I Bena Kodinda 6 - KILOMBENO KIHYA KIA NFUMWETU YESU KIDISITU

¹ Muntu a munkatshi mwenu e na mwanda na mukwabo ngakukuma kwenda ku kimu kia bashī balulame, kwa shī afikile ku mpala kwa bahatulwe-ba-kishila su?

² Tanwiuku’shi, bahatulwe-ba-kishila nyi abakatshibila ba hanohansenga (kimu) su? Biabia, su bahanohansenga abakatshibilwa (kimu) kwanudi, tanwi bahwandjikile kutshiba myanda yikile yikwabo buhela su?

³ Tanwiuku’shi, twanakatshibile bamwikeilu (kimu) su? A ha myanda yinemene ku muwa wetu, tatukakidi mu yanka su?

⁴ Su mbiabia nwi na bitshibilo bia myanda binemene ku uno muwa, nutule bakutshiba myanda, baba, bashī bakambe kutumbishwa mu kikoñeno ki’Efile.

⁵ Nākula bino kwinukwatshisha būfu. A biabia munkatshi mwenu tamwi sha binangu? Sunga ngumune euku kutshiba (myanda) hankatshi ha bakwabo su?

⁶ Anka mukwenu mu Kidisitu, ēnde na mukwabo ku kimu, ku meso kwa bashībakumine.

⁷ Binyibiabia munkatshi mwenu hamudi kilema kikata, mwanda anwilobeshena ku kimu anwe bana bene. A nkinyi tanukumina kutombokyelwa? A nkinyi tanukumina sunga nkudimbilwa?

⁸ Ayoyo! Anwe anwitombokeshena, na kudimbila bakwenu.

⁹ Tanwiuku’shi: Bashībalulame tabakahyana bufumu bw’Efile Mukulu? Tanubembibwanga, sunga basha kukyebana-kyebana, sunga balangwidi ba mankishi sunga basha lusandji, sunga bakwilwisha abo bana bene bu bakashi, sunga bakwilwisha abo bana bene na balume,

¹⁰ sunga bangifi, sunga basha malaka, sunga bakodi ba malwa, sunga bankanyi ba mulomo, sunga banyenanyi, tabakahyana bufumu bw’Efile Mukulu, ooo.

¹¹ Anka biabia nyi bibadi bamo ba munkatshi mwenu, anka (bino) nwibasudibwe, nwibalamunwe-selelee, nwibabingishwe mwishina dia Nfumwetu Yesu, na kwi Kikudi-E-Selelee e Efile Mukulu etu.

¹² Bintu bioso nki n’abio kishila’mi, anka bintu bioso tambindombene (kwi bikita); bintu bioso nki n’abio kishila, anka tankamunyibwa ku matalwa ābio, sunga nkimune.

¹³ Bidibwa mbia mwifu, efu namu ndia bidibwa, anka Efile Mukulu nyi akedilwisha, n’abio namu. Anka mbidi tangia lukyebanokyebano, ooo, nyi ngia Nfumwetu, na Nfumwetu namu nga mbidi.

¹⁴ Efile Mukulu basangwile Nfumwetu ku lufu, n’atwe namu aketusangula ku bukome bwe.

¹⁵ Tanwiuku’shi, mbidi yenu nyi mbiakumbidi ya Kidisitu? A henyihaha nate biakumbidi bia mwana mukashi sha lusandji su? Aa, leka, leka.

¹⁶ Nkinyi? tanwiuku’shi, e ēnde kwi mukashi sha lusandji abelungishena tambidi yimune su? Mwanda e bakwile’shi; Babidi, abakāluluka bu mbidi yimunenka.

¹⁷ Anka yawa mwilungishene na Nfumwetu tadi kikudi kimune.

¹⁸ Sukai lukyebanokyebano. Mulwisho woso aukitshi muntu tawi ku mbidi, anka e akitshi lukyebanokyebano alwisha ku mbidi ye yi na mwinyi.

¹⁹ Nkinyi? tanwiuku’shi, mbidi yenu nyi ntempelo yishidikwe ya Kikudi-E-Selelee e munda mwenu, anwibahebwe kw’Efile Mukulu su? n’anwe tanwi na yenu?

²⁰ Mwand’anwe nwibaudibwe na mulo (ukata): binyibiabia nutumbishe Efile Mukulu ntumbo mu mbidi yenu, na mu kikudi kienu, abio mbi’Efile Mukulu.