యోహాను 14 - ମାପୁରୁଦି ସତ୍ ବାକ୍ୟ ପୁନି ନିୟମ୍ଜିସୁନେ ବୁବାମାନୁ ସନି ସାରି, 1 ଜିସୁ ଇର୍ହାନ୍, ମି ଜିବନ୍ ଦାନ୍ଦା ଆମାକିତ୍; ମିର୍ ମାପୁରୁମାନୁ ବିସ୍ବାସ୍ କିଦୁ, ନା ମାନୁ ବା ବିସ୍ବାସ୍ କିଦୁ । 2 ନା ବୁବାଦି ଇନ୍ଡ୍ର ନାଣ୍ତ ବାକ୍ରେଙ୍ଗ୍ ମାନେ; ଜଦି ସିଲିତିଙ୍ଗ୍, ଆରିଙ୍ଗ୍ ନାନ୍ ମିଙ୍ଗିଁ ଇନ୍ଏତାମାନ୍ଧି, ନାନ୍ ମି ଉଣ୍ତିଙ୍ଗ୍ ବାଡି ତିଆର୍ କିଦେଙ୍ଗ୍ ସଲ୍ସିନା; 3 ମାରି, ନାନ୍ ସନାନୋ ମି ଉଣ୍ତିଙ୍ଗ୍ ବାଡି ତିଆର୍ କିତିଙ୍ଗ୍ ମାରିଡ଼େସି ୱାନା, ମାରି ନାନ୍ ଏମେ ବାଡିଦୁ ତେବାନା, ମିର୍ ବା ଏଣ୍ତେସ୍ ଆୟା ବାଡିଦୁ ମାନିଦେର୍, ଆୟାଉଣ୍ତିଙ୍ଗ୍ ମିଙ୍ଗିଁ ନିଜେଦି ଲାକ୍ତୁ ଅନା । 4 ମାରି, ନାନ୍ ଏମେ ବାଡିଦୁ ସଲ୍ସିନା, ଆୟା ସାରି ମିର୍ ନେସ୍ନିଦେର୍ । 5 ତୋମା ଜିସୁଙ୍ଗୁଁ ୱେନ୍ବାତାତ୍, “ପ୍ରବୁ, ନିନ୍ ଏମେ ବାଡିଦୁ ସଲ୍ସିନି, ଆକା ମାପ୍ ନେସ୍ଏଜିନାପ୍; ସାରି ବା ଏଣ୍ତେସ୍ ନେସ୍ନାପ୍ ?” 6 ଜିସୁ ୱାନିଙ୍ଗ୍ ଇର୍ହାନ୍, ନାନ୍ ସାରି, ସତ୍ ମାରି ଜିବନ୍; ନାଙ୍ଗିଁ ସିଜି ସଲ୍ଇତିଙ୍ଗ୍ ଏନ୍ ବୁବାଦି ଲାକ୍ତୁ ସନ୍ଡ଼୍ରେଙ୍ଗ୍ ଆଟ୍ଏନ୍ । 7 ଜଦି ମିର୍ ନାଙ୍ଗିଁ ନେସ୍ତିଦେର୍ମାନ୍ଧି, ଆରିଙ୍ଗ୍ ନା ବୁବେଙ୍ଗ୍ବା ନେସ୍ତିଦେର୍ମାନ୍ଧି; ଇଲେଇରାନ୍ ୱାନିଙ୍ଗ୍ ନେସ୍ତିମାନିଦେର୍ ମାରି ୱାନିଙ୍ଗ୍ ସଡ଼ୁତିମାନିଦେର୍ । 8 ପିଲିପ୍ ଜିସୁଙ୍ଗୁଁ ଇର୍ହାନ୍, ପ୍ରବୁ, ମାଙ୍ଗିଁ ବୁବେଙ୍ଗ୍ ତର୍ରିସ୍କିଆ, ନାସ ମା ଉଣ୍ତିଙ୍ଗ୍ ନାଣ୍ତ । 9 ଜିସୁ ୱାନିଙ୍ଗ୍ ଇର୍ହାନ୍, ପିଲିପ୍, ନିସସାନ୍ଧି ନାନ୍ ମି ୱାଲେ ମାନା, ମାରି ନିନ୍ ଇନିକା ନାଙ୍ଗିଁ ନେସ୍ଏଜିନି ? ଏନ୍ ନାଙ୍ଗିଁ ସୁଡ଼ୁତାମାନ୍ନାନ୍, ୱାନ୍ ବୁବେଙ୍ଗ୍ବା ସୁଡ଼ୁତାମାନ୍ନାନ୍; ମାଙ୍ଗିଁ ବୁବେଙ୍ଗ୍ ତରିସ୍କିଆ ଇଜି ନିନ୍ ଏଣ୍ତେସ୍ ୱେର୍ସିନିଦେର୍ ? 10 ନାନ୍ ଜେ ବୁବାମାନୁ ମାନା ମାରି ବୁବା ନାମାନୁ ମାନ୍ନାନ୍, ଇୟା ମାଟା ଇନିକା ବିସ୍ବାସ୍ କିଏଜିନିଦେର୍ ? ନାନ୍ ମିଙ୍ଗିଁ ଜେ ୱିଜୁ ବାକ୍ୟ ୱେର୍ନା, ଆୟାୱିଜୁ ନାନ୍ ନିଜେଦିମାଣ୍କୁ ଇନ୍ଏ, ମାତର୍ ବୁବା ନା ମାନୁ ମାନ୍ଜି ନିଜେଦି ପାଣି କିଜିନାନ୍ । 11 ନାନ୍ ଜେ ବୁବାମାନୁ ମାନା ମାରି ବୁବା ନା ମାନୁ ମାନ୍ନାନ୍, ନା ଇୟା ମାଟା ବିସ୍ବାସ୍ କିଦୁ, ମାରି ନାନ୍ ଏମେ ୱିଜୁ ପାଣି କିତାମାନା ଆୟାକା ସୁଡ଼ୁଜି ବିସ୍ବାସ୍ କିଦୁ । 12 ସତ୍ ସତ୍ ନାନ୍ ମିଙ୍ଗିଁ ୱେର୍ସିନା, ନା ମାନୁ ଏନ୍ ବିସ୍ବାସ୍ କିନ୍ନାନ୍, ନାନ୍ ଏମେ ଏମେ ପାଣି କିଜିନା, ୱାନ୍ ବା ଆୟାୱିଜୁ କିନ୍ନାନ୍, ମାରି ଆୟାମାଣାନ୍ ବା ନାଣ୍ତ ପେରି ପାଣି କିନାନ୍, ଇରିଙ୍ଗ୍ ନାନ୍ ବୁବାଦି ଲାକ୍ତୁ ସଲ୍ସିନା । 13 ଏଣ୍ତେସ୍ ମାରିନ୍ତିମାଣାନ୍ ବୁବାଦି ଦନ୍ୟବାଦ୍ ତରାନାତ୍, ଆୟାଉଣ୍ତିଙ୍ଗ୍ ମିର୍ ନା ଦର୍ତାନ୍ ଇନିକାବା ଲସ୍ତିଙ୍ଗ୍, ଆକା ନାନ୍ ସିନା । 14 ଜଦି ମିର୍ ନା ଦର୍ତାନ୍ ଇନି ବିସୟ୍ ନାଙ୍ଗିଁ ଲସ୍ତିଙ୍ଗ୍, ଆକା ନାନ୍ କିନା । ପବିତ୍ରଆତ୍ମାଦି ଦାନ୍ତି ପାର୍ମାଣ୍ 15 ଜଦି ମିର୍ ନାଙ୍ଗିଁ ଜିବନ୍ନୋନିଦେର୍, ଆରିଙ୍ଗ୍ ନା ମାଟାୱିଜୁ ମାନାନିଦେର୍ । 16 ମାରି, ନାନ୍ ବୁବେଙ୍ଗ୍ ମାଡ଼ିସ୍କିନା, ମାରି ମି ୱାଲେ ୱିଜୁଦିନ୍ତିଙ୍ଗ୍ ମାନି ଉଣ୍ତିଙ୍ଗ୍ ୱାନ୍ ମିଙ୍ଗିଁ ମାରି ଅରେନ୍ ସାହାଜ୍ୟକିନିୱାନିଙ୍ଗ୍ ସିନାନ୍ 17 ମାରି ୱାଦ୍ ଆଜିନାତ୍ ସତ୍ତି ଆତ୍ମା । ଇୟା ଜଗତ୍ ୱାନିଙ୍ଗ୍ ମାନାଦେଙ୍ଗ୍ ଆଟ୍ଏତ୍, ଇରିଙ୍ଗ୍ ଜଗତ୍ ୱାନିଙ୍ଗ୍ ସୁଡ଼ୁଏତ୍ କି ନେସେତ୍; ମାତର୍ ମିର୍ ୱାନିଙ୍ଗ୍ ନେସ୍ନିଦେର୍, ଇରିଙ୍ଗ୍ ୱାନ୍ ୱାଲେ ତେବାନାନ୍, ମାରି ୱାନ୍ ମି ଜିବନ୍ତୁ ତେବାନାନ୍ । 18 ନାନ୍ ସର୍ଇ ୱେନ୍କା, ନାନ୍ ମିଙ୍ଗିଁ ଟୁରା କଡ଼ କିଜ ଡ଼ିସ୍ସୋ ସଲ୍ଏ, ନାନ୍ ମି ଲାକ୍ତୁ ଡ଼େସିୱାନା । 19 ଉଣା ୱେଡ଼ା ମାନାତ୍, ଜଗତ୍ ନାଙ୍ଗିଁ ମାରି ସୁଡ଼ୁଏତ୍; ମାତର୍ ମିର୍ ନାଙ୍ଗିଁ ସୁଡ଼ୁନିଦେର୍, ଇରିଙ୍ଗ୍ ନାନ୍ ଜିବନ୍ ମାନା, ମିର୍ ବା ଜିବନ୍ ତେବାନିଦେର୍ । 20 ନାନ୍ ମା ବୁବାମାନୁ ମାରି ମିର୍ ନାମାନୁ ମାରି ନାନ୍ ମି ମାନୁ ମାନା, ଇକା ଆୟାନାଣ୍ତିଙ୍ଗ୍ ୱାତିଙ୍ଗ୍ ମିର୍ ନେସ୍ନିଦେର୍ । 21 ଏନ୍ ନା ମାଟାୱିଜୁ ମାନାଜି ସାଲାନାନ୍, ୱାନ୍ ନାଙ୍ଗିଁ ଜିବନ୍ନୋନାନ୍, ମାରି ଏନ୍ ନାଙ୍ଗିଁ ଜିବନ୍ନୋନାନ୍, ନା ବୁବା ୱାନିଙ୍ଗ୍ ଜିବନ୍ନୋନାନ୍, ମାରି ନାନ୍ ୱାନିଙ୍ଗ୍ ଜିବନ୍ନୋନା ମାରି ୱାନି ଲାକ୍ତୁ ନିଜେଦିଙ୍ଗ୍ ତରାୟାଆନା । 22 ଜିହୁଦା, ଇକାନ୍ ଇସ୍କାରିୟୋତିୟ ଜିହୁଦା ଆଏନ୍ ୱାନିଙ୍ଗ୍ ଇର୍ହାନ୍, ଏ ପ୍ରବୁ, ଇନିକା ଏଣ୍ତେସ୍ ଆନାତ୍ ? ନିଜେଦିଙ୍ଗ୍ ଦୁନିଆ ଲାକ୍ତୁ ତରାୟା ଆଏଣ୍ଗା ମା ଲାକ୍ତୁ ତର୍ତିମାନି ? 23 ଜିସୁ ୱାନିଙ୍ଗ୍ ଇର୍ହାନ୍, ଜଦି ଏନ୍ ନାଙ୍ଗିଁ ଜିବନ୍ନୋନାନ୍, ଆରିଙ୍ଗ୍ ୱାନ୍ ନା ବାକ୍ୟ ମାନାନାର୍, ମାରି ନା ବୁବା ୱାନିଙ୍ଗ୍ ଜିବନ୍ନୋନାନ୍, ମାରି ବୁବା ନି ନାନ୍ ୱାନି ଲାକ୍ତୁ ୱାଜି ୱାନି ୱାଲେ ତେବାନାପ୍ । 24 ଏନ୍ ନାଙ୍ଗିଁ ଜିବନ୍ନୋଏନ୍, ୱାନ୍ ନା ବାକ୍ୟଦିଙ୍ଗ୍ ମାନାଏନ୍, ମାରି ଏମେ ବାକ୍ୟ ମିର୍ ୱେନ୍ଜିନିଦେର୍, ଆକା ନାଦି ଆଏତ୍, ମାତର୍ ନା ପୋକ୍ତାତିମାନି ମାଲିକ୍ତି ବୁବାଦି । 25 ନାନ୍ ମି ୱାଲେ ମାନ୍ଜି ମାନ୍ଜି ମିଙ୍ଗିଁ ଇୟାୱିଜୁ ମାଟା ୱେର୍ତା । 26 ଆୟା ସାହାଜ୍ୟକିନିକାନ୍ ମାରି ପବିତ୍ର ଆତ୍ମା ଆମାତାନିଙ୍ଗ୍ ବୁବା ନା ଦର୍ତାନ୍ ପୋକ୍ତାନାନ୍, ୱାନ୍ ମିଙ୍ଗିଁ ୱିଜୁ ବିସୟ୍ତିଙ୍ଗ୍ ସିକିୟା ସିନାନ୍, ମାରି ନାନ୍ ମିଙ୍ଗିଁ ଆମା ଆମାକା ୱେର୍ତାମାନା, ଆୟାୱିଜୁ ମିଙ୍ଗିଁ ଏତ୍କିବିସ୍ କିନ୍ନାନ୍ । 27 ନାନ୍ ମିଙ୍ଗିଁ ସାନ୍ତି ଦାନ୍ କିତା ସଲ୍ସିନା, ନା ନିଜେଦି ସାନ୍ତି ଦାନ୍ ମିଙ୍ଗିଁ ସିଜିନା; ଜଗତ୍ ଏଣ୍ତେସ୍ ଦାନ୍ କିନାତ୍, ନାନ୍ ମିଙ୍ଗିଁ ଆୟାୱାଜା ଦାନ୍ କିଏ । ମି ଜିବନ୍ ଦାନ୍ଦା ନି ତିଲାମାକିତ୍ । 28 ନାନ୍ ସଲ୍ସିନା ମାରି ମି ଲାକ୍ତୁ ଡ଼େସି ୱାନା, ନା ଇୟା ମାଟା ତୋ ୱେର୍ଇମାନିଦେର୍ । ଜଦି ମିର୍ ନାଙ୍ଗିଁ ଜିବନ୍ନୋଜିମାରିଙ୍ଗ୍, ଆରିଙ୍ଗ୍ ନାନ୍ ନା ବୁବାଦି ଲାକ୍ତୁ ସଲ୍ସିନାନ୍ ଇଜି ୱେଡ଼ିକା ଆତିଦେର୍ମାନ୍ଧି, ଇରିଙ୍ଗ୍ ନା ବୁବା ନାମାଣ୍କୁ ପେରିକାନ୍ । 29 ମାରି, ଆକା ଗଟାନି ବେଡ଼ାଦୁ ମିର୍ ଏଣ୍ତେସ୍ ବିସ୍ବାସ୍ କିନିଦେର୍, ଆୟାଉଣ୍ତିଙ୍ଗ୍ ଆକା ଗଟାନି ଆଗ୍ଡ଼ିନେ ନାନ୍ ଇଲେଇ ମିଙ୍ଗିଁ ୱେର୍ତାମାନା । 30 ନାନ୍ ମି ୱାଲେ ମାରି ନାଣ୍ତ ସମୟ୍ ୱାର୍ଗିଜିସାଦେଙ୍ଗ୍ କେଏନି, ଇରିଙ୍ଗ୍ ଦୁନିଆଦି ପେରିକାନ୍ ୱାଜିନାନ୍; ମାରି, ନା ମୁସ୍କୁ ୱାନି ସାକ୍ତି ଇନିକା ସିଲେତ୍; 31 ମାତର୍ ବୁବା ନାଙ୍ଗିଁ ଏଣ୍ତେସ୍ ଆଦେସ୍ ସିତାମାନାନ୍, ଆୟା ଇସାବ୍ତାନ୍ ନାନ୍ ପାଣି କିନା । ଆତିଙ୍ଗ୍, ନାନ୍ ନା ବୁବେଙ୍ଗ୍ ଜିବନ୍ନୋନା ଇଜି ଦୁନିଆ ନେସ୍ନାତ୍ । ନିଙ୍ଗିଁଦୁ, ମାଡ୍ ଇୟା ବାଡିଦାନ୍ ସନାଟ୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020