Ii Bena Kodinda 13 - KILOMBENO KIHYA KIA NFUMWETU YESU KIDISITU

¹ Uno nyi mususa wa kasatu utanafiki kwanudi. ’Makanwa a tumonyi tubidi sungā tusatu myanda yoso ayikakankamikibwa.

² Nahwile kwinulungula kwibedi, nenulungula (dimonyi) anka bu’mi ekalanga n’enu mususa wa kabidi; na binobino hanyikala nki munkatshi mwenu, nafundjii’aba abalwishishe kwibedi, na kwi bangi boso’shi, su nankafika dimo, tankenufwila lusa, ooo.

³ Ha mwanda anukimbi kishiso kia Kidisitu akiakulā munda mwande, e ta mutūba kwanudi, anka mwanudi e mbukome.

⁴ Mwanda sunga baihayilwe ha mutshi uhingishene mu butūba, sunga mbiabia e atala ku bukome bw’Efile Mukulu. Mwanda’twe namu twi batūba mwadi e, ank’atukekala na muwa n’e ku bukome bw’Efile Mukulu kwanudi.

⁵ Etompei munda anwe bana bene, su nwi mu lwinyi lukumino; nwishishei’nwe bana bene. Tanwibeshingule biya anwe bana bene’shi? Yesu Kidisitu e munda mwenu, anka su nwi babambakane.

⁶ Anka natengyela’shi, anukeuku’shi, tatwibabambakane, ooo.

⁷ Anka natekā kw’Efile Mukulu’shi, tanwakita bibubi, ta mwanda w’atwe kumweka bu bakuminyibwe, ankā’shi, nukite yibuwa, sunga twi bu babambakane.

⁸ Mwanda tatwiuku kukita kia kwituhishena na biabinyibinyi, anka (kutamisha) wa biabinyibinyi.

⁹ Mwanda atusehela hatwi batūba, n’anwe bukome; uno namu watutekyela, nyi ngwanka wa kukumbashwa kwenu.

¹⁰ Binyibiabia nyi mwanda uno wanenufundjila yino myanda hanshī munkatshi mwenu, kutshina’shi, hanyikala kwakwa n’enu tala nenusashila, mwiyile bukome bubampele Nfumwetu bwa kwela mwiilu, bushī bwa kuiwisha, ooo.

¹¹ Kunfudilo bakwetu, nenuladikai, nwikale bakumbane, nusengibwe bibuwa, nwikale n’eshimba dimune, nubombele mu kufukama; biabia Efile Mukulu a kifulo na kufukama akekala n’enu.

¹² Nwīmushenei na lwififyeno luhatulwe lwi kishila.

¹³ Balamunweba-kishila boso abenwimuna.

¹⁴ Bu-muntu bwa Nfumwe tu Yesu Kidisitu, na kifulo ki’Efile Mukulu, na kihwano kia Kikudi-E-Selelee, bikale nenu boso. Amena.