2 Tesalonike 2 - Takarata pɛ Sɔ Mbombe Mbon

Mɔ ka behɔ sɔngsi ing ki * Kongawan tɛ pe

¹ Hio ya ɔ, Kongawan pɛ ɔ, Jésus-Christ, bepe, nɛ ɔ bewesiri may ha pɛa. Ɔ ani ha ɛnɛ nde,

² ka takaramɔ pɛ ɛnɛ abhunziki nɛhasa na, nɛ ka ɛnɛ ayaksi na. Hazu hio ma wi ha tɔa wen nde, swe ka Kongawan bepe nɛ hɔa kari. Mbwa ha tɔa nde, wen ɛngɛ tɛ nɛ wal *Nzɔy-Sɔtɛ, mana nɛ wal ma wen nu ɔ, mana nɛ wal ma takarata ka ɔ tomsa.

³ Ka ma wi aosili ɛnɛ ndang na. Hazu, sɔngsi nde, swe ɛngɛ ahɔ, dɔka wi belak wal mɛkara Christ gde, nɛ Wan-kafi *mbonga begbasi tɛ ing. Ma, wɛnɛ bebhondi bin.

⁴ Wan-kafi mbonga ɛngɛ begutɛ hazu sungiri hio mɔ Sɔ nɛ hio mɔ fɛt ka lɛm nɛ lukosomɔ. Nɛ wɛnɛ bele ha *gasa twa Sɔ, a bedungnu ang, nɛ a betɔ nde, wɛnɛ nê sɔ.

⁵ Mi batɔ wen mɔ ndɔng ha ɛnɛ ha ngimɔ ka mi boka fin hinɛ ɛnɛ. Tazu ɛnɛ gba fin nɛ yo na nde?

⁶ Mɔ ka dolsi wi ɛngɛ sising, ɛnɛ ingɔ yo. Wɛnɛ lɛma gbasi tɛ sɔna ka ngimɔ pɛa hɔa.

⁷ Ngatɛ pɛ Wan-kafi mbonga tɛ bo ha dea tom nɛ wuso kari. Nɛ yo bebhɔn ha wuso hɔ ha ngimɔ ka Sɔ kuso wi ka dolsi wɛnɛ.

⁸ Ha ngimɔ ɛngi Wan-kafi mbonga begbasi tɛ. Nɛ Kongawan Jésus begbɛ wɛnɛ nɛ bubu nu wa, nɛ a beyangili wɛnɛ nɛ yolo lɛkɛ-lɛkɛ gbasa tɛ pɛa.

⁹ Wan-kafi mbonga ɛngɛ begbasi tɛ nɛ ziomɔ pɛ *Satan. A bede hio tili *mɔbhana, *mɔweka, nɛ *mɔkifi nɛtɛ-nɛtɛ hazu osili nɛ hio wi.

¹⁰ A bede tili gdanga likisi nɛtɛ-nɛtɛ hazu sɛbhili nɛ hio wi ka bebhondi. Mbwa bebhondi hazu mbwa kafa mɛ ngoy tɛwen ka lɛma se mɛ kpasisi mbwa.

¹¹ Yo nê ɛngi ka Sɔ gdea mbwa ha si ngatɛ pɛ dalo tuka nde, mbwa amɛkiri hio wen dalo.

¹² Mɛgi, Sɔ begɔn kita ba nɛ wi ndɔng ka tɛ mɛkiri tɛwen na, nɛ ka kpaa totɛ ha dea gdangamɔ.

Sɔ weka ɛnɛ hazu kpasisi ɛnɛ

¹³ Pɛ ɔ, lɛma nde, ɔ aha oeba ha Sɔ swe fɛt hazu ɛnɛ, hio ya ɔ, ka *Kongawan ngoya pentɛ. Hazu, sɔngsi bhee gde ka Sɔ tɛ de ka nzan na, a weka ɛnɛ hazu kpasisi ɛnɛ. A kpasasa ɛnɛ nɛ wal *Nzɔy-Sɔtɛ ka gde ɛnɛ nɛ nzɔya ha li wa, nɛ fin nɛ wal mɛkaramɔ ka ɛnɛ mɛkiri nɛ tɛwen.

¹⁴ Sɔ saa ɛnɛ nɛ wal *Dede Wen ka ɔ bulo ha ɛnɛ, tuka nde, ɛnɛ fin akpa *lɛkɛ-lɛkɛmɔ pɛ Kongawan pɛ ɔ, Jésus-Christ.

¹⁵ Hazu ɛngi, hio ya ɔ, ɛnɛ ayol nɛ nɔa nging, nɛ ɛnɛ apam hio osamɔ ndɔng ka ɔ osa ha ɛnɛ mana nɛ wen nu ɔ, mana nɛ takarata pɛ ɔ.

¹⁶ Sɔ, Bafa ɔ ngoya ɔ, mɛgi nɛ wal *dede sila pɛa, wɛnɛ ha yɔkala ɔ kpoo, nɛ a haa dede *mɔgdetazu ha ɔ. Wɛnɛ hinɛ Kongawan pɛ ɔ, Jésus-Christ,

¹⁷ mbwa adonsi sila ɛnɛ nɛ da nɛ ngatɛ hazu de nɛ wol hio tili dede mɔ fɛt.