu mukāndu-wibuwa w’Efile.

¹⁹ Mwanda sunga nyi muluñantu kwi boso, biabia nealule’mi na mwinyi bu mpika a boso’shi, mwandjia kukamba kukuminyisha bebungi.

²⁰ Kwi Bena Yuda namu nealule tandji mwina Yuda, mwandjia kukuminyisha Bena Yuda; kwi bo be mu mukanda wa-bishila, ami namu nyi mwanka’shi, mwandjia kukuminyisha aba be mu mukanda-wa-bishila.

²¹ Kwi baba bashi na mukanda-wa-bishila, ami namu mpamune, (nki mwikale bisumanga mukanda-wa-bishila kw’Efile Mukulu, anka nyi ku mukanda-wa-bishila kwi Kidisitu) mwandjia kukuminyisha aba bashī na mukanda-wa-bishila.

²² Kwi’bo batūba nealulwile bu mutūba mwandjia kukuminyisha batūba. Kwi bantu boso nebealulwidile bu bintu bioso mwakuhashisha bamo su mbi kunyi, su mbi kunyi.

²³ Nakitā bino ha mwanda wa mukāndu-wi-buwa eshi, nyikale a kutambwila mwanka.

²⁴ Tanwiuku’shi, aba abeshiena mu lubilo lwabo, abasuka ne? Anwe, biabia sukai, mwanudia kukatambwila.

²⁵ Boso, anka atambula bwedi ngumu-Muntu ese kwete kunyisha (biabia) e na kwitonga mu bintu bioso. N’abo abeukitshi, abakitshi’shi: Tutambule kilongo akilwilā, ank’atwe atukitshi mwakutambwila kishiakilwilā.

²⁶ Binyibiabia, ami nasuku biabia lubilo, lushī na mialasheno; nekuhishena, kushi bu umune akuhila luhahi, ooo.

²⁷ Anka’mi natonto mbidi yande, neikokeshe’shi, tala su mbi kunyi su mbi kunyi, hankalungula mukāndu-wi-buwa kwi bangi, ami na mwinyi nadia kwikala mutunyibwe.