Ii Bena Kodinda 12 - KILOMBENO KIHYA KIA NFUMWETU YESU KIDISITU

¹ Kwilungula, kwandji’mi tankumpwandjikile ooo, mwanda nafiki ku bimonwa na bifumbwilo bia kwi Nfumwetu.

² Neukile muntu a mu Kidisitu, kubakidi bihwa ekumi na binanka (su badi mu mbidi, tañuku’mi, su badi shī mu mbidi tañuku; Efile Mukulu euku), e winyi bātshilwe mwiilu, mpā na mwiilu dia kasatu.

³ N’ami neukile muntu badi anka bino, (su badi mu mbidi, sunga shī mu mbidi, tañuku’mi: Efile Mukulu euku),

⁴ Mubātshilwe mwiilu, mpaa na mu Mpaladisa, bahushishe mīsambo yishyayisambwā, yishidilwe kishila muntu kwiyisamba.

⁵ Nanketumbisha ha mwanda wa muntu e biabia; anka tanketumbisha ha mwanda wande’mi na mwinyi, ooo, anka mu butūba bwande.

⁶ Sunga nakyebanga kwitumbisha, tankekala mulēkene, mwanda nankākula biabinyibinyi: anka binobino nabanda kuleka, tala su nanyi su nanyi akampwandjikisha bikishekishe mwa ’mwena, sunga mwampushisha’mi.

⁷ Na ha mwanda wa kutshina’shi, tala nakekala mukishekishe kunemekwa ku bungi bwa bifumbulwe, kunadi muhebwe mulobo mu mbidi, taudi mukiendji wa Satana wa ku ’mwesha malwa; tala nankekala mwinemekye bikilekile.

⁸ Ha mwanda wa kino kintu nasendelele Nfumwetu misusa yisatu, ami’shi, kinkatukye.

⁹ E bandungwile’shi: Bu-muntu bwande mbukulombene; mwanda bukome bwande mbukumbashibwe mu butūba. Biabia tantumbisha n’eshimba di soo mu butūba bwande’shi, bukome bwa Kidisitu bwikale n’ami.

¹⁰ Nyi ha uno mwanda nasehelā mu butūba, mu misabulo, na mu nkalo ya bintu, mu kubingwabingwa, na mu bishiotshi ha mwanda wa Kidisitu, mwanda hanyikala mutūba hanyikala mutūba biabia nyi bukome.

¹¹ Hakwitumbisha nyi mwalulukye tandji mulotakane; anwe nubambusha; mwanda nadia kwikala mutumbishibwe kwanudi; mwanda nki kunyima kwa batumibwa bakile bukata, su mu kinyi su mu kinyi, sunga’ami nyi bu bisumanga.

¹² Mbinyibinyi bitundwilo bia butumibwa bibakitshinwe munkatshi mwenu mu mufwaka, mu bitundwilo, na mu biakukanya, na mu bikitshino bia ntshitshiba.

¹³ A mu kintu kinyi mwanubalobela ku bingi bikoñeno bi’Efile, anka su mpa mwandaw’ami na mwinyi shī mwinunemēne bushito? Nundekyele uno mwanda.

¹⁴ Talangai, uno nyi mususa wa kasatu wandji mwimene kufika kwanudi, n’ami namu tankekala mwinunemene bushito, ooo. Mwanda tankimbi bienu, ank’anwe; mwanda tankuhwandjikile bana kubikila banambutwile bintu, ooo, anka banambutwile kubikila bana.

¹⁵ Nankasehela bikata kwishidisha na kushidishwa ha mwanda wa bikudi bienu; su nyi n’enu kifulo kikata, ami nyi nfudibwe kifulo kihela.

¹⁶ Anka sunga mbiabia, ami tanadi mwinunemēne bushito; anka hanekēle na budimu, nenukwete ku bulamalama.

¹⁷ Nenudidīle kinyi kwi baba banenutuminyine kwanudi, su nkwinyi su nkwinyi?

¹⁸ Naihwishe Tetusa, namutumana mukwabo (mu Kidisitu.) A Tetusa benudidīle su? Tatubatembelanga mu kikudi kimune su? A tatubatembelanga mu ngwa yihamune’nka su?

¹⁹ Dimonyi anutentekyesha’shi, atwibalananyā atwe bana bene kwanudi? Atwakula ku mpala kw’Efile Mukulu mu Kidisitu; anka atukitshi bintu bioso mwakwinuelesha mwiilu anwe bakuminyibwe.

²⁰ Mwanda natshinyi, tala hankafiki, nankenusañana ntwanshī mukyebele, nami (namu) nankasañanwa n’enu mwanushyanukyebela: tala su kwekala mpaka, na kiutu, nsungu, mima, twihu, mikoso, kwinemeka, kwituhishena.

²¹ Tala namu hankafiki dimonyi, Efile Mukulu ande akankwatshisha būfu munkatshi mwenu, n’ami nankekala na lukalo lwa bebungi abasolele myanda kwibedi; bashī belangye munda ku kushūla-kwa-bishila na lukyebanokye’bano, na mudioholo w’eshimba dibi wabakitshine.