Eb 3 - Nouvo Testaman dan Kreol Morisien

Zezi pli gran ki Moiz

¹ Alor mo bann frer, mo bann ser Kretien, zot ki partaz enn lapel sorti dan lesiel, konsider Zezi kouma enn apot e enn gran pret ki nou lafwa proklame.

² Li finn fidel ar Bondie ki finn nom li, parey kouma Moiz ti fidel dan lakaz Bondie.

³ Parey kouma konstrikter enn lakaz gagn plis loner ki lakaz la, Zezi finn gagn enn pli gran laglwar ki Moiz.

⁴ Tou lakaz, li konstrir par kikenn, me Bondie limem konstrikter tou kiksoz.

⁵ Moiz finn fidel dan tou lakaz Bondie kouma enn serviter, pou rann temwagnaz lor bann kiksoz ki Bondie pou dir apre.

⁶ Me Lekris, finn fidel dan lakaz Bondie kouma so Garson. E noumem ki so lakaz, si nou res ferm dan nou lasirans ek fierte dan lesperans.

Repo pou lepep Bondie

⁷ Alor, kouma Lespri Sin dir, “Azordi letan to tann lavwa Bondie,

⁸ pa rann zot leker dir kouma zot bann anset ki ti revolte, parey zour kot zot ti teste li dan dezer,

⁹ zour kot zot anset ti rod teste mwa e pourtan zot ti trouv seki mo finn akonpli pandan karant-an.

¹⁰ Akoz samem mo ti ankoler avek sa zenerasion la, e mo ti dir, ‘Zot leker finn touzour egare; zot pa finn konn mo sime.’

¹¹ Dan mo koler mo ti fer enn serman: ‘Zame zot pa pou kapav vini e repoz avek mwa.’ ”

¹² Pran kont, mo bann frer, mo bann ser, pouki personn parmi zot pa ena enn leker move ek dezobeisan, ki kapav separ li avek Bondie vivan.

¹³ Me ki sakenn ankouraz so kamarad zour apre zour. Zot bizin kontigne osi lontan ki ena enn letan ki apel “zordi” pouki personn parmi zot pa les so leker vinn ros, oubien les zot anbete par pese.

¹⁴ Ofet nou enn partner avek Lekris, si nou gard sa konfians ki nou ena depi komansman la, ziska lafin.

¹⁵ Lekritir dir, “Zordi, kan to tann so lavwa, pa rann to leker dir kouma to bann anset ki ti revolte.”

¹⁶ Ki sa bann dimoun ki ti tande la, e pourtan zot ti rebel kont li? Eski pa tou sa bann ki ti kit Lezip gide par Moiz?

¹⁷ Kont kisannla Bondie ti ankoler pandan sa karant-an la? Pa kont bann ki ti fer pese e ki zot kadav ti tom dan dezer?

¹⁸ Avek ki li ti fer serman ki zame zot pa pou vinn repoz avek li? Eski pa ar bann ki pa finn obeir li?

¹⁹ Kouma nou finn trouve, sa bann la pa ti kapav rant dan sa plas repo la, parski zot pa ti ena lafwa.