Ii Bena Kodinda 5 - KILOMBENO KIHYA KIA NFUMWETU YESU KIDISITU

¹ Mwanda, atwiuku’shi, su nshibo yetu ya hanohansenga (ya mbidi) yibashimunwa, (biabia) twi na yibakwe y’Efile Mukulu, nshibo yishī yibakwe na maasa, ya ikala-ika mwiilu.

² Nyi mu yino mwatwidīla, na kukyeba bimoo’shi, tufwadikwe nshibo yetu ya kwiilu;

³ Su tubekala bafwadikwe biabia tatusañanwa muswa.

⁴ Mwanda’twe hatuki mu (yino) nshibo (ya mbidi) atwidīla bushito; kushī kwamba’shi, tufulwe, ooo, anka’shi, tufwadikwe’shi, kiakia kia lufu kiminyibwe biū kwi muwa.

⁵ Winyi betuhangile ha mwanda wa kino kintu nyi Efile Mukulu, e winyi namu betuhele kiē nyi Kikudi-E-Selelee.

⁶ Binyibiabia nyi hatwikankamikila bukyelebukyele hakwiuka’shi, hatukī mu yino mbidi, twibelekene na Nfumwetu. (

⁷ Mwanda atutambukā na lukuluhilo, kushī kumona na meso.)

⁸ Ami’shi, twibakankamane, twi na kukumina namu he kwilekena bia ku mbidi, na kwikala na Nfumwetu.

⁹ Biabia twi na kinsukunsuku’shi, sunga twi kwadi, sunga twilekena n’e, twikale bakumusangulusha kwishimba.

¹⁰ Mwanda’twe boso wa tudi n’au ngwa kukafumbulwa ku mpala kwa kimu kia Kidisitu’shi, ese muntu akatambule bintu bibakitshinwe mu mbidi, mwiyile mubakitshinyinu, sunga mbibuwa sunga mbibubi.

¹¹ Biabia hakwiuka lusushilo lwa Nfumwetu, atukonkwela bantu. Anka twibafumbulwe kw’Efile Mukulu; nakuluhila namu’shi, atufumbulwa ku muntu enu e munda.

¹² Mwanda tatwilungula’nyi atwe bena bene kwanudi, anka atwinuha mwakutumbila ha mwanda w’etu, eshi, numone (mwakwakwila) kwi’bo abehwandjikisha kutumba, kushi mwishimba.

¹³ Mwanda su twi bu balotakane nyi kw’Efile Mukulu; su twi na binangu bishinkame nyi nkwanudi.

¹⁴ Mwanda kifulo kia Kidisitu akitushimatshisha, mwanda tubatshibile bino’shi, su umune bafwidile boso, biabia boso tabahwile kufwa.

¹⁵ N’E bafwidile boso’shi, baba be na muwa tabakekadidila n’au kwi’bo ba na bene, ooo, anka kwi yawa bebafwidīle, basangukile dimonyi (ku lufu).

¹⁶ Binyibiabia ku kihindji ki ku mpala tatukeuku muntu mulombene bia ku mbidi, ooo, sunga ngumune: ee, sunga tubeukile Kidisitu, mulombene mbidi, sunga mbiabia tatukamwiuku dimonyi, ooo.

¹⁷ Binyibiabia su (muntu) e mu Kidisitu, su nanyi su nanyi, e nkihangwe kihya; bintu bia kala bibakididile; talai, bintu bioso bibāluluka tabidi bihya.

¹⁸ Bintu bioso mbi’Efile Mukulu, e betulombasha kwadi e na mwinyi, mu Yesu Kidisitu; betuhele’twe namu mufubo wa kilombeno.

¹⁹ Nkia kwamba’shi, Efile Mukulu badi mu Kidisitu elombashanga na bahanohansenga kwadi E na mwinyi, tamwibalondole kwabadi kusola kwabo kwa myanda; e betutudile namu mwanda wa kilombeno.

²⁰ Biabia binobino twi bakwidi ba ha mwanda wa Kidisitu, anki bi hamune Efile Mukulu enusendela n’etu, (biabia) atwe atwinusendela bu bampyanyi ba Kidisitu’shi: Lombanai n’Efile Mukulu.

²¹ Mwanda yawa shī badi mwiukye kulwisha, E bamwalulwile bu mulambu wa bubi ha mwanda w’etu, mwatudia kwalulu-kila balulame b’Efile Mukulu mwadi E.