Zistwar Bann Zapot 17 - Nouvo Testaman dan Kreol Morisien

Pol ek Silas dan Tesalonik

¹ Dan zot vwayaz Pol ek Silas ti pas Anfipolis ek Apoloni, e zot ti ariv Tesalonik, kot bann Zwif ti ena enn sinagog.

² Pol ti zwenn bann Zwif dan sinagog kouma li ti abitie. Trwa saba aswiv li ti diskit laparol ar zot.

³ Li explik zot e montre zot ki Lekris ti bizin soufer e resisite parmi bann mor. Li dir zot, “Sa Zezi ki mo pe anons zot la, limem Lekris.”

⁴ Detrwa parmi zot ti krwar e zot ti swiv Pol ek Silas, parey kouma enn kantite Grek ki ti ador Bondie ek boukou fam ki ti okip pozision inportan.

⁵ Me bann Zwif ti zalou. Zot pran ar zot detrwa taper, rasanble enn lafoul e zot fer dezord dan lavil. Zot atak lakaz Zason, zot ti pe rod tir Pol ek Silas pou amenn zot ar la foul.

⁶ Letan zot pa trouv bannla, zot pran Zason ek detrwa frer e trenn zot devan mazistra lavil. Zot kriye, “Sa bann dimoun ki ti pe devir lemonn anbalao la, zot finn vinn isi osi!

⁷ E Zason finn resevwar zot! Zot pa pe swiv lalwa Sezar, zot dir ena enn lot lerwa ki apel Zezi.”

⁸ Bann dimoun ek bann lotorite lavil ti bien trouble letan zot tann sa.

⁹ Zot dimann enn kosion ar Zason ek lezot, lerla ti les zot ale.

Pol ek Silas al Bere

¹⁰ Kouma fer nwar, bann frer avoy Pol ek Silas dan lavil Bere. Kan zot ariv laba zot al dan sinagog bann Zwif.

¹¹ Bann Zwif Bere ti ena meyer santiman ki bann Zwif Tesalonik. Zot ti pli pare pou resevwar Bonn Nouvel ki bannla. Toulezour zot ti pe examinn laparol pou verifie sipa seki ti pe dir la ti korek.

¹² Lakoz sa boukou parmi zot ti krwar, ansam avek bann fam Grek bien respektab, ek enn kantite zom osi.

¹³ Kan bann Zwif Tesalonik ti aprann ki Pol ti pe anons laparol dan Bere osi, zot al laba pou met dezord parmi lepep.

¹⁴ Toutswit bann frer fer Pol kontign so larout pou al lor lakot. Me Silas ek Timote ti res laba.

¹⁵ Bann ki ti akonpagn Pol ti kondir li ziska Atenn. Apre sa zot inn gagn lord pou dir Silas ek Timote rezwenn Pol pli vit posib.

Pol dan Atenn

¹⁶ Letan Pol pe atann zot dan Atenn, so lespri ti bien trouble ler li trouv sa kantite stati idol ki ti ena dan lavil la.

¹⁷ Lerla toulezour dan sinagog li ti diskit ar bann Zwif ek bann dimoun ki ador Bondie, ek osi dan bazar avek bann ki ti pas par la.

¹⁸ Detrwa filozof osi ti koz ar li. Ena filozof Epikiryien, e lezot bann Stoik. Ena dir, “Ki sa ninport la pe zaze koumsa?” Lezot ki ti pe tann li anons Zezi ek larezireksion ti fer remark, “Koumadir li pe koz lor bann bondie nou pa kone.”

¹⁹ Zot trap li, zot amenn li devan konsey Areopaz ek zot dir, “To kapav dir nou ki sa nouvo ansegnman ki to pe fer la?

²⁰ Parski nou pe tann bann zafer drol. Nou anvi kone kisavedir.”

²¹ Tou bann dimoun Atenn ek bann etranze ki ti viv laba ti pas tou zot letan pa fer nanye, me nek partaz ek ekout bann nouvo lide.

²² Lerla Pol met li dibout omilie Aeroaz e li dir, “Bann abitan Atenn! Mo trouve ki dan boukou fason zot bien relizie.

²³ Parski kan mo ti pe mars-marse inpe partou e mo get zot bann moniman sakre, mo ti trouv enn lotel kot zot ti ekrir: ‘Sa pou enn bondie inkoni.’ Asterla, seki zot pe priye san ki zot kone, mo pou fer zot konn li.

²⁴ Bondie ki finn kre lemonn ek tou seki lor la, limem Segner lesiel ek later e li pa res dan bann tanp ki finn fer par bann zom.

²⁵ Li pa bizin ki bann zom servi li, komsi li bizin kiksoz, parski limem ki donn lavi, ki fer respire, ki donn tou kiksoz.

²⁶ Depi enn sel anset li finn fer tou nasion pouki zot abit later anantie. Depi bien avanmem li finn fixe letan ek landrwa kot sak nasion pou viv.

²⁷ Bondie finn fer sa pouki zot rod li, e mem si zot pe tatone pou rode, kikfwa zot ti pou kapav trouv li, parski anrealite li pa lwin ar sakenn parmi nou.

²⁸ Kouma kikenn ti dir: ‘Par li nou viv, nou ena mouvman, nou ena lexistans.’ Li kouma sertin zot poet finn dir: ‘Nou osi, nou so zanfan.’

²⁹ Alors si nou zanfan Bondie, nou bizin pa panse ki Bondie enn idol an-or, an-arzan ou an ros, enn prodiksion lar ek imazinasion zom.

³⁰ Bondie finn met deryer nou sa letan ignorans la; asterla li dimann tou dimoun partou repanti,

³¹ parski li finn fixe enn zour kot li pou ziz lemonn avek zistis par enn zom ki li finn swazir; e pou sa, li finn donn lasirans tou dimoun par aksion ki li finn fer, li finn relev li parmi bann mor.”

³² Aster kan zot finn tann rezireksion bann mor, ena ti riye; me lezot ti dir, “Nou pou ekout twa enn lot fwa lor sa size la.”

³³ Pol sorti dan reynion la, li ale.

³⁴ Me inpe ti zwenn li ek zot finn krwar; parmi zot ti ena Deni, manm konsey Aerofaz, ek enn fam nome Damaris ek lezot ankor.