I Bena Kodinda 11 - KILOMBENO KIHYA KIA NFUMWETU YESU KIDISITU

¹ Nwikale bakungelekesha’mi, anka mwangelekyesha’mi Kidisitu.

² Anka bino namu nenutumbisha bakwetu mu Kidisitu’shi, nwantentekyesha mu bintu bioso, na kulama milangilo, hamune munenufishishe’yo.

³ Anka nenukyebe nwiukye’shi, mutwe wa muntu ese nyi Kidisitu; na mutwe wa mwana mukashi nyi mulume; na mutwe wa Kidisitu (namu) nyi Efile Mukulu.

⁴ Ese mwana mulume hakuteka su kutemuka myanda na mutwe we ubwikile, biabia afukulusha mutwe we.

⁵ Anka ese mwana mukashi atekā su kutemuka myanda na mutwe we ushī ubwikile, afukulusha mutwewe, mwanda kino ki hamunenka na kukulwa kahweto.

⁶ Mwanda su mwana mukashi shī mubwikilwe, aseswe nyene, anka su ki būfu mwana mukashi kuseswa, sunga nkukulwa kahweto, biabia ekale mwibwikile.

⁷ Anka mwana mulume tankimulombene kwikala na mutwe we ubwikile, ha mwanda e nyi nkihwandjikisho na ntumbo y’Efile Mukulu; anka mwana mukashi nyi ntumbo ya mwana mulume.

⁸ Mwanda mwana mulumi shī a kwi mwana mukashi, anka mwana mukashi, e nga kwi mulume.

⁹ Sunga mwana mulume namu tamuhangibwe ha mwanda wa mukashi, anka mwana mukashi n’e bahangilwe ha mwanda wa mulume.

¹⁰ Nyi ha uno mwanda nkihwandjikile mwana mukashi kwikala na kitundwilo kia matalwa ha mutwe he, ha mwanda wa bamwikeilu.

¹¹ Sunga mbiabia, mwana mulume e shī a bisumanga mwana mukashi, sunga mwana mukashi namu e shī a bisumanga mwana mulume mu Nfumwetu.

¹² Mwanda anka mwikele mukashi nga mulume, na mulume namu nga mukashi; anka bintu bioso mbi’Efile Mukulu.

¹³ Nwitshibile (myanda) munda mwenu, anwe bana bene’shi: Mbilombane mwana mukashi kuteka Efile-Mukulu, shī mubwikile (kumutwe) su?

¹⁴ A kihaso kia muwa ki na mwinyi, takiuku kwinulambukisha’shi, su muntu e na nyene yila, ta mbufu bwe su?

¹⁵ Anka su mwana mukashi e na nyene yi bula, nyi ntumbo ye, mwanda nyene ye yi bula yibamuhelwe kwikala bu kibwikīlo.

¹⁶ Anka su nanyi, su nanyi e bu e na mpaka, tatwi na n’akia kihikwa, ooo, sunga mu bikoñeno bi’Efile.

¹⁷ Anka bino bitanyinulungula, tanyinutumbisha’shi, anwikoñena kushī ha mwanda wa kwilumbula biya, ooo, anka kutamisha bubi.

¹⁸ Mwanda wa kwibedi, hanwikoñena mu kikofieno ki ’Efile nahusha’shi, munkatshi mwenu mwi kwilamuña, n’ami neukumina kihindji.

¹⁹ Mwanda mwaudi uyile’shi, bia kwilamuña abikekala munkatshi mwenu’shi, bakutumbishwa bafumbulwe munkatshi mwenu.

²⁰ Binyibiabia hanwikoñena hantu hamune, tanukamono mwa kudila bidibwa bia Nfumwetu, ooo,

²¹ mwanda hanudi, ese muntu eatshile bidibwa bi’e na mwinyi; umo e na nsala, mungi ’mukolwe.

²² A nkinyi? Tanwi na mashibo a kudila n’a kutomena mwanka? Sunga anubenda kikofieno ki’Efile Mukulu anufwisha namu baba bashī n’akio būfu su? A nankyebe kwinulungula kinyi? A nenutumbishe mu uno, u su? Ooo, tanyinutumbisha.

²³ Mwanda natambwile kwi Nfumwetu kiakia namu kinenufwishishe’shi: Nfumwetu Yesu mu bwabwa bufuku bubehukilwe kīhuko, bātshile dimpa;

²⁴ Habahwile kutumbula, beditshibile’shi: Atai, nudye; dino nyi mbidi yande yibenutshimukile; kitai kino mwa kuntentekyesha.

²⁵ Anka ekoho namu mpamune habahwile kudia, bambile’shi: Dino ekoho nyi kihwano kihya mu mase ande; hoso hanukatomo, nukite kino kia kuntentekyesha.

²⁶ Mwanda misusa yoso yianudi dino dimpa na kutoma dino ekoho, anulungula lufu lwa Nfumwetu mpaa n’ahakafiki.

²⁷ Binyibiabia muntu ese akadi dino dimpa, na kutoma ku dino ekoho shī mumpwandjikile, ’muhīle mwanka ku mbidi na ku mase a Nfumwetu.

²⁸ Anka muntu etompe e na mwinyi, biabia adye ku dimpa na kutoma kwikoho.

²⁹ Mwanda yawa adi na kutoma shī muhwandjikile, ādi na kutoma luhīlo ndw’e na mwinyi, mwanda tamuhatule mbidi ya Nfumwetu.

³⁰ Nyi ha uno mwanda bebungi munkatshi mwenu mbabofule ku mbidi, n’abakumbu busungu, bangi namu abalala tulo (twa lufu.)

³¹ Mwanda su tubadia kwitshibila’twe banabene, tatubadia kutshibilwa kimu, ooo,

³² Anka hatutshibilwa kimu, twibalangibwe elango kwi Nfumwetu’shi, tala twakahīshwa (kamune) na bahanohansenga.

³³ Binyibiabia bakwetu, hanukekoñena hamune mu kudia, nwieshenei.

³⁴ Su muntu e na nsala, adye kwē, tala nwakekoñena hamune mu kuhoneshībwa, na yingi yishale nankeyilumbula hanankafikye.