I Bena Kodinda 15 - KILOMBENO KIHYA KIA NFUMWETU YESU KIDISITU1 Dimon’nyi bakwetu, nenukisha mikāndu-yi-buwa yinenulungwile, yingi namu yanubatambwile, na kwīmanyinyina mwanka. 2 Nyi kwanubahandjila su anulamatshidila mu binyi binenulungwile, anka su nubakuminyine bisumanga. 3 Mwanda’mi kwibedi nenuhele kiakia kianatambwile namu, mu bafwidile Kidisitu milwisho yetu mulombene Bifundwe bi’Efile; 4 Bashīkilwe namu, abuka h’efuku dia kasatu mulombene bifundwe bi’Efile. 5 Na mu bamwenenwe kwi Kefasa, kumongo kwi benyi b’ekumi na babidi. 6 Kumongo’nyi bamwekyele kwi Bakwetu ba mu Kidisitu bakile nkama yitano kihindji kimune; bangi babo bakile bungi bakiabatala mpaa na binobino, anka bamo mbalaletulo (twa lufu.) 7 Biabia biakikamweka kwi Yakoba, akamwekyela’nyi kwi batumibwe boso. 8 Na kunfudilo kwa boso bamwekyele namu kwandjimi, bu mutandjibwe muhulumukye. 9 Mwanda’mi nyi mukile buhela a ku batumibwa, nki muhwandjikile kutemunwa bu mutumibwa, mwanda nadi asābula kikoñeno ki’Efile. 10 Anka nyi kwandji mwikele na bino, nyi ku bumuntu bw’Efile Mukulu: na buntu bwe bwanampelwe’mi ta mba bisumanga, ooo; anka nakile bakwetu boso kutuhwita ’mufubo: anka ta nami na mwinyi, ooo, nyi mbu-muntu bw’Efile Mukulu bubadi n’ami. 11 Binyibiabia su bibadi ami, su mbaba, nyi anka mwatubalungwidile ntukāndu-wibuwa, nyi mwinyi mwanubakuminyine. 12 Biabia su Kidisitu alungwilwa’shi, e babukile ku lufu, a nkinyi bangi be munkatshi mwenu abamba’shi: Takwi lusangukilo lwa bafwe? 13 Anka su takwi lusangukilo lwa bafwe, biabia Kidisitu tamusangulwē, ooo; 14 na su Kidisitu tamusangulwe, biabia bulungudi bwetu bw’Efile mbwa bisumanga, na lukumino lwenu namu ndwa bisumanga. 15 Ee, binyibinyi (biabia) atwe namu tubasañanwa bu tumonyi tw’Efile twa madimi; mwanda tubatemwine ha mwanda w’Efile Mukulu’shi: Babushishe Kidisitu, e ashī mubushe (ku lufu) su abikala (mbinyibinyi) bafwe tababushibwa. 16 Mwanda su bafwe tababushibwa, biabia Kidisitu tamubushibwē. 17 Na su Kidisitu tamubushibwe (biabia) lukumino lwenu ndwa bisumanga; anwe namu nukī anka mu milwisho yenu. 18 Henyihaha abo namu abahōne mu tulo (twa lufu) mu Kidisitu, biabia abalwila. 19 Su twi na lukuluhilo mu Kidisitu anka mu kino kihindji kia muwa w’etu, twi bakile bantu boso na kwinyongola. 20 (Anka E Kidisitu basangwilwe mu bafwe, e takikuba kia kwibedi kia baba abalele tulo (twa lufu.) 21 Biabia ha mwanda w’alo lufu lubatwelele kwi muntu, (biabia) lusangukilo lwa bafwe lubatwelele kwi muntu. 22 Mwanda mwatufwilā atwe boso mwi Adama, mpamunenka namu mwatukamwena muwa, atwe boso mu Kidisitu. 23 Anka boso mwa belondena ku muntu ku muntu; Kidisitu nkikuba kia kwibedi; kunyima, abo ba Kidisitu ha kufika kwe. 24 Henyihaha (akukafiki) kunfudilo, hakatulu bufumu kw’Efile Mukulu, n’Shyie (namwinyi); hakahudisha butontshi boso, na matalwa oso na bukome boso. 25 Mwanda wadi n’au ngwa kubikala, mpaa na hakahu kwashina boso bakumushikwa. 26 Mushikwene n’ami a kunfudilo akashimishibwa nyi ndufu. 27 Mwanda e batontele bintu bioso mushi mwa ngwa ye. Anka hakwakula’shi; Bintu bioso mbitudibwe, kibamwekyelele’shi, yawa batudile bintu bioso mushi mwe, ta n’e namwinyi eamba. 28 N’ahakekala bintu bioso bikokyeshibwe kwadi, biabia namu Mwana na mwinyi akakokyela kwi yawa batontele bintu bioso mushi mwe’shi, Efile Mukulu ekale a bioso na mu bioso. 29 Su tambiabia, abo ababatshishibwe ha mwanda wa bafwe, abakakitshi naminyi? Su bafwe tabasangukā, a nkinyi ababatshishibwā ha mwanda wa bafwe? 30 N’atwe namu nkinyi kiatudi bemene lufu ngub’ese? 31 Nasuminā’nwe bakwetu ha mwanda wa kwitumbisha kwenu kwandji n’ako mu Kidisitu Yesu Nfumwetu’shi, ami nafwiyā kwifuku n’efuku. 32 Sū’mi nyi mulond’anka kihikwa kia bantu, nalwile na nyama ku Efisesa, ki’anka mwena’mo nkinyi su bafwe tabasangulwā ku lufu? (Biabia) tudye, tutome, mwanda maloba atukafu. 33 Tanudimbibwanga; kwitembeshena kwi bubi akunyangishā bihikwa bibuwa. 34 Hasukilai ku kululama kweshimba, tanusolanga namu mwanda, mwanda bamo tabe na kiukilo ki’Efile Mukulu; nākula uno mwanda kwinukwatshisha būfu. 35 Anka bamo abakanihusha’shi: A bafwe abasangulwa naminyi? Abakafiki na kihaso kia mbidi kinyi? 36 Obe mutshikame, akia kiokuna, takibumbā kiasanguka anka su akifu. 37 Na kinyi kiokunā tokunā mbidi’shi, nyia yikekala’nka’yo, ooo, nyi ñanka lubio, su ndwa ngano, su ndwa kingi kihaso kia lubio.) 38 Anka Efile Mukulu nyi e yiheyā mbidi, mwakyebel’eshimba die, ku lubio na mbidi yalo, ku lubio na mbidi yalo. 39 Mwita woso tawi hamune, ooo, anka kwi mwita wa bantu, kwi mwita wa nyama, kwi ungi’nyi wa mishiha, umo’nyi wa tonyi. 40 Kwi mbidi ya mwiilu, kwi mbidi ya hanohansenga namu, anka ntumbo y’ayo ya mwiilu yi hayo, na ntumbo y’ayo ya hanohansenga yi hayo namu. 41 Kwi ntumbo yimune ya nguba, na yingi ntumbo ya mweshi, na yingi’nyi ngia nyenyenyi; mwanda luenyenyi lumune ndwilekene na lungi lwenyenyi mu ntumbo. 42 Nyi anka biabia namu na lusangukilo lwa bafwe mpamune. Yibakunwe yinyangye, ayikasangulwa yishī yinyangye. 43 Yibakunwe ya būfu, ayikasangulwa ta ngia ntumbo; yibakunwe ya butūba, ayikasangulwa ta ngia bukome. 44 Yibakunwe ya mwiyile mbidi, ayikasangulwa ta mbidi ya Kikudi. Kwi mbidi yi mwiyile mbidi, kwi mbidi’nyi ya mwiyile kikudi. 45 Biabia nyi mwaubafundjibwe’shi: Muntu a kwibedi, Adama, bahangilwe a kikudi akitala. Winyi a kunfudilo badi kikudi akihana muwa. 46 Ank’akia kia kwibedi takibadi kia kikudi, ooo, nyi nkia mwiyile mbidi. 47 Muntu a kwibedi nga hanohansenga, anka muntu akabidi, e nyi Nfumwetu a Mwiilu. 48 Anka mwikele ba hanohansenga, mbāhanohansenga, na bu mwikele ba mwiilu biabia namu mba mwiilu. 49 Anka mwatudi befwane kīfwano kia kanohansenga, mpamunenka atukefwana kīfwano kia mwiilu. 50 Binyibiabia kiañakula anwe bakwetu nkino’shi: Mwita na mase tabiuku kuhyana bufumu bw’Efile Mukulu; sunga kinvangyo takiuku kuhyana kishīkinyangye. 51 Talangai, nenulesha kifībwe: Atwe boso tatukalala tulo (twa lufu) ooo, anka atukālulwū’twe boso. 52 Mu kahindji n’āka, bu kuhohola kw’eiso, ahakēlwa mpungi ya kunfudilo: mwanda mpungi ayikākula, na bafwe abakasangulwa bashī banyangye, n’atwe atukālulwa. 53 Mwanda yino ayinyangā, wa yidi nayo ngwa kufwala yishyayinyangā, na yino ayifwiyā wa yidi nayo ngwa kufwala yishyayifwiyā. 54 Biabia yino ayinyangā hayikafwala yishyayinyangā, na yino ayifwiyā hayikafwala yishyayifwiyā, biabia aukakumbashwa winyi mwisambo ubafundjilwe’shi: Lufu lubaminwa na kwilobesha. 55 A lufu, ngobesha yobe yi kwi kunyi? A lufu, munungi wobe wi kwi kunyi? 56 Anka munungi wa lufu nyi mbubi, na ntshitshiba ya bubi nyi mukanda-wa-bishila. 57 Anka Efile Mukulu atumbishibwe, n’e etuheya ngobesha mu Nfumwetu Yesu Kidisitu. 58 Biabia, anwe bakwetu bakuminyibwe, nwikale bakankamane, kushī kusanasana, nukishekishe bikata bukyelebukyele mu mufubo wa Nfumwetu, mwanda anwiuku’shi, kutuhwita kwa mifubo yenu tankwa bisumanga mu Nfumwetu, ooo. |
© 1952 Alliance Biblique de la République Démocratique du Congo