Ii Bena Kodinda 3 - KILOMBENO KIHYA KIA NFUMWETU YESU KIDISITU

¹ Atubangye kwilungula’nyi atwe bana bene su? Su twi na lukalo lwa mikanda ya lwilungulo kwanudi, bu bangi su? sunga mikanda ya lwilungulo kwanudi’nwe?

² Anwe nwi (winyi) wetu mukanda wabafundjile mu mashimb’etu, wiukibwe na ubadibwa kwi bantu boso;

³ Anwe anumwekyela hatoka’shi, nwi mukanda wa Kidisitu ubafubilwe kwatudi, ushī ufundjibwe na mema-a-mukanda, anka na Kikudi-E-Selelee e Efile Mukulu atala; tawi ha mesa a mabwe, ooo, anka ha mashimba a bia mbidi.

⁴ Na kuno kukuluhila kwa tudi n’ako kw’Efile Mukulu, nyi mu Kidisitu.

⁵ Kushī kwamba’shi, twakumbasha’twe bana bene kutentekyesha su nkinyi su nkinyi ku mashimb’ātwe bana bene, ooo: anka kikumbeno kietu nyi nkia kw’Efile Mukulu;

⁶ winyi betwikeshe bu bafubi balombane ba kilombeno kihya; ta mba ku mukanda, anka ba ku Kikudi-E-Selelee; mwanda mukanda auihā, anka Kikudi-E-Selelee ahanā muwa.

⁷ Anka su mufubo wa lufu ubafundjibwe na kubangulwa ha mabwe ubadi na ntumbo, biabia bena Isalele abakutshilwe kushinkika mpala ya Mosesa, ha mwanda wa ntumbo ya mu mpala ye; aya ntumbo namu yibadi ayihu;

⁸ A mufubo wa Kikudi-E-Selelee taukekala wi na ntumbo yikilekile su?

⁹ Mwanda su mufubo wa luhīsho wi na ntumbo, (biabia) mufubo wa kululama kw’eshimba ubakilakila mu ntumbo.

¹⁰ Mwanda kiakia kibatumbishwe ntumbo, takibadi na ntumbo mu uno mwanda, ooo, nyi mpa mwanda w’aya ntumbo yikilekile.

¹¹ Mwanda su kiakia kibahwile kibadi na ntumbo, (biabia) kino kibashāla ki na ntumbo yikilekile.

¹² Biabia hatudi na lutengyelo lwi bino, twi na kushimikishena kwa mīsambo.

¹³ Kushī bu Mosesa bahutshile kihūto kia kilamba ku lukyebo lwe’shi, bena Isalele bakutwe kubangīla mpa ana kunfudilo kwa’kia kibahwididile;

¹⁴ anka binangu biabo bibadi bikome anka hoo. Mwanda mpaa na ku lelo uno, kino kihūto kinyi ki kwanka, tankikashwe ha kubala kwa mukanda wa kilombeno kikulu, ooo; kinyi kihūto nyi nkikashwe mu Kidisitu.

¹⁵ Anka mpaa na ku lelo uno ahabadibwa Mosesa, kihūto kikī kibahūte ku mashimba’bo.

¹⁶ Sunga mbiabia, habakāluka kwī Yehowa, kinyi kihūto akikakashwa.

¹⁷ Binyibiabia Nfumwetu nyi Nkikudi-E-Selelee, na he Kikudi kia Nfumwetu, nyi he buluñantu.

¹⁸ Anka’twe boso be na nkyebo yishī yihūtwe, tukwete kubandjile ntumbo ya Yehowa, bu mu kelobe, tubālulwa mu wawa mwesheshi ku ntumbo na ntumbo, ñanka kwi Kikudi-E-Selelee a Nfumwetu.