I Bena Kodinda 8 - KILOMBENO KIHYA KIA NFUMWETU YESU KIDISITU

¹ Ha mwanda wa bintu abilambulwa mankishi atwe boso twi na kiukilo. Kiukilo akitatulā, anka kifulo akikankamisha.

² Su muntu ese anangushena’shi, neuku kintu, e tabandjile kwiuku kintu mwakidi kihwandjikile kwiuka, ooo.

³ Anka su muntu e n’Efile Mukulu kifulo, winyi e muukibwe n’e.

⁴ Binyibiabia mwiyile kudia kw’abia bintu abilambulwa kwi mankishi, atwiuku’shi, nkishi tankintu hanohansenga, na takwi mungi Efile Mukulu, anka umunenka.

⁵ Sunga be kwanka abaudikwa bu b’efile, su mbe mwiilu su mpanohansenga, (mwanda kwi b’efile bebungi na batontshi be bungi).

⁶ Anka kwatudi’twe kwi Efile Mukulu umune, e nyi Yaiya, mwadi e nyi mutukye bintu bioso, n’atwe twi mwadi e, na Nfumu umune Yesu Kidisitu, mubatukile bintu bioso, n’atwe namu.

⁷ Sunga mbiabia kiukilo kino taki mu muntu ese, ooo; mwanda bangi hakuubila ku mankishi, abadi biakudia bibahu kulambulwa kwi nkishi, na biabia muntu e munda mwabo e ’mutuba balwishibwa.

⁸ Anka bidibwa tabiuku mwa kwitwifubusha kw’Efile Mukulu; mwanda sunga biatushyatudia biakudia, tatwi bakambe bubi, sunga biatudia tatwi bakambe buwa.

⁹ Anka nudimukye’shi, buno bukome bwenu tabukālulukanga bu kikokwesho kwi baba batūba.

¹⁰ Mwanda su muntu akumono’ be, sha kiyukilo, kwete kushala ha bidibwa bia mu nshibo ya mukishi, a biabia, muntu e munda mwe e mutūba, takakomeshibwa kudia abia bintu bibalambwilwe mankishi su?

¹¹ Na biabia ha mwanda wa kiukilo kiobe, winyi sha butūba abafwidile kwi Kidisitu, analwikye.

¹² Anka hanusolo myanda kwi bakwetu ba mu Kidisitu biabia, na kutaha muntu mutūba e munda mwabo, (biabia) anusolā myanda kwi Kidisitu.

¹³ Binyibiabia su bidibwa abikokosha mukwetu, biabia tankadi’nyi bidibwa mpaa na kwikala-ika’shi, tala nankakokosha mukwetu.