Ii Bena Kodinda 11 - KILOMBENO KIHYA KIA NFUMWETU YESU KIDISITU

¹ Nankyebe’shi, su anwiuku mwa kwikele n’anii kahindji mu kuhatakana (kwande); na kuhuñanya n’ami binyibinyi.

² Mwanda nyi na mukao kwinwe, au winyi ngwa kw’Efile Mukulu; mwanda nahu kwinukumina kwi mulume umune’shi, mwandjia nkenulubwila bu kamame e selelee kwi Kidisitu.

³ Anka nyi na moo, kutshina’shi, su nku kinyi, su nku kinyi, mwababembēle Efa kwi nyoka, ha mwanda wa budimu bwe, biabia namu binangu bienu tala biakekala bilwishibwe ku kubofula kwi mu Kidisitu.

⁴ Mwanda su mungi afiki, alungula mwanda wa mungi Yesu atushyatulungwila (mwanda we,) sunga nwatambula kingi kikudi kianushyātambwile, sunga ngungi mukāndu wibuwa wanushyakuminyine, biabia hangi anwiuku kwikala bahuñanyi biya n’ē.

⁵ Mwanda nahwandjikisha’shi, tanadi kunyima kwa batumibwa bakile bukata, sunga mpahelahela.

⁶ Ankasunga nyi muhatakane mu misainbo, nki biabia mu kiukilo, ooo; anka tubafumbwilwe biya munkatshi mwenu mu bintu bioso.

⁷ A nasolele mwanda hakwihelesha ami na mwinyi mwanudia kutumbishibwa, ha mwanda nenulungwilanga mukāndu wibuwa w’Efile Mukulu bwana su?

⁸ Nanyengyele ku bingi bikoñeno bi’Efile hakutambula efuto, mwanda wa kwinufubila.

⁹ Na hanadi n’enu kwakwa, na kwikala mulobele, tanadi na kwandji munemene, sunga kwi muntu umune ooo; (mwanda kianadi mulobeshe kwandji, bakwetu abafwile ku Masedonya abampele’bio) na mu bintu bioso nelamine’shi, tankwi nunemena, nyi mbiankelama biabia.

¹⁰ Bu biabinyibinyi bia Kidisitu bi munda mwande, takwi muntu akandekyesha mu kuno kwilungula mu mpese ya ku Akaya.

¹¹ A mpa mwanda kinyi? Mwanda nki n’enu kifulo su? Efile Mukulu euku.

¹² Anka kianakitshi, nyi ank’akio kiankakitshi nkakashe mwanda kwi’bo abakyebe mwanda’shi, mwabetumbikila bakasananwe anka hamune’twe.

¹³ Mwanda be biabia mbatumibwa ba madimi, bafubi bakudimba, mbealule’bo bana bene bu batumibwa ba Kidisitu.

¹⁴ Haha hashī mwanda wa kukanya, ooo, mwanda Satana na mwinyi bealulwile tadi bu mwikeilu e etata.

¹⁵ Binyibiabia kishī kintu kikata su bafubi be mbālulwe bu bafubi ba kululuma, kunfudilo kwabo akukekala mwiyile bikitshino biabo.

¹⁶ Nākuladimonyi’shi: Takumpwandjikishanga’nyi muntu, sunga ngumune’shi, nyi mulotakane, anka su nkuhwandjikisha bingi, bibuwa nuntambule bu mulotakane, nkelungule’mi na mwinyi hahela.

¹⁷ Uno wanyisamba, tanyisambila au kwi Nfumwetu, anka bu mu kulotakana, mu luno lukuluhilo lwa kwilungula.

¹⁸ Bu amwitumbisha bebungi mwiyile bia ku mbidi, ami namu nanketumbisha.

¹⁹ Mwanda anuhuñanya na balotakane na mashimba a tuseho, anwe basha binangu’ba.

²⁰ Mwanda anwe anuhuñanya sunga muntu enumuna m’buhika; sunga muntu enumina, sunga muntu enukwata, sunga muntu enemeka e na mwinyi, sunga muntu enukuhila luhi ku lukyebo.

²¹ Nesambila ha mwanda wa kusabulwa, hamunenka bū’twe abadi batūba. Anka moso amunyiñamena muntu kukita, su nanyi su nanyi, (nesambila mu kulotakana), ami namu nakanyiñamena.

²² Abo bena Hebelu su? N’aminamu. A nyi bena Isalele su? N’ami namu. A mba ku twikulu twa Abalahama su? N’ami namu.

²³ Abo’bo nyi mbafubi ba Kidisitu su? (Nēsamba bu mulekane.) Ami nyi mukile; mu mifubo ya kutuhwita yibakilakila bungi, mu mikombela yikishekishe, mu mashibo a nkano kukisha misusa na misusa, mu nfu yibungi.

²⁴ (Kwi Bena Yuda nakuhilwa misusa yitano mikombela makumi ananka, (bia kushala umune kukumbasha).

²⁵ Nakuhilwa’nyi na nsāsu misusa yisatu, mususa umune nāshibwa mabwe, misusa yisatu bia nyi tshikila mu masua, bufuku na kanya nadi mu mema a kalunga:)

²⁶ Mu nyendo misusa na misusa, na tutshima munda twa masaku a ha mema, mu tutshima munda twa kwi bantomboshi, mu tutshima munda twa kwi bakwetu ba kifuko, mu tutshima munda kwi Badjentaila, mu tutshima munda mu bibalo, mu tutshima munda twa mu kabāka, mu tutshima munda twa h’eshiba dia mema, mu tutshima munda twa bakwetu basha madimi;

²⁷ Mu lwidilo na kusosamena, mu ntengyela yibungi, mu nsala na nyota, mu nshilo ya biakudia misusa yibungi, mu mashika na muswa.

²⁸ Na hakutenteka abia bintu bi hasha, ayo ayinemenā ku nguba na nguba, nginyi ya kilele kia bikoñeno bioso bi’Efile.

²⁹ A nanyi e na butūba, n’ami nkikala na’bo? A nanyi mukokoshwe, n’ami nkikala na kibobo?

³⁰ Su nyi na lukalo lwa kwitumbisha, nanketumbisha ku bintu binemene bia butūba bwande.

³¹ Efile Mukulu Yaiya a Nfumwetu Yesu Kidistu, e akuhebwa mwabi kwikala-ika, euku’shi, ami tandjimbi, ooo.

³² Mu Damasakasa mutontshi mukata e hanundu ha boso, mulonde Nfumu Aletasa, balamine kibalo kia Damasakasa, na bu mulami (a basalai) bakyebele kunkwata.

³³ Natukile mwididishi, banyisha mu kisele ha lubumbu, biabia nahandjile ku maas’e.