మార్కు 11 - ମାପୁରୁଦି ସତ୍ ବାକ୍ୟ ପୁନି ନିୟମ୍ଜିସୁ ରାଜା ୱାଜା ଯିରୁଶାଲତୁ ସର୍ଆନ୍ ( ମାତିଉ ୨୧:୧-୧୧ ; ଲୁକ ୧୯:୨୮-୪୦ ; ଜୋହନ ୧୨:୧୨-୧୯ ) 1 ଏସିୱାଲେ ଜିସୁ ମାରି ୱାନି ସିସୁର୍ ଜିରୁସାଲମ୍ତି ଲାକ୍ତୁ ମାନି ଜୀତ ଗରନ୍ତି ଲାକ୍ତୁରି ବେତ୍ପାଗି ନି ବେତନିୟା ଇନି ନାର୍ତୁ ଇତାର୍, ନାସ୍ତିୱାଲେ ଜିସୁ ୱାନି ସିସୁରି ଲୋଇ ରିଏରିଙ୍ଗ୍ ଇୟା ମାଟା ୱେର୍ସି ପୋକ୍ତାନ୍ । 2 “ମି ଆଗ୍ଡ଼ି ମାନି ଆୟା ନାଟ ସାନ୍ଡ୍ରୁ; ଆବେ ଇତି ଦାପ୍ରେ, ଆମା ମୁସ୍କୁ ଏନ୍ବା ବାସ୍ଇ ମାନି ଉଣ୍ତ୍ରି ଗଦପିଲାଦିଙ୍ଗ୍ ତର୍ନି ମାନିକା ସୁଡ଼୍ନିଦେର୍, ଆୟା ଗଦପିଲାଦିଙ୍ଗ୍ କୁତ୍ସ ନା ଲାକ୍ତୁ ତାଗାଟ୍ । 3 ମାରି, ଏନ୍ ଜଦି ମିଙ୍ଗିଁ ଏନ୍ଦା କୁତ୍ସି ଅସିନିଦେର୍ ଇଜି ୱେନ୍ବାନାନ୍, ଇନିଦେର୍, ପ୍ରବୁଙ୍ଗ୍ ଦର୍କାର୍ ମାନାତ୍, ମାରି ୱାନ୍ ଆୟା ଗଦପିଲାଦିଙ୍ଗ୍ ମାରିଡ଼େସି ୱେଡ଼ା କିଏନ୍ଣ୍ତା ବେନୁ ପୋକ୍ନାନ୍ ।” 4 ସିସୁର୍ ଆୟା ନାର୍ତୁ ସରାରୋ ଉଣ୍ତ୍ରି ଇଲୁ ସେର୍ଲା ଲାକ୍ତୁ ଆତ୍ରେ ଦୁୱାର୍ତୁ ଉଣ୍ତ୍ରି ଗଦପିଲାଦିଙ୍ଗ୍ ତର୍ତି ମାର୍ଇକା ସୁଡ଼ୁତାରୋ ଗଦଦିଙ୍ଗ୍ କୁତ୍ତାର୍ । 5 ଆବେନ୍ ଆୟା ଲାକ୍ତୁ ନିରିଇ ମାନି ଲୋକା ମାଣ୍କୁ ଏସ ଲୋକୁ ୱାରିଙ୍ଗ୍ ୱେନ୍ବାତାର୍, “ଗଦପିଲାଦିଙ୍ଗ୍ ଇନିକା କିଜିନିଦେର୍, ଗଦପିଲାଦିଙ୍ଗ୍ ଇନ୍ଦାନିଙ୍ଗ୍ କୁତ୍ସିନିଦେର୍ ?” 6 ଜିସୁ ଇନିକା ଇନ୍ଡ୍ରେଙ୍ଗ୍ ଇର୍ଆମାର୍ଆନ୍, ସିସୁର୍ ଆୟାୱାଜା ୱାରିଙ୍ଗ୍ ଇର୍ହାର୍, ତାନେ ୱେନ୍କା ଲୋକୁ ୱାନିକାଙ୍ଗ୍ ଡ଼ିସ୍ସି ସିତାର୍ । 7 ସିସୁର୍ ଆୟା ଗଦପିଲାଦିଙ୍ଗ୍ ଜିସୁ ଲାକ୍ତୁ ତାତାର୍ ରୋ ମାରି ଗଦଦି ମୁଟାମ୍ ମୁସ୍କୁ ନିଜେ ନିଜେଦି ୱାତିଙ୍ଗ୍ ପାର୍ସି ସିତାର୍, ମାରି ଜିସୁ ଆୟା ଗଦ ମୁସ୍କୁ ବାସ୍ତାନ୍ । 8 ମାରି ଏସଲୋକ୍ ଜିସୁଙ୍ଗୁଁ ମାନାଜି ଇଜି ନିଜେ ନିଜେଦି ୱାତିଙ୍ଗ୍ ରାସ୍ତାଦୁ ପାର୍ସି ସିତାର୍ ମାରି ଏସୋଲୋକ୍ ମାରାତି ରଡେଙ୍ଗ୍ ୱିଜୁ କାତ୍ସି ତାତାର୍ ନୋ ରାସ୍ତାଦୁ ପାର୍ତାର୍ । 9 ମାରି, ଜିସୁଦି ଆଗ୍ଡ଼ି ନି ୱେନ୍କା ବୁଲାଜି ସଲ୍ସି ମାନି ଲୋକ୍ଡର୍ ନାଣ୍ତ ଆଉଲି ଆଜି ଇନ୍ଡ୍ରେଙ୍ଗ୍ ଆସ୍ତାର୍, “ହୋଶାନା ପ୍ରବୁଦି ଦର୍ତାନ୍ ଏନ୍ ୱାଜିନାନ୍, ମାପୁରୁ ୱାନିଙ୍ଗ୍ ଆର୍ସିବାଦ୍ କିପିନ୍ ! 10 ମା ପୁର୍ବେଦି ବୁବା ଦାଉଦତି ଆମା ରାଜି ୱାଜିନାତ୍, ଆୟାତାନେଙ୍ଗ୍ ଧନ୍ୟ, ଆୟା ମୁସ୍କୁପୁର୍ତୁ ମାନି ନେଗି ବୁବାଦି ଧନ୍ୟ । ନାଣ୍ତ ଲୋକାମାନୁ ହୋଶାନା ।” 11 ଜିସୁ ଜିରୁସାଲାମ୍ତୁ ଇତାନ୍ ମାରି ମନ୍ଦିର୍ ଲୋଇ ଡ଼ୁଗିତାନ୍ ମାରି ସାରିବେଡ଼୍ତି ୱିଜୁ ଜିନିସ୍ତିଙ୍ଗ୍ ସୁଡ଼ୁତାନ୍ ନାସ୍ତିୱାଲେ ମିଲ୍ମିଲିକା ଆଜି ୱାଜି ମାର୍ଆତ୍ ଆକା ବାର୍ ଲୋକୁ ସିସୁରିୱାଲେ ବେତନିୟା ଇନି ନାର୍ତୁ ସର୍ଆନ୍ । ଜିସୁ ତଗା ମାରାନ୍ତିଙ୍ଗ୍ ଆନାଦୁରିଆ ସିତାନ୍ ( ମାତିଉ ୨୧:୧୮-୧୯ ) 12 ଆୟା ମାର୍ନାଣ୍ଡିଙ୍ଗ୍ ଜିସୁ ମାରି ସିସୁର୍ ବେତନିୟା ନାର୍ତାଣ୍ତ୍ ଜିରୁସାଲମ୍ତାନ୍ ୱାନିୱାଲେ ଜିସୁଙ୍ଗୁଁ ନାଣ୍ତ ବାଙ୍ଗାଁ କାଟ୍ତାତ୍ । 13 ମାରି, ଜିସୁ ଆକଣ୍କୁ ଉଣ୍ତ୍ରି ଆକୁମାନି ତଗା ମାରାନ୍ତିଙ୍ଗ୍ ସୁଡ଼ୁତାନ୍, ତଗା ମାରାନ୍ତୁ ଫଳ୍ ମାନାତ୍ନୋ ସିଲେତ୍, ଆୟା ଆସାଦାନ୍ ଜିସୁ ତଗା ମାରାନ୍ ଲାକ୍ତୁ ସର୍ଆନ୍ । ମାତର୍ ଲାକ୍ତୁ ୱାତାନ୍ ନୋ ଆୟା ତଗା ମାରାନ୍ତୁ ଆକୁ ଡ଼ିସ୍ସି ମାରି ଇନି ଫଳ୍ ବା ପଏତାନ୍, ଇରିଙ୍ଗ୍ ଆୟା ବେଡ଼ାଦୁ ତଗା ପଲ୍ ଆସ୍ନି ଦିନ୍ ରେଏତା ମାର୍ଆତ୍ । 14 ଜିସୁ ଆୟା ତଗା ମାରାନ୍ତିଙ୍ଗ୍ ସୁଡ଼୍ଜି ଇର୍ଆନ୍, “ନି ଲାକ୍ତୁରାନ୍ ଏମେ ଲୋକୁ ଏସ୍କାଙ୍ଗ୍ବା ପଲ୍ ତିନ୍ମାକିର୍ ।” ଜିସୁଦି ଇୟା ମାଟା ସିସୁର୍ ୱେର୍ଆର୍ । ଜିସୁ ମନ୍ଦିରତି ପର୍ନି ପାସ୍ରେଙ୍ଗ୍ ପୋକ୍ତାନ୍ ( ମାତିଉ ୨୧:୧୨-୧୭ ; ଲୁକ ୧୯:୪୫-୪୮ ; ଜୋହନ ୨:୧୩-୨୨ ) 15 ତାନେ ୱେନ୍କା ୱାର୍ ଜିରୁସାଲମ୍ତୁ ୱାତାର୍, ମାରି ଜିସୁ ମନ୍ଦିର୍ ଲୋଇ ସର୍ଆର୍ନୋ ଆବେ ପୁଜା ସିନି ଗରିଆ ମେଣ୍ତେଙ୍ଗ୍ ପର୍ଜି ମାନି ଲୋକାଙ୍ଗ୍ ଆତ୍ରେ ସପ୍ତା ପୋକ୍ତାନ୍ । ମାରି ଟାକା ପର୍ନି ଲୋକାଦି ଟେବୁଲ୍ ନି ପାଉରା ପର୍ନି ଲୋକାଦି ପାସ୍ରା ଡର୍ ପେର୍ଜି ପକ୍ତାନ୍, 16 ମାରି ମନ୍ଦିର୍ ଲୋଇରି ଦୁଆର୍ ସିଜି ଇନି ଜିନିସ୍ ଅତେଙ୍ଗ୍ ସାରି ଏଙ୍ଗ୍ବା ସିଏତାନ୍, 17 ଆୟାୱେନ୍କା ଜିସୁ ଶିକ୍ଷା ସିଜି ସିଜି ଇର୍ଆନ୍, “ଦାର୍ମୁସାସ୍ତ୍ରଦୁ ଇକା ରାସାତାମାନାତ୍, ନା ମନ୍ଦିର୍ ଦୁନିଆଦି ୱିଜୁ ଜାତିଦି ଲୋକ୍ତି ଉଣ୍ତିଙ୍ଗ୍ ପାର୍ତାନା ଇଲୁ ଇଜି ୱେଙ୍ଗ୍ଁନାତ୍ ? ମାତର୍ ମିର୍ ତୋ ଆକା ଡଙ୍ଗାଁରି ଇଲୁୱାଜା କିତିମାନିଦେର୍ ।” 18 ପେରି ପେରି ଜାଜକର୍ ମାରି ସାସ୍ତ୍ରିର୍ ଇୟା ମାଟା ୱେର୍ଆର୍ରୋ ଜିସୁଙ୍ଗୁଁ ଏଣ୍ତେସ୍ ସାପିସ୍ କିଦେଙ୍ଗ୍ ଆଟ୍ନାର୍, ଆୟା ଉଣ୍ତିଙ୍ଗ୍ ସାରି ପଇଦେଙ୍ଗ୍ ଆସ୍ତାର୍; ମାତର୍ ଆବେ ମାର୍ଇ ଲୋକଡର୍ ୱାନି ସିକିୟାଦିଙ୍ଗ୍ କାବା ଆତାର୍ ନୋ ୱାର୍ ୱାନିଙ୍ଗ୍ ତିଲାଜି ମାର୍ଆର୍ । 19 ଆୟା ନାଣ୍ଡିଙ୍ଗ୍ ମିଲିମିଲିକା ଜିସୁ ମାରି ୱାନି ସିସୁର୍ ଆୟା ଗାଡ଼୍ ଡ଼ିସ୍ସି ସଲ୍ସିମାର୍ଆର୍ । ତଗା ମାରାନ୍ତାନ୍ ସିକିୟା ( ମାତିଉ ୨୧:୨୦-୨୨ ) 20 ମାରି ଅର୍ଲେନ୍ ସାଲ୍ଦି ଆୟା ସାରି ସିଜି ସନିୱାଲେ ୱାର୍ ଜିସୁ ଏମେ ତଗା ମାରାନ୍ତିଙ୍ଗ୍ ଆନାଦୁରିଆ ସିତାମାର୍ହାନ୍ ଆୟା ମାରାନ୍ ମଦଲ୍ତାନ୍ ୱାର୍ସି ସରିକା ସୁଡ଼ୁତାର୍ । 21 ନାସ୍ତିୱାଲେ ପିତର୍ ଆଗ୍ଡ଼ିରି ମାଟା ଏତ୍କିଜି ଜିସୁଙ୍ଗୁଁ ଇର୍ଆନ୍, “ଏ ଗୁରୁ, ସୁଡ଼୍ଆ, ନିନ୍ ଏମେ ତଗା ମାରାନ୍ତିଙ୍ଗ୍ ଆନାଦୁରିଆ ସିତି ମାର୍ଇ, ଆୟା ତଗା ମାରାନ୍ ୱାର୍ସି ସର୍ଆ ମାନାତ୍ ।” 22 ଜିସୁ ଶିଶୁରିଙ୍ଗ୍ ୱେର୍ତାନ୍, “ମାପୁରୁଦି ମାନୁ ବିଶ୍ୱାସ୍ କିଦୁ । 23 ନାନ୍ ମିଙ୍ଗିଁ ସତ୍ ଇଜିନା, ଜେ ଏମେ ଲୋକୁ ଇୟା ଗରନ୍ତିଙ୍ଗ୍ ନିନ୍ ନିଙ୍ଗ୍ଜି ସାମ୍ଦୁର୍ତୁ ସଲ୍ସି ଆର୍ଆ ଇଜି ଇନାନ୍, ମାରି ୱାନି ନିଜେଦି ମନ୍ ଲୋଇ ଅଡ଼୍ବିଏଣ୍ଗା, ଏମେକା ଇର୍ଆ ମାନା, ଆକା ଆନାତ୍ ଇଜି ବିସ୍ବାସ୍ କିନାନ୍, ୱାନି ଉଣ୍ତିଙ୍ଗ୍ ଆକା ସତ୍ ଆନାତ୍ । 24 ଆଦେଙ୍ଗ୍, ନାନ୍ ମିଙ୍ଗିଁ ଇଜିନା, ମିର୍ ଏମେ ଏମେକା ପାର୍ତନା କିଜି ଲସ୍ନିଦେର୍, ଆକା ୱିଜୁ ପଇନାପ୍ ଇଜି ବିସ୍ବାସ୍ କିଦୁ, ଆୟାୱିଜୁ ପଇନିଦେର୍ । 25 ମାରି, ମିର୍ ଏମେ ସମୟତୁ ପାର୍ତନା କିଦେଙ୍ଗ୍ ନିଙ୍ଗ୍ନିଦେର୍, ଜଦି ଏ ବିରୁଦ୍ତାନ୍ ମିଙ୍ଗିଁ ଇନି ମାଟା ମାନାତ୍, ୱାନିଙ୍ଗ୍ କେମା କିଦୁ, ଆଦେଙ୍ଗ୍ ମି ମୁସ୍କୁପୁର୍ତି ବୁବା ବା ମିଙ୍ଗିଁ ୱିଜୁ ପାପ୍କେମା କିନାନ୍ । 26 ମାତର୍ ମିର୍ ଜଦି ଆଇ ଲୋକାଙ୍ଗ୍ କେମା କିଇଦେର୍, ଆଦେଙ୍ଗ୍ ମି ମୁସ୍କୁପୁର୍ତି ବୁବା ବା ମିଙ୍ଗିଁ ପାପ୍ ୱିଜୁ କେମା କିଏନ୍ ।” ଜିସୁଦି ଅଦିକାର୍ ବିସୟତୁ ୱେନ୍ବାତାର୍ ( ମାତିଉ ୨୧:୨୩-୨୭ ; ଲୁକ ୨୦:୧-୮ ) 27 ମାରିଡ଼େସି ଜିସୁ ମାରି ୱାନି ଶିଶୁର୍ ଜିରୁସାଲମ୍ତୁ ୱାତାର୍; ଜିସୁ ମନ୍ଦିର୍ ଲୋଇ ବୁଲାନି ୱାଲେ ପେରି ଯାଜକ, ସାସ୍ତ୍ରିର୍ ମାରି ନେତାର୍ ୱାନି ଲାକ୍ତୁ ୱାଜି ୱେନ୍ବାତାର୍, 28 “ନିନ୍ ଏମେ ଅଦିକାର୍ତାନ୍ ଇୟାୱିଜୁ କିଜିନି ? ମାରି ଇୟାୱିଜୁ ପାଣି କିଦେଙ୍ଗ୍ ନିଂଇ ଏନ୍ ଇୟା ଅଦିକାର୍ ସିତା ମାନାନ୍ ?” 29 ମାତର୍ ଜିସୁ ୱାରିଙ୍ଗ୍ ଇର୍ଆନ୍, “ନାନ୍ ମିଙ୍ଗିଁ ଉଣ୍ତ୍ରି ମାଟା ୱେନ୍ବାନା, ନା ମାଟାଦି ଉତର୍ ସିଦାଟ୍, ଆଦେଙ୍ଗ୍ ନାନ୍ ଏମେ ଅଦିକାର୍ତାନ୍ ଇୟାୱିଜୁ କିଜିନା, ଆକା ମିଙ୍ଗିଁ ଇନା । 30 ଜୋହନତି ଡୁବନ୍ ମୁସ୍କୁପୁରୁତାନ୍ ନା ଲୋକା ମାଣ୍କୁ ଆତାତ୍ ? ନାଂଇ ୱେର୍ତୁ ।” 31 ଆବେନୁ ୱାର୍ ୱାରି ୱାରି ଲୋଇ ୱାର୍ଗିସାଜି ଇନ୍ଡ୍ରେଙ୍ଗ୍ ଆସ୍ତାର୍, ଜଦି ମୁସ୍କୁପୁର୍ତାନ୍ ଇଜି ଇନିକା, ଆବେଟ୍ ୱାଣ୍ତ୍ରୁ ଇନାନ୍, ମିର୍ ଇନ୍ଦାନିଙ୍ଗ୍ ଜୋହନତିଙ୍ଗ୍ ବିସ୍ବାସ୍ କିଇତିଦେର୍ ? 32 ଜଦି ଯୋହନତି ଡୁବନ୍ ଲୋକାମାଣ୍କୁ ଆତାମାନାନ୍ ଇଜି ଇଡ୍ରେଙ୍ଗ୍ ମାପ୍ ଲୋକାଙ୍ଗ୍ ତିଲାଜି ମାର୍ହାପ୍ ? ଇରିଙ୍ଗ୍ ୱିଜୁ ଲୋକୁ ମାନାଜି ମାର୍ଆର୍ ଯେ ଯୋହନ ଅରେନ୍ ବାବବାଦି ଇଜି । 33 ୱାର୍ ଜିସୁଙ୍ଗୁଁ ଉତର୍ ସିତାର୍, “ମାପ୍ ନେସ୍ଏପ୍ ।” ଆୟାୱେନ୍କା ଜିସୁ ୱାରିଙ୍ଗ୍ ଇର୍ଆନ୍, “ନାନ୍ ଏମେ ଅଦିକାର୍ତାଣ୍ତ୍ ଇୟାୱିଜୁ ପାଣି କିଜିନା, ଆକା ନାନ୍ ବା ମିଙ୍ଗିଁ ୱେର୍ଏ ।” |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020