I Bena Kodinda 1 - KILOMBENO KIHYA KIA NFUMWETU YESU KIDISITU

¹ Paulu mwitanyinwe bu mutumibwa a Yesu Kidisitu, bu amukyebela eshimba di’Efile Mukulu, na Sosetene mukwetu mu Kidisitu,

² Ku kikoñeno ki’Efile ki ku Kodinda, kwi’ba balamunwe-selelee-be kishila mu Kidisitu Yesu, abaitanyinwa (kwikala) bu balamunwe-selelee be kishila, hamunenka na boso abetanyina h’eshina dia Nfumwetu Yesu Kidisitu mu bihindji bioso, Nfumwabo n’a atwe namu;

³ bumuntu bw’Efile kwanudi; na kufukama kw’Efile Mukulu Yaiy’etu, na kwi Nfumwetu Yesu Kidisitu.

⁴ Natumbula Efile Mukulu ande mafuku oso, ha mwanda wenu, mwanda wa bumuntu bw’Efile Mukulu bubenuhebwa mu Yesu Kidisitu;

⁵ Eshi, mu bintu bioso nubaheteshibwa mwadi’e, mu mīsāmbo yoso, na (mu) kiyukilo kioso;

⁶ bibakankamishwe bulungudi bwa Kidisitu mwanudi:

⁷ biabia tanukakutwa mu kiabuntu sunga nkimune; hanuhianutengyela kufumbuka kwa Nfumwetu Yesu Kidisitu:

⁸ Winyi akenukankamika namu mpaa na kunfudilo, eshi; tanukatohekwa mwifuku dia Nfumwetu Yesu Kidisitu.

⁹ Efile Mukulu e (na) kishima, kwadi nyi kwanubaitanyinwe ku kilombeno kia Mwan’E Yesu Kidistu Nfumwetu.

¹⁰ Binyibiabia nenusendela bakwetu mwishina dia Nfumwetu Yesu Kidisitu, eshi; anwe boso nwisambe mwanda umune, tanwikalanga na kwilamuña munkatshi mwenu, anka nwikale balombanyinyine hamune mwishimba dimune na mu binangu bimune.

¹¹ Anwe bakwetu nalungwilwe ha mwanda wenu, kwi ba mu nshibo ya Kaloe, eshi: Kwi mpaka munkatshi mwenu.

¹² Nyi nguno wanamba’shi, anwe boso, ku muntu ku muntu anwamba’shi: Ami nyi a Paulu; ami nyi a Apolosa, ami nyi a Kefase, n’ami nyi a Kidisitu.

¹³ Kidisitu ’mwilamune su? Paulu benubambidilwe (ha nkulusu) su? Nubabatshishwe mwishina dia Paulu su?

¹⁴ Natumbula Efile Mukulu’shi, nkimubatshishe umune ēnu anka Kidisipusa, na Ngaiusa,

¹⁵ tala umune akākula’shi; Abatshisha mwishina die.

¹⁶ Nabatshishe namu ba mu nshibo ya Setefane, kukila baba, tañuku su nabatshishe mungi, ooo.

¹⁷ Mwanda Kidisitu tamuntume kubatshisha, anka mwanda wa kulungula mukānduwi-buwa; kushī na binangu bia bishima, tala nkulusu ya Kidisitu yakekala bu ya bisumanga.

¹⁸ Mwanda bulungudi bwa (mwanda wa) nkulusu bwi bu mwanda ulotakane kwi’ba balwile, anka kwatudi’twe tubahashibwe, bwi bu bukome bw’Efile Mukulu.

¹⁹ Mwanda ubafundjibwe’shi: Nankalwisha binangu bia basha kalolo, na kushingula kwa bashingudi akukealula tambisumanga.

²⁰ A sha binangu e kwi kunyi? Mufundji (namu) e kwi kunyi? Muhakanyi a bahanohansenga e kwi kunyi? Efile Mukulu tamwalule binangu bia bahanohansenga, tambulotakane su?

²¹ Mwanda mwiyile kalolo k’Efile Mukulu, bahanohansenga tambeukye Efile Mukulu ku binangu, ooo, (biabia) Efile Mukulu bamwene buwa kuhashā’bo abakumina, ku bulotakane bwa bulungudi bw’Efile.

²² Sunga Bena Yuda abakyebe bitundwilo, na Bangidiki abalondo binangu,

²³ ank’atwe atulungula Kidisitu mubambibwe ha nkulusu; kwi Bena Yuda wi bu kikokoshi, na kwi Bangidiki ngulotakane;

²⁴ anka kwi’bo abaitanyinwa, Bena Yuda na Bangidiki hamune, Kidisitu mbukome bw’Efile Mukulu, na binangu namu bi’Efile Mukulu.

²⁵ Mwanda bulotakane bw’Efile Mukulu mbukile binangu bia bantu, na butuba bw’Efile Mukulu mbukile bukome bwa bantu.

²⁶ Mwanda bakwetu, talai lwitamino lwenu shi, bia kushī basha bukalabwino be bungi ba ku mbidi, sunga basha katshintshi be bungi, sunga mba kinemo bebungi bētaminwe, ooo,

²⁷ anka Efile Mukulu basangwile bintu bilotakane bia hanohansenga ku kwatshisha basha bukalabwino būfu; Efile Mukulū’nyi basangwile bintu bibofule biahanohansenga kuhatakasha bintu bi na ntshitshiba.

²⁸ Efile Mukulu namu basangwile bitesha bia hanohansenga, na bintu bibe ndjibwe, na bintu bi bu bia bisumanga, kwalula bintu bi bu kintu, tambia bisumanga’shi,

²⁹ tala muntu, sunga ngumune akelungula ku mpala kwe, ooo.

³⁰ Anka kwadi e nyi kwanudi mu Kidisitu Yesu, betwialulwidile bu binangu, na kululama kwi’shimba, na kulamunwa-kwi-selelee, na kikudilo’shi,

³¹ nyi anka mwaubafundjilwe’shi: A kwilungula, elungwile mwi Nfumwetu.