I Bena Kodinda 16 - KILOMBENO KIHYA KIA NFUMWETU YESU KIDISITU

¹ Ha mwanda wa mulambu wa bahatulwe-ba-kishila, anka mwanalayile ku bikoñeno bi’Efile bia ku Ngadilea, n’anwe namu nukite hamune.

² H’efuku dia kwibedi dia lubingo, muntu ese muntu ese a anwe abombeleshe kihindji kia mono, anka mu muhele Efile Mukulu’shi, takukekala’nyi mpungo ya milambu hankafiki.

³ Biabia hankafiki, nankatumu baba, su mbanyi su mbanyi, banukakumina ku mikanda, kutwala bia-buntu bienu ku Yelusalema,

⁴ Na su mbilombane’shi, aminamu nyende, abakēnden’ami.

⁵ Biabia nankafiki kwanudi hankakidi mu Masedonya; mwanda’mi nankakidi mu Masedonya.

⁶ Hangi su nankekala n’enu, ee, su nkwishiho’shi, nukanshindjikile ha luendo lwande, koso kwanyende, su nkunyi su nkunyi.

⁷ Mwanda tankyebe kwinumona binobino mwishinda, anka natengyela’shi, nankashāla n’enu kihindji su Nfumwetu akumina.

⁸ Anka nankashāla ku Efisesa mpaa na (h’efuku) dia (Pentecōte.)

⁹ Mwanda kibelo kikata (kia mifubo) kibanshitwila, bakutshishwe bebungi namu be kwanka.

¹⁰ Su Temote afiki, bibuwa nutale ekale n’enu kushī na moo; mwanda afubu mufubo wa Nfumwetu anka hamunenka mwa nfubilā.

¹¹ Binyibiabia takukekalanga muntu akumubendela, anka numushindjikile ha luendo lwe na kufukama, mwadia kufikila kwandji, mwanda’mi nkwete kumutengyela na bakwetu hamune.

¹² Ha mwanda wa mukwetu Apolosa, namulangile bikata kufika kwanudi, na bakwetu ba mu Kidisitu, anka eshimba die tandjikumine, sunga mpahela kufika ha kino kihindji; anka e akafiki hakamono mwa kukitshina biabia.

¹³ Nudimukyei, nushimatei mu lukumino, nwikale bu bana-balume, nukankamanei.

¹⁴ Bioso bianukitshi bikitshibwe na kifulo.

¹⁵ Anka nenusendela bakwetu (nwibahwe’ kwiuka’shi, ba mu nshibo ya Setefanase, be bu bikuba bia kwibedi bia mu Akaiya, n’abo namu abetudile kufuba mutubo wabahatūlwe be-kishila).

¹⁶ Eshi, anwe (namu) nukokyelei be biabia na kwi boso abakwashia mu yino mifubo, na kutuhwita mwanka.

¹⁷ Nasehela ha mwanda wa kufika kwa Setefanase, na Fotunatusa, na Akaikusa: mwanda’bo abampele kiakia kianakutshilwe ku lwenu luhese.

¹⁸ Mwand’abo abanyikish’eshimba diande, na dienu namu. Binyibiabia nukuminei be biabia.

¹⁹ Bikoñeno bi’Efile bia ku (Asie) abinwimuna. Akwila na Pileshila (namu) abenwimuna bikata mu Nfumwetu, na kikoñeno ki’Efile ki mu nshibo mwabo.

²⁰ Bakwetu boso ba mu Kidisitu abenwimuna. Nwiyimushenei na lwififyeno luhatulwe-lwi-kishila.

²¹ Lwimuno lw’ami Paulu lwa kwiasa diande’mi (na mwinyi.)

²² Su nanyi su nanyi shī na kifulo na Nfumwetu Yesu Kidisitu, edībwe muloa; Nfumwetu ngiwafiki.

²³ Bu-muntu bwa Nfumwetu Yesu Kidisitu bwikale n’enu.

²⁴ Kifulo kiande kikale n’anwe boso ba mu Kidisitu Yesu. Amena.