I Bena Kodinda 14 - KILOMBENO KIHYA KIA NFUMWETU YESU KIDISITU

¹ Londai kifulo; nukyebe bia-buntu bua Kikudi (E-Selelee,) anka kukila biabia, nkutemuka myanda.

² Mwanda yawa ākula na dingi edimi, tākula kwi bantu, ooo, anka kw’Efile Mukulu; mwanda takwi muntu eushingula; anka mu Kikudi e ākula yifībwe.

³ Anka yawa atemukā myanda ākula kwi bantu kwibatamisha, na kwibalanga, na kwibasenga.

⁴ Yawa ākula mu dingi edimi etamisha e na mwinyi, anka yawa atemukā myanda atamishā kikoñeno ki’Efile.

⁵ Ami nenukyebela ’shi, nwakule anwe boso mu ndjimi, anka kukila biabia’shi, nutemukye myanda: mwanda yawa atemuka myanda ’mukile winyi akula mu ndjimi, anka su euhatula’shi, kikoñeno ki’Efile kimone mwa kidia kutamina.

⁶ A bakwetu, su nafiki kwanudi na kwisamba ndjimi, nankenumweshesha kinyi anka su nākula kwanudi na ya mwinufumbwila, su ngia kiukilo, sunga ndutemuko lwa myanda, su nku lulambukisho?

⁷ Hamune na bino, bintu bishī na muwa, be n’eyi, sunga ndushiba, sunga ndusese, anka su abitusha mayi elekene, aahushibwa na minyi mwa ayīla na mwa’ōmbelwa.

⁸ Mwanda su mpungi ayiele eyi dishī mulumbi, a nanyi akelumbula kwenda ku ngoshi?

⁹ Anwe namu anka hamune, su tanwakula mwidimi bishima bibofule bia kushingula, abikeukibwa na minyi akia kia kiakulwa? Mwanda biabia anukākula mu luhahi.

¹⁰ Kwi bihaso na bihaso bibungi bia miakwilo hanohansenga, tangikutwe namu, sunga ngumune mwayidi yīle, ooo.

¹¹ Binyibiabia su tañuku kuhatūla mwiyile mwakwilo we, (biabia) ami nankekala kwi’wa ākula bu musendji, e namu kwandji’mi musendji.

¹² Biabia anwe namu mpamune’nka, bianudi na kinsukunsuku kia kukyeba fbia-buntu bia Kikudi-E-Selelee, nukimbe’shi, nukambe kukila bia kutamisha kikoñeno ki’Efile.

¹³ Binyibiabia yawa ākula mu ding’edimi atekye’shi, ’mone mwa kuhatulwila.

¹⁴ Mwanda su natekye mu ding’edimi, nyi nkikudi kiande akitekye, anka nangunangu yande ngia bisumanga.

¹⁵ A bino, bi na minyi? Nkatekye na kikudi, dimo’nyi nkatekye na nangunangu; nkayimbe na kikudi, nkayimbe namu na nangunangu.

¹⁶ Hangi namu h’okelwa mwabi na kikudi, yawa shī na kalolo akakumina’shi: Amena ku lutumbu lobe, mwanda tashingula kiōkula?

¹⁷ Mwand’obe otumbula binyibinyi, anka mukwenu tamutamishibwe, ooo.

¹⁸ Natumbula Efile Mukulu ande biandji mukile anwe boso kwakula yingi ndjimi.

¹⁹ Anka mu kikoñeno ki ’Efile, nakamba kusehela’shi, nakule bishima bitano na nangunangu yande hanka, mwandjia kulambukisha bangi namu he bishima binunu ekumi mwidimi dingi.

²⁰ Bakwetu tanwikalanga bu bana mu nangunangu ooo, anka mu kifita nwikale bana; mu nangunangu nwikale bakulu.

²¹ Mu mukanda-wa-bishila mubafundjibwe’shi: Nankākula kwi bano bantu n’eyi dia yingi ndjimi na milomo ya benyi; sunga mbiabia tabakampushish’ami, ooo, nyi mubakwidile Yehowa.

²² Binyibiabia (yingi) ndjimi yi bu kitundwilo, kushi kwi’ba abakumina, anka kwi’ba bashī bakumine; anka kutemuka kwa myanda (nyi nkitundwilo) tankia kwi bashībakumine, ooo, anka kwi’bo bakumine.

²³ Binyibiabia, su kikoñeno kioso ki’Efile kibekoñena hantu hamune, na boso abākula na yingi ndjimi; na su bashī bahatulukye, sunga bashī-bakumine, abakatwele mwanka, a biabia tabakākula’shi: Nwi na mombe?

²⁴ Anka su boso abatemuka myanda, na su amutwele umune shī-mukumine mwanka, sunga shī na kalolo, (biabia) e muhīshwe kwi boso, e mutshibilwe kwi boso.

²⁵ N’anka biabia yifībwe y’a mwishimba die ngisokolwe; biabia akahono mubandjikye mpala ye hashi, talangwila Efile Mukulu, na kwakula’shi: Efile Mukulu e munkatshi mwenu binyibinyi.

²⁶ A bino bi na minyi bakwetu? Hanwikoñena hamune, anwe boso, au na lono, au na lulambukisho, au namu na dingi edimi, mungi namu e na lufumbwilo. N’au mo ’nyi e na luhatulwilo. Bioso bino bikitshibwe ha mwanda wa kwitamisha.

²⁷ Su Muntu akula mu (dingi) edimi, (bekala) su mbabidi su mbasatu, anka baba kubāhu, n’abo kwilondena ku umo umo, na mungi’nyi ahatule.

²⁸ Anka su takwikala muhatudi, (biabia) ekale nyaa mu kikoñeno ki’Efile, esambe kwadi na mwīnyi, na kwi Efile Mukulu.

²⁹ Batemuki bākule babidi su mbasatu, na bangi bakwabo beyitshibile.

³⁰ Su kia kufumbulwa nkifumbulwe kwi mungi mushale hanka, (biabia) akwibedi aumine.

³¹ Mwanda anwe boso anwiuku kutemuka myanda, ku umune ku umune’shi, ese muntu āmbule, na boso basengībwe;

³² Bikudi bia batemuki mbikokyeshibwe na batemuki.

³³ Mwanda Efile Mukulu t’Efile a kuhatakasha, ooo, E nga kufukama; nyi anka mwikele mu bikoñeno bi’Efile bioso bia bahatulwe-ba-kishila.

³⁴ Bana bakashi benu baumine nyaa mu bikoñeno bienu bi’Efile; mwanda tamwi matalwa abo kwakula; bekale bakokyele anka mwakwile mukanda-wa-bishila.

³⁵ Su abakyebe kwambula kalolo ku kintu, behushe balume babo kwabo; mwanda bi būfu mwana mukashi kwakula mu kikoñeno ki’Efile.

³⁶ Nkinyi? A nkwanudi’nwe kubatukile mwanda w’Efile Mukulu su? Su dibafikile anka kwanudinwe’nyi?

³⁷ Su kwi atentekyesha namwinyi’shi, nyi mutemuki, sunga nga kikudi (E-Selelee,) ashingule’shi, yino myanda yinenufundjile, nyi ngia bishila bia Yehowa.

³⁸ Anka su umune bekala shī na kalolo, ekal’anka biabia.

³⁹ Binyibiabia anwe bakwetu, kimbidilai kutemuka myanda, tanulekeshanga bakwakula na yingi ndjimi.

⁴⁰ (Bibuwa) bintu bioso bikitshibwe mulombene bibuwa mwa kwikadidila.