Bena Bahebelu 6 - KILOMBENO KIHYA KIA NFUMWETU YESU KIDISITU

¹ Binyibiabia tulekyei aya myanda ya hambangilo ya Kidisitu, tuyididile ku bia bukulu, kushī kubanga kibangilo kia kwalulukil’eshimba ku myanda yifwe, na ya lukuluhilo kw’Efile Mukulu,

² na ya lulambukisho lwa mbatshisho, na ya kutenteka kwa maasa, na ya lusangukilo lwa ku bafwe, na ya kuhoneshibwa kwa ikala-ika.

³ Nyi mwatukakitshina su Efile Mukulu akumina.

⁴ Ha mwanda wa’ba abamunyikilwe kala, abatompele ku kia buntu kia mwiilu, abakitshinwe bu ba kwibungila ku Kikudi-E-Selelee,

⁵ abatompele namu Mwanda wibuwa w’Efile Mukulu, na biabukome bia bihungilo abikafiki.

⁶ Su abakalamunuka, akukakutshikwa kwibālusha dimonyi ku kwilanga kw’eshimba, mwanda abeyihayila dimonyi Mwan’Efile Mukulu ha nkulusu abo bana bene, na kumukwatshisha būfu hatoka.

⁷ Mwanda nsenga ayiminā mpeshi anokā hanka misusa na misusa, ayimeneshā kimwaa kwi’ba abeyidimine, ngibungile mwabi kw’Efile Mukulu;

⁸ anka’ya ayimena milobo na nahimbia ngihedibwe, tayidi hehi na kwelwa muloa; kunfudilo kwa’yo nyi nkuhya kālo.

⁹ Anka sunga atwisamba bino, bafudibwe kifulo, twibeukidile biya myanda yikile yaya buwa hanudi’nwe, na myanda ayikunkushena na kihandjilo.

¹⁰ Mwanda Efile Mukulu te na kushīkululama kwa kwilwa mifubo yenu na kutuwita kwa kifulo kianubalesha kwishina die, nyi kianubafubila balamunwe-bakishila, na hano henyi nukianufubu.

¹¹ Atwinukyebe’shi: Muntu ese ānwe aleshe’kwa ku sasakata hamunenka kwa lushingulwilo lukumbanelwa lutengyelo mpaa na kunfudilo;

¹² eshi tanwalulukanga bash’ehampa anka (nwikale) balondji b’aba abahyana milayilo ha mwanda wa Lukuluhilo na mufwāka.

¹³ Mwanda habayile Efile Mukulu Abalahama, betshihilee na mwinyi, mwanda takwi mungi mukile adiakutshiha’shi:

¹⁴ Binyibinyi (mu) mwabi nankakwela mwabi, na (mu) kufwimisha, nankakufwimisha;

¹⁵ na biabia hakukankamana na mufwāka, batambwile mulayilo.

¹⁶ Mwanda mbinyibinyi bantu abatshihā kwi be bakile bukata; na mutshiho wa kukankamika (mwanda,) nyi auhwiyampaka kwabadi.

¹⁷ Nyi mwanka Efile Mukulu, badi n’eshimba kulesha na kukishakisha kw’abahyana mulayilo, kinyi kikayikilo kia binangu, bekitshihile na mutshiho.

¹⁸ Eshi kwi (yino) myanda yibidi yikayikwe, mu’yo ngikambe, Efile Mukulu teuku kudimba, atwe tubasukile twekala bu batembela kinemo, twikale na kukankamana kukata mu kulamata ku lutengyelo lwitubikilwe ku meso.

¹⁹ Lwinyi’lo twi n’alo bu kimikilo ki’eshimba, lunyingye na lushimate, alutwela namu mu kiakia ki kumongo kwa lushiko-lwa-kilamba kikingwe.

²⁰ Nyi mwinyi mubetutwelele’wa betubadidile, nyi ng’Yesu, tadi bu tshiitemwakwidi-mukata, mpaa na kwikala-ika mwiyile mulongo wa Meletshīsedeka.